Romanonan 3

1P'esei ta ki bentaha tin di ta hudiu òf di ta sirkunsidá? 2Hopi bentaha, anto den diferente forma! Pa kuminsá, Dios a konfia su palabra na nan,#Salmo 147:19-20 3pero algun di nan no tabata fiel n'E! Akaso esei ke men ku Dios ta stòp di ta fiel na nan? 4Apsolutamente ku nò! Dios semper ta honesto, ounke hende sí ta gaña. Manera Skritura ta bisa:

Mester sali na kla ku loke Abo, Dios, bisa ta hustu;

ora Bo ta dilanti di korte, lo Bo gana bo kaso!#Salmo 51:4

5Pero ke tal si ta nos maldat ta sirbi pa mustra ku Dios ta hustu? Ora E kastigá nos pa nos maldat, nos lo bisa e ora ei ku Dios ta inhustu? — Klaro ku awor akí mi ta papia for di punto di bista humano. — 6Apsolutamente ku nò! Si Dios ta inhustu, kon E por husga mundu?

7Awor si mi gañamentu ta sirbi pa bèrdat di Dios resultá mas glorioso, pakiko ta husga mi komo pekadó antó? 8Si ta asina, no ta mihó hasi maldat pa algu bon sali fo'i dje? Algun hende ku ta gaña riba nos ta bisa ku ta hustamente e pensamentu ei mi ta proklamá; e hendenan ei meresé kastigu.

Tur hende a hasi piká

9Kiko antó? Akaso nos komo hudiu tin privilegio riba otro hende ora Dios ta husga? Sigur ku nò!#3:9 Sigur ku nò!; otro posibel tradukshon: No den tur sentido! Pasobra ya mi a mustra kaba ku tur tur hende, tantu hudiu komo no hudiu, ta den gara di piká. 10Manera tin skibí den Skritura:

No tin niun ku ta hasi bon, ni sikiera ún!

11No tin niun ku komprondementu;

niun ku ta buska Dios.

12Pero tur a kohe mal kaminda,

perverso tur pareu.

Ningun no ta hasi bon,

ni sikiera ún!#Salmonan 14:1-3; 53:1-3

13Nan garganta ta manera un graf habrí;

nan lenga nan ta usa pa mentira;#Salmo 5:9

tras di nan lep tin venenu di víbora.#Salmo 140:3

14Nan boka ta yená ku maldishon i amargura;#Salmo 10:7

15nan ta ansioso pa drama sanger inosente.

16Unda ku nan bira nan ta sembra ruina i destrukshon

17i nan no konosé kaminda di pas.#Isaías 59:7-8

18Nan no tin rèspèt pa Dios.#Salmo 36:1

19Nos sa ku tur loke Lei ta siña ta konta pa esnan ku ta biba bou di Lei, esta e hudiunan. Ke men antó ku tur hende tin ku keda boka ketu i henter mundu, tantu hudiu komo no hudiu, mester duna Dios kuenta i rason. 20Pasobra Dios no ta aseptá niun hende komo hustu, pa motibu ku e ta kumpli ku lei.#Salmo 143:2; Galatanan 2:16 Lei ta sirbi pa hasi nos konsiente ku nos ta pekadó.

Fe ta pone ku Dios ta aseptá hende komo hustu

21Pero awor Dios a mustra na ki manera, esta sin Lei di Moises, E ta aseptá hende komo hustu. Esei ta algu ku Lei i e profetanan mes ta konfirmá: 22Dios ta aseptá tur hende pa medio di fe den Hesu-Kristu.#Galatanan 2:16 Esei ta konta pa tur hende ku kere den Kristu, sin distinshon. 23Tur hende a peka i ta karesé di Dios su gloria. 24Pero den su bondat Dios ta aseptá hende sin niun mérito di nan parti, dor di laga Kristu-Hesus libra nan di nan pikánan. 25Dios a hasi Kristu instrumento di pordon dor di lag'É drama su sanger. I e pordon ei nos ta alkansá pa medio di fe. Di e forma akí Dios ker a mustra kon hustu E ta dor di pordoná nos pikánan di ántes,#3:25 dor…ántes; otro posibel tradukshon: dor di keda sin kastigá nos pikánan di ántes 26pasobra E ta tolerante. Pero den e tempu akí Dios ker a demostrá, ku E ta hustu i ta aseptá hende ku ta kere den Kristu komo hustu. 27Unda antó orguyo di hende a keda dilanti di Dios? El a keda eliminá! Pakiko? Pasobra nos ta kumpli ku Lei? Nò, pasobra ta fe ta konta! 28Pues nos a konkluí kaba ku ta Dios ta aseptá hende komo hustu pa medio di fe i no pasobra hende ta kumpli ku Lei di Moises.

29Akaso Dios ta Dios di e hudiunan ku tin Lei so? E no ta Dios di esnan no hudiu tambe? Sí, klaro ku E ta nan Dios tambe, 30ya ku ta un Dios so tin!#Deuteronomio 6:4; Galatanan 3:20 E ta aseptá tantu hudiu, ku nan sirkunsishon, komo esnan no hudiu, sin sirkunsishon, djis pa motibu di nan fe. 31Ke men anto ku nos ta pone Lei di Moises un banda pa motibu di fe? Klaro ku nò! Al kontrario, nos ta duna Lei su berdadero balor.

Currently Selected:

Romanonan 3: BPK13

Highlight

Copy