Salmo 135
135
SALMO 135
SEÑOR ta Dios di naturalesa i di historia
1Alabá sea SEÑOR!
Alabá nòmber di SEÑOR,
alab'É, sirbidónan di SEÑOR
2ku ta sirbi den kas di SEÑOR,
riba plenchinan di kas di nos Dios.
3Alabá SEÑOR, E ta bon,
kanta gloria di su nòmber tan amabel!#135:3 tan amabel; otro posibel tradukshon: pasobra esei ta dushi
4Komo SEÑOR a skohe Yakob,
Israel pa su propiedat.
5Sí, mi sa, SEÑOR ta grandi,
nos Señor ta mas grandi ku tur dios.
6Kiko ku E ke SEÑOR ta hasi
tantu den shelu komo na tera,
den laman i den fondo di abismo.
7E ta laga nubianan subi
for di puntanan ekstremo di mundu,
ta manda welek pa awa por kai,
ta laga bientu supla fo'i su mangasinanan.#Yeremías 10:13; 51:16; Sirag 43:13-14
8T'E a dal tur yu mayó di Egipto,
di hende i tambe di bestia.
9El a hasi señal- i milagernan
meimei di bo tera, Egipto,
kontra Fárao i tur su ofisialnan.#Éksodo 12:29-30
10El a derotá hopi pueblo
i a mata reinan poderoso:
11Sihon, rei di amoritanan
i Og, rei di Bashan;#Numbernan 21:21-35
El a kaba ku tur reino di Kanaan.
12El a duna su pueblo nán pais,
pa el a keda propiedat di Israel.
13SEÑOR, bo nòmber t'ei pa semper!
Tur generashon lo rekordá bo,
14komo SEÑOR lo sali pa su pueblo,#Deuteronomio 32:36
su sirbidónan lo E mustra kompashon.
15Diosnan pagano ta plata i oro,
kosnan trahá pa man di hende.
16Nan tin boka — ma nan no por papia,
nan tin wowo — ma nan no por mira,
17orea nan tin — ma no por tende,
nan no tin rosea den nan boka.
18Mare#135:18 Mare esnan ku a traha nan otro posibel tradukshon: Esnan ku a traha nan lo esnan ku a traha nan, bira meskos ku nan,
sí, tur ku ta konfia riba nan!#Salmo 115:4-8; Isaías 44:9-20; Yeremías 10:1-16; Sabiduria 15:15; Revelashon 9:20
19Pueblo di Israel — bendishoná SEÑOR!
Saserdotenan — bendishoná SEÑOR!
20Levitanan — bendishoná SEÑOR!
Tur ku ta sirbi SEÑOR — bendishon'É!
21Bendishoná sea SEÑOR for di Sion,
E ku ta biba na Herusalèm!
Alabá sea SEÑOR!
Currently Selected:
Salmo 135: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
