Maki 1

Jǎan Yɛhwesinlɛnúmɛtɔ́ jlá Mawuxó

(Matíe 3.1-12; Luki 3.1-18; Jǎan 1.19-28)

1Fí e Wɛn Ɖagbe e ɖɔ xó dó Jezu Klísu Mawu ví ɔ́ wú ɔ́ bɛ́ sín ɔ́ ɖíe. 2 Gbeyíɖɔ Mawu tɔn Ezayíi ko wlán ɖ'ayǐ ɖɔ:

“Mawu ɖɔ: ‘Wɛnsagun ce ɖíe un sɛ́ dó e,

bɔ é ná jɛ nukɔn nú we,

bó ná bló ali ɖó nú we.’

3 É ná nɔ́ ɖo xó sú wɛ ɖo gbětótló mɛ, bó ná nɔ́ ɖɔ:

‘Mi bló ali ɖó nú Aklúnɔ,

mi jlɔ́ ali tɔn lɛ́ɛ ɖó.’ ”

4Jǎan Yɛhwesinlɛnúmɛtɔ́ wá, bó nɔ́ ɖo xó sú wɛ ɖo gbětótló mɛ ɖɔ: “Mi lɛ́ kɔ sín hwɛ mitɔn lɛ́ɛ gúdo, bó wá lɛ yɛhwesin, bónú Mawu ná sɔ́ hwɛ mitɔn lɛ́ɛ kɛ mi.”

5Mɛ e ɖo Judée gbé jí lɛ́ɛ bǐ, kpódó mɛ e ɖo Jeluzalɛ́mu lɛ́ɛ kpán nɔ́ wá gɔ̌n tɔn, bó nɔ́ ɖɔ hwɛ yětɔn lɛ́ɛ bǐ, bɔ Jǎan nɔ lɛ yɛhwesin nú yě ɖo Judɛ́ɛn tɔ ɔ́ mɛ.

6 Awu kacakaca ɖé wɛ Jǎan nɔ dó, bɔ è sɔ́ lǎkúnmí sín fún dó lɔn ná, bɔ é nɔ́ sin anyǔgójíblánú. É nɔ́ ɖu wɛn kpódó wǐin akú kpó. 7É nɔ́ ɖo Mawuxó ɔ́ jlá togun lɛ́ɛ wɛ ɖɔ: “Mɛ ɖé ɖo gǔdo ce jǎwe; mɛ énɛ́ ɔ́ hú gǎn mì, bɔ un nyí mɛɖé bó sixú fɛ, bó tún afɔkpakan tɔn lɛ́ɛ vɔ́vɔ́ ǎ. 8Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ; éyɛ́ ká ná sɔ́ Yɛsinsɛn dó lɛ yɛhwesin nú mi.”

Jezu lɛ yɛhwesin, bɔ awǒvi tɛ́n ɛ kpɔ́n

(Matíe 3.13—4.11; Luki 3.21-22; 4.1-13)

9Hwenɛ́nu wɛ Jezu gosín gletoxo e è nɔ ylɔ́ ɖɔ Nazalɛ́ti é mɛ, ɖo Galilée yíkúngban jí wá, bɔ Jǎan lɛ yɛhwesin n'i ɖo Judɛ́ɛn tɔ ɔ́ mɛ. 10Hwenu e Jezu ɖo tɔ ɔ́ mɛ tɔ́n sín wɛ ɔ́ jǐnukúnsin hun, bɔ Yɛsinsɛn cí ahwannɛ́ ɖɔhun bó wá jɛ te dó jǐ tɔn. 11 Bɔ è se gbe ɖé sín jǐxwé, bɔ é ɖɔ: “Vǐ vívɛ́ná wɛ a nyǐ nú mì, bɔ xomɛ nɔ hun mì dó wǔtu towe tlala.”

12Énɛ́ gúdo ɔ́, Yɛ ɔ́ nyi Jezu sɛ́ dó gbětótló mɛ. 13É nɔ fínɛ́ xɔ azǎn kanɖé (40), bɔ Satáan tɛ́n ɛ kpɔ́n. Gběkanlin lɛ́ɛ tɛ́ntin wɛ é nɔ́ nɔ, bɔ Mawu sín wɛnsagun lɛ́ɛ nɔ́ wá gɔ́ alɔ n'i.

Jezu ylɔ́ ɖɔnyitɔ́ ɛnɛ

(Matíe 4.12-22; Luki 4.14-15; 5.1-11)

14Ée è wlǐ Jǎan gúdo ɔ́, Jezu yi Galilée, bó jɛ Wɛn Ɖagbe Mawu tɔn jlá mɛ lɛ́ɛ jí, 15 bó nɔ́ ɖɔ: “Hwe ɔ́ nu ɖíe su e. Axɔ́súɖuɖu Mawu tɔn kó sɛ yá. Mi lɛ́ kɔ sín hwɛ mitɔn lɛ́ɛ gúdo, bó ɖi nǔ nú Wɛn Ɖagbe Mawu tɔn.”

16Jezu ka ɖo Galilée tɔ ɔ́ tó gbɔn wɛ, bó mɔ Sinmɔ́ɔ kpódó nɔví tɔn Andlé kpán ɖo ɖɔ nyi wɛ ɖo tɔ ɔ́ jí; ɖó ɖɔnyitɔ́ wɛ nú yě. 17Jezu ɖɔ nú yě ɖɔ: “Mi xwedó mì. Un ná ná kplɔ́n mi, bɔ mi ná nɔ́ dɔn gbɛtɔ́ lɛ́ɛ, lě e mi nɔ nyi ɖɔ dó wlí hweví gbɔn é.”

18Énɛ́ ɔ́, yě jó ɖɔ yětɔn lɛ́ɛ dó tlóló, bó xwedó e.

19Ée Jezu ná lɛ́ sɛ yi nukɔn kpɛɖé ɔ́, é mɔ Zebeɖée ví we: Jaki kpódó Jǎan kpán, bɔ yě ɖo tɔjíhún mɛ, bó ɖo ɖɔ yětɔn lɛ́ɛ blóɖó wɛ, 20bɔ Jezu ylɔ́ yě tlóló, bɔ yě jó tɔ́ yětɔn Zebeɖée ɔ́ dó nyi tɔjíhún ɔ́ mɛ kpódó azɔ̌watɔ́ lɛ́ɛ kpán, lobo xwedó e.

Jezu nya yɛ nyanya sín dǎwe ɖé jí

(Luki 4.31-37)

21Jezu kpódó ahwanvú tɔn lɛ́ɛ kpó yi Kafaanawúmu; gbɔjɛzán Jwifu lɛ́ɛ tɔn gbe ɔ́, é byɔ́ kplɔ́ngbasá, bó jɛ nǔ kplɔ́n mɛ jí. 22 Nǔkplɔ́nmɛ tɔn nɔ kpácá yě mɛ e ɖo tó ɖó e wɛ lɛ́ɛ, ɖó é nɔ kplɔ́n nǔ mɛ kpódó acɛkpikpa kpán; é cí sɛ́nkplɔ́nmɛtɔ́ lɛ́ɛ ɖɔhun ǎ.

23Hwenɛ́nu ɔ́, dǎwe ɖé ɖo kplɔ́ngbasá ɔ́, bɔ yɛ nyanya ɖo jǐ tɔn; é sú xó, bó ɖɔ: 24“Étɛ́ wɛ mǐ kpó hwi kpó kpédó, Jezu Nazalɛ́tinu? Kún mǐtɔn sú dó gbé wɛ a ja bo wá a? Un tunwun mɛ e a nyǐ é; mɛ mímɛ́ Mawu tɔn wɛ a nyǐ.” 25Jezu ka bɛ́ adǎn dó jǐ tɔn ɖɔ: “Nɔ abwɛ̌, bó gosín dǎwe élɔ́ jí.” 26Bɔ yɛ nyanya ɔ́ húnhún dǎwe ɔ́ syɛ́nsyɛ́n, bó gosín jǐ tɔn, lobo sú xó ɖaxó ɖé. 27É kpácá yě bǐ bɔ yě nɔ́ kanbyɔ́ yěɖée ɖɔ: “Ani ka ɖíe? Nǔkplɔ́nmɛ alɔkpa vo ɖíe mɛ! É nɔ́ ɖe gbe dó yɛ nyanya lɛ́ɛ, kpódó acɛkpikpa kpán, bɔ yě nɔ́ se gbe n'i.”

28Azɔn ɖokpó ɔ́, nyǐkɔ tɔn gba kpé Galilée gbé ɔ́ bǐ jí.

Jezu gbɔ azɔn nú azinzɔnnɔ gěgé

(Matíe 8.14-17; Luki 4.38-41)

29Ée Jezu tɔ́n sín kplɔ́ngbasá Jwifu lɛ́ɛ tɔn ɔ́, é kpódó Jaki kpó, kpódó Jǎan kpán wá yi Sinmɔ́ɔ kpódó Andlé kpán sín xwé gbe. 30Avivɔ ka ɖo Sinmɔ́ɔ sín asinɔ jí, bɔ é ɖo ayǐmlɔ́mlɔ́; ée Jezu wá lě tlóló ɔ́, yě ɖɔ xó tɔn nú Jezu. 31Jezu sɛ yá azinzɔnnɔ ɔ́, bó hɛn alɔ tɔn, bó sɔ́ ɛ sí te; tlóló ɔ́, avivɔ ɔ́ kɔ́n n'i, bɔ é jɛ jǒnɔ yětɔn yí jí.

32Gbadanu hwenu e hwe ɖo xɔ yi wɛ ɔ́, è kplá azinzɔnnɔ lɛ́ɛ bǐ, kpódó mɛ e jí yɛ nyanya ɖe lɛ́ɛ kpó wá nú Jezu, 33bɔ to ɔ́ bǐ sésé wá kplé ɖo xwé e gbe Jezu ɖe ɔ́ sín hɔntogbó jí. 34Jezu gbɔ azɔn tɛnmɛ tɛnmɛ nú azinzɔnnɔ gěgé, bó nya yɛ nyanya gěgé. É ka lɔn nú yɛ nyanya lɛ́ɛ ní ɖɔ xó ǎ, ɖó yě tunwun mɛ e é nyí ɔ́.

Jezu gbɔn Galilée gbé ɔ́ jí

(Luki 4.42-44)

35Jezu fɔ́n zǎn ayǐtéhɔ̌nnu, bó tɔ́n yi fí e mɛɖé ma ná dó tagba n'i ɖe ǎ é, bó xo ɖɛ ɖo fínɛ́. 36Sinmɔ́ɔ kpódó gbɛ̌ tɔn lɛ́ɛ kpó ká jɛ gbě tɔn mɛ. 37Hwenu e yě wá yi mɔ ɛ ɔ́, yě ɖɔ n'i ɖɔ: “Mɛ lɛ́ɛ bǐ wɛ ɖo biba we wɛ.” 38É ka ɖɔ nú yě ɖɔ: “Mi nú mǐ ná gosín fí bó ná yi to e sɛkpɔ́ fí lɛ́ɛ mɛ, nú má yi jlá Mawuxó ɖo fí énɛ́ lɛ́ɛ lɔmɔ̌, ɖó nǔ e wú un tɔ́n é nɛ́.” 39 Bɔ é gbɔn Galilée to ɔ́ bǐ mɛ, bó nɔ́ jlá Mawuxó ɖo kplɔ́ngbasá lɛ́ɛ, bó nɔ́ nya yɛ nyanya sín mɛ lɛ́ɛ jí.

Jezu gbɔ azɔn nú nya gudunɔ ɖé

(Matíe 8.1-4; Luki 5.12-16)

40Nya gudunɔ ɖé wá Jezu gɔ́n, bó jɛ kpo ɖo nukɔn tɔn, bó ɖɔ: “Nú é jló we ɔ́, a hɛn ɔ́, a nǎ gbɔ azɔn nú mì.” 41Nǔ tɔn ka blá wǔ nú Jezu, bɔ é dlɛ́n alɔ, bó ɖó wǔ tɔn bó ɖɔ: “Un jló, azɔn towe ní gbɔ.” 42Tlóló ɔ́, azɔn tɔn gbɔ, bɔ wútu tɔn jɛ te. 43-44 Jezu ɖɔ xó n'i kpódó adǎn kpó ɖɔ: “Đǒtó mì ganjí! Ma ɖɔ nú mɛɖé ó; lo ɔ́, sɔ́ lě e a ɖe ɔ́ yi xlɛ́ vɔ̌sánú-xwlémawutɔ́ lɛ́ɛ, bó ná wǔsláslá sín agban e xó Mɔyízi ɖɔ ɔ́, bónú yě ná dó tunwun ɖɔ azɔn towe gbɔ nǔgbó.” Énɛ́ ɔ́ gúdo ɔ́, é nyi i. 45Lo ɔ́, ée nya énɛ́ ɔ́ ɖidó ɔ́, é jɛ nǔ e Jezu wa n'i ɔ́ jlá jí gbɔn fí bǐ; énɛ́ ɔ́ wú wɛ Jezu ma sɔ́ sixú yi toxo ɖé mɛ ǎ. É gbɔ bó yi cí fí e mɛɖé ma ɖe ǎ é, bɔ mɛ lɛ́ɛ nɔ gosín fí tɛnmɛ tɛnmɛ wá mɔ ɛ.

Currently Selected:

Maki 1: Fon13

Highlight

Copy