Salmo 32
32
SALMO 32
Dios ta pordoná esun ku ta konfesá su kulpa
Di David. Poema didáktiko.
1Felis t'esun ku su eror ta pordoná,
kende su piká ta tapá.
2Felis ta e hende ku SEÑOR
no ta tuma su krímen na kuenta,
den kende su sintí no tin engaño.#Romanonan 4:7-8
3Pasobra miéntras mi no ker a papia,
mi kurpa ta'ta pèrdè tur forsa
di tantu kehamentu henter dia.
4Di dia i anochi bo man
tabata pisa duru riba mi;
m'a pashimá te den mi manteka di wesu,
manera ta higra di solo a kima mi.
5Ma mi a konfesá Bo mi piká,
mi no a sigui skonde mi maldat;
mi di: Laga mi konfesá SEÑOR mi faltanan.
Anto B'a kita mi kulpa i piká.#2 Samuel 12:13; Salmo 51:1-4
6P'esei, laga tur ku ta kere
resa na Bo den tempu di ansha;#32:6 den tempu di ansha: segun vershonnan antiguo; hebreo tin: den tempu di enkontrá solamente
e ora ei awa, maske kuantu e por subi,
lo no ta kapas di alkansá nan.
7Abo, mi Asilo, ta warda mi di apuro,
ta rondoná mi ku gritu di esnan
ku ta gosa ku Bo a libra mi.
8‘Lo Mi duna bo instrukshon i lo mustra bo
e kaminda ku lo bo tin ku sigui;
lo Mi duna bo konseho,
Mi no ta pèrdé bo fo'i bista.
9No keda manera un kabai,
ni manera un mula sin sintí
ku tin mester di frena i rienda
pa bo por wanta nan stripada,
sino nan no ta bini serka bo.’
10Hopi sla ta warda pekadónan,
ma ken ku konfia den SEÑOR,
Dios su amor lo rondon'é.
11Keda kontentu: t'É ta SEÑOR!
Hubilá pa su motibu, o fielnan;
dal gritu di alegria, boso tur
ku tin kurason sinsero.
Currently Selected:
Salmo 32: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
