2 Korintionan 6
6
1Komo kolaboradó di Dios nos ta hasi un apelashon na boso pa no laga e grasia ku boso a haña di Dios resultá enbano. 2Pasobra E ta bisa:
‘Na e momento apropiá, Mi a skucha bo orashon;
ora e dia di liberashon a yega,
Mi a sali pa yuda bo.’#Isaías 49:8
Tende, esaki ta e momento apropiá; awe ta e dia di salbashon!
3Nos no ke hasi nada ku ta ofendé hende, pa nos trabou no haña mal nòmber. 4Al kontrario, den tur kos ku nos hasi, nos ta mustra ku nos ta sirbidó di Dios: Ku pasenshi nos a soportá sufrimentu, nesesidat, tribulashon, 5sla, prizòn,#Echonan 16:23 disturbio públiko, trabou pisá, falta di soño i hamber. 6Nos kondukta tabata ireprochabel; nos a aktua ku komprondementu, pasenshi i bondat; nos a hasi tur esaki pa medio di Spiritu Santu, di amor sinsero, 7e mensahe di bèrdat i e forsa ku Dios ta duna. Nos arma, tantu pa ataká komo pa defendé nos kurpa, ta enserá kumpli ku boluntat di Dios. 8Tin bia ta honra nos, otro bia ta ofendé nos; tin bia ta papia malu di nos, otro bia ta gaba nos. Ta trata nos manera ta sakadó di mentira nos ta, pero nos ta papia bèrdat. 9Ta trata nos manera hende deskonosí, kaba nos ta bon konosí. Ta hasi komo si fuera nos ta morto, kaba nos ta yen di bida; nos ta haña kastigu, pero nos no ta muri sí! 10Ounke por parse ku nos ta tristu, nos ta kontentu sí; nos por parse pober, pero nos ta enrikesé hopi hende. Ta parse manera nos ta planbarí, pero nos ta poseé tur kos!
11Kerido korintionan, nos a papia palabra kla ku boso; nos a habri nos kurason hanchu hanchu pa boso. 12No ta nos a sera nos kurason pa boso, ma ta boso a sera boso kurason pa nos! 13Mi ta papia ku boso manera un tata lo a papia ku su yunan: hasi meskos ku nos i habri boso kurason hanchu.
Atvertensia kontra influensia pagano
14No mara boso mes na hende ku no ta kreyente, pasobra hustisia i maldat no tin nada di aber ku otro tòg? I lus i skuridat por tin relashon ku otro?#Deuteronomio 22:10; Sirag 13:17 15No por tin harmonia entre Kristu ku Belial, ni entre un kreyente ku un no kreyente! 16Tèmpel di Dios no tin nada en komun ku ídolo pagano. Wèl, nos ta tèmpel di e Dios bibu.#1 Korintionan 3:16; 6:19 Dios mes a bisa:
‘Ami lo biba serka nan
i lo Mi ta huntu ku nan.
Lo Mi ta nan Dios
i nan lo ta mi pueblo.’#Levítiko 26:12; Ezekiel 37:27
17P'esei Señor ta bisa:
‘Sali for di nan kompania,
alehá boso di nan;
no mishi ku nada impuru!#Isaías 52:11
I Ami lo aseptá boso.
18Ami lo ta un Tata pa boso
i boso lo ta mi yu, hòmber i muhé.’
Esei ta loke Señor Todopoderoso ta bisa.#2 Samuel 7:14; 1 Krónikanan 17:13; Isaías 43:6; Yeremías 31:9
Currently Selected:
2 Korintionan 6: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
