Salmo 65
65
SALMO 65
Bo ta kalma nos i nos tera ku bo bondat
Pa maestro di kanto. Salmo di David.
1Alabansa ta toka#65:1 ta toka: segun vershonnan antiguo; hebreo tin: den silensio na Bo,
Dios, riba Seru di Sion.
2Bo meresé pa hende kumpli ku promesanan,
o Skuchador di orashon!
3Hende mortal, tur ta bini serka Bo
ku nan peso di piká;
nos faltanan a bira muchu pa mi,
Abo pordoná nan!
4Felis t'esun ku Bo ta skohe i yama
pa biba den bo kortenan;
yena nos ku e biennan di bo kas,
ku santidat di bo tèmpel.
5Ku obranan grandioso di hustisia
Bo sa kontestá nos,
o Dios, nos Salbador,
speransa di mundu henter
i di lamannan di mas leu,
6ku a fiha serunan ku propio forsa,
Abo, bistí ku poder,
7ku a plakia ronkamentu di laman,
boroto di nan ola
i tumulto di pueblonan.
8E habitantenan mas leu di mundu
ta atmirá bo señalnan;
Bo ta laga portanan di solo,
kaminda e ta sali i ta baha
resoná di alegria.
9Bo a kuida tera i a muh'é,
B'a hasié riku i gordo;
roi di awa di Dios a bòltu
pa maishi por a nase.
T'asina Bo ta mira pa tera:
10Bo ta yena su riolnan,
ta hasi su klòmpinan pareu
ta hasié moli ku yobida
i ta bendishoná su matanan.
11Kaba Bo ta kolma aña
ku tur bo biennan;
kaminda Bo a pasa tin gordura.
12Yerb'i kunuku ta bèrdè,
serunan bistí di fiesta,
13kunuku ta kubrí ku karné,
vaye tapá ku maishi.
Tur ta grita, sí, ta kanta di alegria.#Salmo 104:10-16
Currently Selected:
Salmo 65: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013