Efesionan 4
4
Union den kurpa di Kristu
1P'esei antó ami, ku ta prizonero pa kousa di Señor, ta hasi un apelashon na boso pa boso komportá di un forma ku ta kuadra ku e yamada ku Dios a hasi riba boso. 2Sea semper humilde i mansu, tene pasenshi i soportá otro ku amor.#Kolosensenan 3:12-13 3Hasi esfuerso pa kuida e union ku Spiritu Santu ta duna, pa medio di e pas ku ta mara boso huntu. 4Ta ún kurpa di Kristu i ún Spiritu so tin, meskos ku Dios a yama boso pa risibí e mesun speransa. 5Ta ún Señor so tin, ún fe, ún boutismo 6i ún Dios, ku ta Tata di tur, ta riba tur, ta obra pa medio di tur i ta biba den tur.
7Kada un di nos a risibí un don, na midí ku Kristu ker a duna kada un esei. 8P'esei Skritura ta bisa:
Ora El a subi bai ariba,
El a kohe e prizoneronan bai kuné
i a parti don pa hende.#Salmo 68:18
9Awor ta kiko ta nifiká: ‘El a subi bai ariba’? Klaro ku lo E mester a yega di baha bini#4:9 baha bini; otro manuskrito tin: baha bin promé te na e parti mas abou, esta riba mundu mes! 10Ke men ku Esun ku a baha bini abou, ta Esun ku a subi bai ariba, pasa shelu sigui bai i yena tur kos den universo kompletamente.
11El a duna hende don pa asina algun di nan bira apòstel, algun otro profeta, otro evangelista i otro wardadó i maestro. 12Asin'ei E ta prepará e pueblo santu pa hasi su tarea i yuda kresementu di kurpa di Kristu 13te ora nos tur alkansá union den fe i den konosementu di Yu di Dios. E ora ei nos lo ta hende adulto, ku un madures ku ta igual na perfekshon di Kristu mes. 14E ora ei nos lo no ta mucha chikitu ku ta hasi manera ola ku ta subi baha i ku tur sorto di bientu ta supla manda djaki p'aya, mi ke men: tur sorto di siñansa ku ta bini di hende astuto, baké den arte di desviá otro hende! 15Ma nos ta basa nos bida riba bèrdat i amor i asina nos ta krese pa yega na un union perfekto ku Kristu, ku ta e kabes. 16Danki na Kristu tur parti di e kurpa ta bon hinká den otro i uní pa medio di e kabuyanan di múskulo. Anto si tur e partinan ta funshoná bon, e kurpa ta krese i keda edifiká den amor.#Kolosensenan 2:19
Hende nobo pa medio di Kristu
17Esaki antó ta loke ami tin pa bisa boso i mi ta bis'é ku énfasis na nòmber di Señor: no komportá boso manera pagano ku ta pensa lokura. 18Nan sintí ta tapá i nan no tin parti na e bida ku Dios ta duna, ya ku nan ta ignorante i nan kurason ta duru! 19Nan a pèrdè bèrgwensa i a entregá nan mes, sin niun kòntròl, na bisio pa hasi tur klase di impuresa.#Romanonan 1:21-25
20No ta e kosnan ei boso a siña tokante Kristu sí! 21Klaro ku boso a tende papia di djE i a siña boso di djE konforme e bèrdat ku ta den djE mes. 22A siña boso pa pone boso bida di ántes un banda, esta e hende ku boso tabata ántes,#Kolosensenan 3:9 ku tabata putri kaba na nada, pasobra e tabata deseá loke ta engañoso. 23Spiritualmente mester bini un kambio den boso moda di pensa 24i boso mester biba manera hende nobo,#Génesis 1:26 kreá segun imágen di Dios, hende ku ta biba un bida rekto i hustu, inspirá pa bèrdat.
Reglanan pa e bida nobo
25P'esei antó, no gaña otro mas! Boso kada un, papia bèrdat ku otro,#Zakarías 8:16 pasobra nos ta miembro di e mesun kurpa.#Romanonan 12:5 26Boso por rabia sí, ma no peka#Salmo 4:4; Hakobo 1:19-20 ora boso rabia ni no bai drumi rabiá. 27No duna diabel niun chèns! 28Esun ku tabata hòrta, mester stòp di hòrta i kuminsá gana su pan honradamente pa asina e por yuda esnan ku ta den nesesidat. 29No usa palabra fo'i sla; laga loke boso papia ta útil, konstruktivo i na su lugá, bon pa yuda esnan ku ta skucha. 30Anto no hasi Spiritu Santu di Dios fèrdrit; Dios a seya boso kunÉ komo su propiedat pa marka boso pa e dia di salbashon final. 31Pone un banda tur amargura, rabiamentu, lantamentu di bos, insulto, den un solo palabra: tur sorto di malisia! 32Pero sea bondadoso i tene kompashon; pordoná otro manera Dios a pordoná boso pa medio di Kristu.#Kolosensenan 3:13
Currently Selected:
Efesionan 4: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013