Romanonan 5

Kiko ta pasa ora Dios aseptá un hende komo hustu

1Awor ku Dios a aseptá nos komo hustu pa medio di fe, nos tin pas ku Dios, pa medio di nos Señor Hesu-Kristu. 2Hesu-Kristu a duna nos akseso na grasia di Dios ku nos a aseptá ku fe i ku ta duna firmesa na nos bida, i nos ta broma ku e speransa di tuma parti na e gloria ku Dios lo duna. 3Anto esei no ta tur kos, nos ta broma tambe den nos sufrimentu, pasobra nos sa ku sufrimentu ta duna nos kapasidat pa perseverá. 4Perseveransia ta hasi nos hende ku un karakter aprobá pa Dios; esei na su turno ta yena nos ku speransa. 5Anto e speransa ei no ta defroudá nos, pasobra Dios a drama su amor den nos kurason pa medio di Spiritu Santu ku El a duna nos.

6Nèt na momento ku nos no por a yuda nos kurpa, Kristu a muri pa hende ku no ta tene kuenta ku Dios. 7Awor no ta fásil haña un hende dispuesto pa muri pa un hende hustu, ounke un hende lo por entregá su bida pa un otro hende ku a hasi un gran bondat p'e.#5:7 pa un otro hende…p'e; otro posibel tradukshon: pa bondat 8Dios sí ta demostrá su amor pa nos dor ku Kristu a muri pa nos miéntras nos tabata pekadó ainda.

9P'esei awor ku Dios a aseptá nos komo hustu pa motibu ku Hesus a drama su sanger pa nos, ku muchu mas rason nos lo skapa e kastigu di Dios pa medio di Hesus. 10Pasobra si Dios a rekonsiliá nos kunÉ tempu nos tabata su enemigu ainda, pa medio di morto di su Yu, ku mas rason lo E salba nos pa medio di bida di su Yu, awor ku nos ta rekonsiliá kunÉ. 11Anto esei no ta tur kos, awor nos por broma ku Dios, danki na nos Señor Hesu-Kristu ku a rekonsiliá nos ku Dios.

Adam i Kristu

12Pues, piká a drenta mundu via un solo hende i pa via di piká a bini morto. Di e manera ei morto a plama entre tur hende, pasobra tur tur hende a hasi piká.#Génesis 3:6-19; Sabiduria 2:24 13Promé ku Lei di Moises ya tabatin piká den mundu, pero no por a tuma piká legalmente na kuenta sin Lei. 14Sinembargo for di tempu di Adam te Moises, morto a reina asta riba hende ku no a hasi e mesun piká ku Adam,#Génesis 2:16-17; 3:11-12 esta ku no a violá un mandamentu spesífiko di Dios. Awor ta asina ku Adam tabata modelo di Esun ku mester a bini.

15Sinembargo no por kompará piká di Adam ku grasia di Dios. Hopi hende a muri pa via di piká di un hende so, pero e don ku Dios a duna nos gratuitamente pa medio di Esun otro, Hesu-Kristu, ta muchu mas grandi i na bienestar di hopi hende. 16Tin un diferensia entre e don di Dios i e piká di esun hende Adam, pasobra despues di e piká di Adam a sigui un huisio ku a resultá den kondenashon, pero despues di e pikánan di tantísimo otro hende a sigui un don di Dios i e don ei tabata pordon kompleto. 17A konsekuensia di kaida di un solo hende, morto a kuminsá reina den mundu. Pero kuantu mas Esun hende Hesu-Kristu no a logra! Pasobra pa medio di djE tur hende lo biba, tur hende ku Dios pa puru bondat i abundantemente a duna e regalo di ta aseptá pa Dios. 18Asina antó, meskos ku piká di ún hende ta hiba na kondenashon, asina obediensia di Esun otro ei ta hasi ku Dios ta deklará tur hende hustu i nan ta haña bida komo resultado. 19Pasobra, meskos ku hopi hende a bira pekadó komo resultado di desobediensia di un solo hende, asina Dios ta aseptá tur hende komo hustu pa medio di obediensia di e otro hende, Hesu-Kristu. 20A introdusí Lei pa piká oumentá, pero ora piká a oumentá Dios a mustra su grasia muchu mas tantu. 21Ke men anto, meskos ku piká a reina dor di trese morto, asin'ei grasia di Dios lo reina dor ku Dios ta aseptá hende pa medio di nos Señor Hesu-Kristu, pa duna nan bida eterno.

Currently Selected:

Romanonan 5: BPK13

Highlight

Copy