Maki 9

Elíi kpódó Mɔyízi kpó ɖɔ xó xá Jezu ɖo só ɖaxó ɖé jí

(Matíe 17.1-13; Luki 9.28-36)

1Jezu ka lɛ́ ɖɔ nú yě ɖɔ: “Má ɖɔ nǔgbó nú mi, mɛɖé lɛ́ɛ ɖo mi mɛ fí din, bó ná kó kú cóbó ná mɔ axɔ́súɖuɖu Mawu tɔn ná wá kpódó hlɔ̌nhlɔ́n kpó ǎ.”

Jezu sín ninɔmɛ húzú ɖo só ɖaxó ɖé jí

2 Jezu ɖɔ xó énɛ́ nú yě, bɔ azǎn tɔn ayizɛ́n gúdo ɔ́, é kplá Piyɛ́ɛ, Jaki kpódó Jǎan kpán jɛ vo ɖo só ɖaxó ɖé jí, bɔ ninɔmɛ tɔn húzú ɖo nukɔn yětɔn. 3Bɔ awu e ɖo wǔtu tɔn ɔ́ jɛ kínkɔ́n jí, bó wé tété, bɔ mɛ ɖěbǔ ɖo ayǐkúngban jí fí bó ná bló bɔ é ná wé sɔ mɔ̌ ǎ. 4Elíi kpódó Mɔyízi kpó wá tɔ́n dó yě jǐ, bó jɛ xó ɖɔ xá Jezu jí. 5Bɔ Piyɛ́ɛ yí xó, bó ɖɔ nú Jezu ɖɔ: “Mɛ̌si, fí e mǐ wá din ɔ́ nyɔ́ mɛ! Mǐ ná gbá goxɔ atɔn, towe ɖokpó, Mɔyízi tɔn ɖokpó, Elíi tɔn ɖokpó.” 6É ɖɔ mɔ̌, ɖó é sɔ́ tunwun xó e é ná ɖɔ ɔ́ ǎ, ɖó xɛsi ɖaxó ɖé jɛ yě jí. 7 Akpɔ́kpɔ́ ɖé wá cyɔ́n yě, bɔ yě se gbe ɖé sín akpɔ́kpɔ́ ɔ́ mɛ, bɔ é nɔ́ ɖɔ: “Vǐ ce vívɛ́ná wɛ nyí mɛ élɔ́; mi ɖótó e.” 8Azɔn ɖokpó ɔ́, yě kpɔ́n fí bǐ, yě ká sɔ́ mɔ mɛɖé ɖo fínɛ́ zɛ Jezu wú ǎ.

9Ée yě wá ɖo te jɛ sín só ɔ́ jí wɛ ɔ́, Jezu dó sɛ́n nú yě ɖɔ: “Mi ma ɖɔ nǔ e mi mɔ ɔ́ nú mɛɖé cóbónú Mawu ná fɔ́n nyɛ Gbɛtɔ́ví ɔ́ sín kú ó.” 10Yě hɛn sɛ́n énɛ́ dó ayi mɛ, bó ka nɔ́ kanbyɔ́ yěɖée ɖɔ: “Étɛ́ ká ɖo ‘fínfɔ́n sín kú’ ɔ́ nyí wɛ?”

11 Bɔ yě kanbyɔ́ Jezu ɖɔ: “Étɛ́wú sɛ́nkplɔ́nmɛtɔ́ lɛ́ɛ ka nɔ́ ɖɔ Elíi wɛ ɖó ná tó wá hwɛ̌?” 12É ka yí gbe nú yě ɖɔ: “Nǔgbó wɛ, Elíi ɖó ná wá hwɛ̌, bó ná sɔ́ nǔ lɛ́ɛ ɖó tɛn yětɔn yětɔn mɛ. Lo ɔ́, nɛ̌ ka gbɔn bɔ è wlǎn ɖ'ayǐ ɖɔ Gbɛtɔ́ví ɔ́ ɖó ná ji ya ɖésú, bɔ yě ná sɔ́ ɛ dó ylɔ́ nǔɖé ná ǎ? 13Éɖíe, má ɖɔ nǔgbó nú mi: Elíi ko wá, bɔ yě sɔ́ ɛ dó wa nǔ e jló yě ɔ́ ná lě e è ko wlán gbɔn ɖ'ayǐ dó wǔ tɔn é.”

Jezu nya yɛ nyanya sín nyaví ɖé jí

(Matíe 17.14-21; Luki 9.37-43)

14Ée yě sɛkpɔ́ ahwanvú ɖě lɛ́ɛ ɔ́, yě mɔ ahwan gěgé lɛ́ lɛ̌ dó yě, bɔ sɛ́nkplɔ́nmɛtɔ́ lɛ́ɛ ɖo nǔ dɔn xá yě wɛ. 15Ée mɛ lɛ́ɛ mɔ Jezu ɔ́, é kpácá yě tlala, bɔ yě xozǐn yi kpé e, bó dó gbe e. 16Jezu ka kanbyɔ́ ahwanvú tɔn lɛ́ɛ ɖɔ: “Étɛ́ dɔn xá yě wɛ mi ka ɖe?” 17Mɛ ɖokpó ká ɖo ahwan ɔ́ mɛ, bó ɖɔ nú Jezu ɖɔ: “Mɛ̌si, un kplá vǐ ce wá nú we, nú a nǎ gbɔ azɔn n'i; ɖó yɛ e ɖo jǐ tɔn ɔ́ zɔ́n bɔ é nɔ́ sixú ɖɔ xó ǎ. 18Nǔ ɔ́ wá n'i lě ɔ́, yɛ ɔ́ nɔ́ sɔ́ ɛ hu dó ayǐ, bɔ é nɔ́ jɛ afúntúnkplɔ̌ tún jí, bó nɔ́ jɛ aɖǔkún ɖu jí, lobo nɔ syɛ́n bǐ. Un sa vo nú ahwanvú towe lɛ́ɛ ɖɔ yě ní nya yɛ ɔ́ sín jǐ tɔn, yě ká kpé wú ǎ.” 19Jezu ka ɖɔ nú yě ɖɔ: “Mi nǔmaɖitɔ́ élɔ́ lɛ́ɛ mi, hwetɛ́nu wɛ mi ka ná wá se nǔ e ɖɔ nú mi wɛ un ɖe é dó? Xwe nabí wɛ un ka na kplɔ́n nǔ mi xɔ? Mi bo yi kplá vǐ ɔ́ wá nú mì.” 20Bɔ yě kplá ɛ wá n'i. Ée yɛ ɔ́ mɔ Jezu tlóló lě ɔ́, é húnhún vǐ ɔ́ syɛ́nsyɛ́n, bó sɔ́ ɛ hudɛ́, bɔ é jɛ gbo blí jí, bó jɛ afúntúnkplɔ̌ tún jí. 21Jezu ka kanbyɔ́ vǐtɔ́ ɔ́ ɖɔ: “Sín hwetɛ́nu wɛ nǔ ɔ́ ká jɛ wiwa ɛ jí?” Bɔ é yí gbe ɖɔ: “Sín vǔ wɛ é ko bɛ́ n'i sín; 22bɔ azɔn mɔ̌kpán wɛ yɛ ɔ́ kó kpíkpé e dó myɔ mɛ, bó kpíkpé e dó tɔ mɛ, bó ɖo nǎ hu i wɛ. Lo ɔ́, ényí a kpé nǔɖé wú bó ná wa ɖo azɔn énɛ́ ɔ́ wú hǔn, kɛnklɛ́n kú nǔbláwǔ mǐtɔn bó dó alɔ mǐ.” 23Jezu yí gbe n'i ɖɔ: “Ani ka nyí a kpé nǔɖé wú tɔn bɔ a ɖɔ? Mɛ e ɖi nǔ ɔ́ kpé nǔ bǐ wú.” 24Tlóló ɔ́, vǐtɔ́ ɔ́ sú xó, bó ɖɔ: “Un ɖi nǔ, ka bló bónú má lɛ́ ɖi nǔ hú mɔ̌.”

25Jezu mɔ mɛ lɛ́ɛ nyi ahwan jǎwe, bó jɛ adǎn wa dó yɛ nyanya ɔ́ jí ɖɔ: “Yɛ nyanya tóhunúmɛtɔ́, ɖɛ̌hunúmɛtɔ́, un ɖe gbe dó we, gosín vǐ élɔ́ jí, bó má sɔ́ wá jǐ tɔn ɖě gbeɖé ó.” 26Bɔ yɛ nyanya ɔ́ sú xó, bó húnhún vǐ ɔ́ kpódó zǐngídi kpó, bó gosín jǐ tɔn; bɔ vǐ ɔ́ jɛ ayǐ, bó cí mɛkúkú ɖɔhun, lobɔ mɛ gěgé vɛdó ɖɔ kú wɛ é kú sín. 27Lo ɔ́, Jezu hɛn alɔ tɔn, bó zé e sí te, bɔ é nɔ te.

28Ée Jezu kpódó ahwanvú tɔn lɛ́ɛ kpó wá yi xwé gbe ɔ́, yě kanbyɔ́ ɛ ɖɔ: “Étɛ́wú mǐdɛɛ lɛ́ɛ má ká kpé yɛ nyanya énɛ́ wú bó nya ǎ?” 29Jezu yí gbe nú yě ɖɔ: “Yɛ nyanya mɔ̌hunkɔtɔn lɛ́ɛ ɔ́, ɖɛxixo mɛ jɛ́n wɛ è nɔ sixú kpé yě wú ɖe.”

Jezu lɛ́ vɔ́ ɖɔ émí ná kú bó ná lɛ́ fɔ́n

(Matíe 17.22-23; Luki 9.43-45)

30Jezu kpódó ahwanvú tɔn lɛ́ɛ kpó gosín fínɛ́, bó dín gbɔn Galilée gbé jí. Jezu ka jló nú mɛɖé ní tunwun fí e é ɖe ɔ́ ǎ, 31ɖó hwenɛ́nu ɔ́, é ɖo nǔ kplɔ́n ahwanvú tɔn lɛ́ɛ wɛ ɖɔ: “È nǎ jó nyɛ Gbɛtɔ́ví ɔ́ nú mɛ lɛ́ɛ, bɔ yě ná hu mì, lo ɔ́, azǎn tɔn atɔngɔ́ ɔ́ gbe ɔ́, Mawu ná fɔ́n mì sín kú.” 32Ahwanvú tɔn lɛ́ɛ ka mɔ nǔ jɛ xó énɛ́ mɛ ǎ; yě ka kan nǔɖé byɔ́ ɛ ǎ, ɖó yě ɖo xɛsi ɖi wɛ.

Mɛ̌ wɛ ná ɖu gǎn ɖo mǐ nu?

(Matíe 18.1-5; Luki 9.46-48)

33Jezu kpódó ahwanvú tɔn lɛ́ɛ kpán wá jɛ Kafaanawúmu. Ée yě yi xwé gbe ɔ́, Jezu kanbyɔ́ ahwanvú tɔn lɛ́ɛ ɖɔ: “Ani dɔn wɛ mi ka ɖe hwenu e mǐ ɖo ali jí é?” 34 Yě kɛ nu ǎ, ɖó mɛ e ná ɖu gǎn ɖo yě nu ɔ́ sín nǔ dɔn wɛ yě ɖe ɖo ali jí. 35 Jezu ka jínjɔ́n ayǐ, bó ylɔ́ mɛsɛ́dó tɔn wěwe lɛ́ɛ kplé, bó ɖɔ nú yě ɖɔ: “Mɛ ɖé jló ná ɖu gǎn ɖo mi mɛ hǔn, ní sɔ́ éɖée hwe, bó nyí mɛsɛntɔ́ mɛ bǐ tɔn.” 36Jezu ka yi kplá yɔkpɔ́vú ɖokpó wá tɛ́ntin yětɔn, lobo dɔn ɛ dó wǔ, bó ɖɔ nú yě ɖɔ: 37 “Mɛ e yí yɔkpɔ́vú lěhunkɔtɔn ɖokpó ɖó nyǐkɔ ce mɛ ɔ́, nyɛ ɖésúnɔ wɛ mɛ énɛ́ ɔ́ yí; mɛ e ka yí mì ɔ́, mɛ e sɛ́ mì dó ɔ́ wɛ é yí.”

Mɛ e ma gbɛ́ wǎn nú mǐ ǎ ɔ́, mɛ mǐtɔn wɛ

(Luki 9.49-50)

38Jǎan ɖɔ nú Jezu ɖɔ: “Mɛ̌si, mǐ mɔ mɛɖé bɔ é nɔ́ sɔ́ nyǐkɔ towe dó nya yɛ nyanya lɛ́ɛ ná, bɔ mǐ gbɛ́ n'i, ɖó é ɖo ahwan mǐtɔn mɛ ǎ.” 39Jezu ka yí gbe n'i ɖɔ: “Mi ma gbɛ́ n'i ó, ɖó mɛ ɖěbǔ sixú ylɔ́ nyǐkɔ ce dó jlɛ́ nǔ ná, lobo sí te tlóló, bó ɖɔ nǔ ce nyanya ǎ. 40 Đó mɛ e ma gbɛ́ wǎn nú mǐ ǎ ɔ́, mɛ mǐtɔn wɛ é nyí. 41 Má ɖɔ nǔgbó nú mi: mɛ e ná ná sin kɔ́fu ɖokpó mi, ɖó Klísu tɔn e mi nyí ɔ́ wútu ɔ́, é ná ba ajɔ tɔn kpo ǎ.

Heelú hwɛmɛdɔnmɛdótɔ́ lɛ́ɛ

(Matíe 18.6-9; Luki 17.1-2)

42“Mɛ e ná dɔn yɔkpɔ́vú e ɖi nǔ nú mì lɛ́ɛ ɖokpó dó hwɛ mɛ ɔ́, è gbɔ bo sin sé ɖaxó ɖokpó dó kɔ n'i, bó kpíkpé e dó xu mɛ ɔ́, é nyɔ́ n'i hú. 43 Ényí alɔ towe lɛ́ɛ ɖě ná dɔn we dó nǔ nyanya mɛ hǔn, sɛ́n síin, ɖó a hɛn alɔ ɖokpó yi gbɛ mavɔ mavɔ mɛ ɔ́, é nyɔ́ nú we hú alɔ towe we lɛ́ɛ bǐ sɔgbe ɖo wǔ we, bɔ a ka yi tɔ́n ɖo zojimací mɛ, [ 44fí e ‘wě lɛ́ɛ má nɔ́ kú ɖe ǎ, bɔ zo ma ka nɔ cí ɖe gbeɖé ǎ é.’] 45Nú afɔ towe ná dɔn we dó nǔ nyanya mɛ hǔn, sɛ́n síin; a zɔn afɔ ɖokpó jí, bó byɔ́ gbɛ mavɔ mavɔ mɛ ɔ́, é nyɔ́ nú we hú a zɔn afɔ towe we lɛ́ɛ jí, bɔ è sɔ́ we nyi dó zojimací mɛ, [ 46fí e ‘wě lɛ́ɛ ma nɔ́ kú ɖe ǎ, bɔ zo ma ka nɔ cí ɖe gbeɖé ǎ é.’] 47 Nú nukún towe ka ná dɔn we dó nǔ nyanya mɛ hǔn, ɖe síin; a nyǐ nukún ɖokpónɔ, bó byɔ́ axɔ́súɖuto Mawu tɔn mɛ ɔ́, é nyɔ́ nú we hú nukún towe we lɛ́ɛ bǐ ní ɖo gbɛ, bɔ è ka ná sɔ́ we nyi dó zojimací mɛ, 48 fí e ‘wě lɛ́ɛ ma nɔ́ kú ɖe ǎ, bɔ zo ma ka nɔ cí ɖe gbeɖé ǎ é.’ 49Đó zo wɛ nyí jɛ e è nǎ dó mɛ bǐ é.

50 “Jɛ ɔ́, nǔ ɖagbe wɛ; é ma ka sɔ́ wá ɖó tɔ́n ǎ ɔ́, étɛ́ wɛ è nǎ sɔ́ dó ná ɛ tɔ́n ná? Jɛ ní nɔ lanmɛ nú mi, bónú mi ní mɔ miɖée gbɔ.”

Currently Selected:

Maki 9: Fon13

Highlight

Copy