Matíe 9

Jezu gbɔ azɔn nú ayǐsónɔ ɖé

(Maki 2.1-12; Luki 5.17-26)

1Jezu byɔ́ tɔjíhún ɖé mɛ, bó lɛ́ kɔ gbɔn fí ɖokpó ɔ́ wá to tɔn mɛ. 2Ayǐsónɔ ɖé ka ɖo ayǐmlɔ́mlɔ́ ɖo zan jí, bɔ è zě e wá n'i. Ée Jezu mɔ lě e yě ɖi nǔ sɔ ɔ́, é ɖɔ nú azinzɔnnɔ ɔ́ ɖɔ: “Vǐ ce, ɖǒ akɔ́nkpinkpan; è sɔ́ hwɛ towe lɛ́ɛ kɛ we.”

3Ée sɛ́nkplɔ́nmɛtɔ́ lɛ́ɛ se xó énɛ́ ɔ́, yě jɛ ɖiɖɔ dó xomɛ jí ɖɔ: “Nya élɔ́ ɖo nu nylá dó Mawu wú wɛ.”

4Jezu mɔ nǔ jɛ nǔ e lin wɛ yě ɖe ɔ́ wú, bó ɖɔ nú yě ɖɔ: “Étɛ́wú mi ka ɖo nǔ nyanya mɔ̌hunkɔtɔn lɛ́ɛ lin wɛ? 5Ényí è ɖɔ: ‘È sɔ́ hwɛ towe lɛ́ɛ kɛ we,’ abǐ: ‘Sí te bó ɖi zɔnlin’ ɔ́, ɖě tɛ́ wɛ ka bɔkun hú ɖě? 6Lo ɔ́, un jló ɖɔ mi ní tunwun ɖɔ nyɛ Gbɛtɔ́ví ɔ́ ɖó acɛ e sɔ́ hwɛ kɛ mɛ ɖo ayǐkúngban jí ɔ́.” Ée é ɖɔ mɔ̌ ɔ́, é ɖɔ nú ayǐsónɔ ɔ́ ɖɔ: “Sí te, sɔ́ zan towe, bó yi xwé.”

7Bɔ nya ɔ́ sí te, bó ɖidó xwé tɔn gbe. 8Ée mɛ lɛ́ɛ mɔ nǔ e jɛ énɛ́ ɔ́, xɛsi jɛ yě jí, bɔ yě jɛ susu kpa nú Mawu jí, ɖó acɛ mɔ̌hunkɔtɔn e é ná gbɛtɔ́ lɛ́ɛ ɔ́ wú.

Jezu ylɔ́ Matíe

(Maki 2.13-17; Luki 5.27-32)

9Ée Jezu gosín fínɛ́ ɔ́, é ɖidó, bó sɛ yi zaan, bó mɔ nya tokwɛ́yítɔ́ ɖé ɖo ayǐjínjɔ́n ɖo denuzɔ́watɔ́ lɛ́ɛ xɔsá. Nya ɔ́ nɔ nyí Matíe. Jezu ɖɔ n'i ɖɔ: “Xwedó mì;” bɔ é sí te, bó xwedó e.

10 Jezu ka wá ɖo nǔ ɖu wɛ, ɖo Matíe xwé, bɔ tokwɛ́yítɔ́ lɛ́ɛ gěgé, kpódó hwɛhutɔ́ ɖěvo lɛ́ɛ kpó wá ɖo nǔ ɖu xá é kpódó ahwanvú tɔn lɛ́ɛ kpán wɛ. 11Ée Falizyɛn lɛ́ɛ mɔ mɔ̌ ɔ́, yě ɖɔ nú ahwanvú tɔn lɛ́ɛ ɖɔ: “Aniwútu wɛ Mɛ̌si mitɔn nɔ ɖu nǔ xá tokwɛ́yítɔ́ lɛ́ɛ kpódó hwɛhutɔ́ ɖěvo lɛ́ɛ kpó?”

12Jezu ka se xó e ɖɔ wɛ yě ɖe ɔ́, bó ɖɔ: “Mɛ e ɖo ganjí lɛ́ɛ wɛ azɔngblétɔ́ nú hu dó ǎ; lo ɔ́, mɛ e ɖo azɔn jɛ wɛ lɛ́ɛ wɛ nǔ tɔn hu dó. 13 Mi yi ba do nú nǔ e ɖɔ wɛ Mawuxó élɔ́ ɖe ɔ́: ‘Nǔbláwǔkúnúmɛ ba wɛ un ɖe; vɔ̌sísá ba wɛ un ɖe ǎ.’ Ɖó hwɛjijɔnɔ lɛ́ɛ ylɔ́ gbé wɛ un wá ǎ; lo ɔ́, hwɛhutɔ́ lɛ́ɛ ylɔ́ gbé wɛ un wá.”

Jezu ɖɔ xó dó nubláblá wú

(Maki 2.18-22; Luki 5.33-39)

14Énɛ́ gúdo ɔ́, Jǎan Yɛhwesinlɛnúmɛtɔ́ ɔ́ sín ahwanvú lɛ́ɛ sɛ yá Jezu, bó kanbyɔ́ ɛ ɖɔ: “Étɛ́wútu mǐdɛɛ lɛ́ɛ kpódó Falizyɛn lɛ́ɛ kpó nɔ ɖo nu blá wɛ hwɛhwɛ, bɔ ahwanvú towe lɛ́ɛ ma ka nɔ́ blá nu ǎ?”

15Jezu ka yí gbe nú yě ɖɔ: “Mɛ e è ylɔ́ wá alɔ wlíwlí tɛnmɛ lɛ́ɛ sixú nɔ aluwɛ mɛ hwenu e asisúnɔ ɔ́ ɖo kpɔ́ xá yě ɔ́ ǎ; nǔ sixú nyí mɔ̌ ǎ; amɔ̌, hwenu ná wá su bɔ è nǎ wá zé asisúnɔ ɔ́ gǎnnugǎnnu sín yě gɔ̌n; hwe énɛ́ nu ɔ́, yě ná blá nu.

16“Mɛ ɖé nɔ́ sɔ́ avɔxwɛ yɔ̌yɔ́ e ma yi sin mɛ kpɔ́n ǎ é dó ɖɛ́ awu xóxó ná ǎ; ɖó avɔxwɛ yɔ̌yɔ́ ɔ́ ná lɛ́ dɔn awu xóxó ɔ́ vún, bɔ tlɛ́ntlɛ́nkpa ɔ́ ná gbló d'é jí. 17Mɔ̌ ɖokpó ɔ́, mɛɖé nɔ́ sɔ́ vɛ̌ɛn yɔ̌yɔ́ kɔn dó anyǔglo xóxó mɛ ǎ; é ma nyí mɔ̌ ǎ ɔ́, anyǔglo ɔ́ ná wú, bɔ vɛ̌ɛn ɔ́ kpódó anyǔglo ɔ́ kpó bǐ ná lá mɛ. Lo ɔ́, vɛ̌ɛn yɔ̌yɔ́ ɔ́, anyǔglo yɔ̌yɔ́ mɛ wɛ è nɔ kɔn dó, bɔ vɛ̌ɛn ɔ́ kpódó anyǔglo ɔ́ kpó bǐ nɔ́ nɔ ganjí.”

Ɖyɔ̌vǐvú ɖé kú, bɔ Jezu fɔ́n ɛ, bó lɛ́ gbɔ azɔn nú nǎwe ɖé

(Maki 5.21-43; Luki 8.40-56)

18Hwenu e Jezu kpo ɖo xó énɛ́ lɛ́ɛ ɖɔ nú yě wɛ ɔ́, Jwifu lɛ́ɛ sín gǎn ɖokpó wá jɛ kpo ɖo nukɔn tɔn, bó ɖɔ: “Vǐ ce nyɔ̌nu kú din tlóló; wǎ yi ɖó alɔ jǐ tɔn, énɛ́ ɔ́, é ná fɔ́n.”

19Nǔgbó ɔ́, Jezu sí te, bɔ é kpódó ahwanvú tɔn lɛ́ɛ kpó xwedó e.

20Nǎwe ɖé ká ɖo hun ɖi wɛ sín xwe wěwe ɖíe ɖokpóó; nǎwe ɔ́ sɛkpɔ́ Jezu gbɔn gúdo, bó ɖó alɔ awu tɔn tó, 21ɖó é ɖo ɖiɖɔ dó ayi mɛ wɛ ɖɔ: “Un vɛ́ ko sixú ɖó alɔ awu tɔn tó kpowun ɔ́, azɔn ce ná gbɔ.”

22Jezu ka lɛ́ kɔ bó mɔ ɛ, bó ɖɔ n'i ɖɔ: “Vǐ ce, ɖǒ akɔ́nkpinkpan, nǔɖiɖi towe zɔ́n bɔ azɔn towe gbɔ .” Tlóló ɔ́, azɔn gbɔ nú nyɔ̌nu ɔ́.

23Ée Jezu wá gǎn ɔ́ xwé ɔ́, é mɔ kpetekúntɔ́ e wá cyɔ ɔ́ nu lɛ́ɛ, bó lɛ́ mɔ mɛ gěgé ɖo fínɛ́, bɔ yě ɖo zǐngídi ɖú wɛ. É ɖɔ nú yě ɖɔ: 24“Mi tɔ́n sín fí, ɖó ɖyɔ̌vǐvú ɔ́ kú ǎ, amlɔ dɔ́ wɛ é ɖe.” Bɔ mɛ lɛ́ɛ ka jɛ kiko e jí. 25Ée è ɖe mɛ lɛ́ɛ tɔ́n ɔ́, Jezu byɔ́ xɔ ɔ́ mɛ, bó hɛn vǐ ɔ́ sín alɔ, bɔ vǐ ɔ́ fɔ́n sí te. 26Nǔ énɛ́ e jɛ ɔ́ gba kpé gbě nɛ́ ɔ́ bǐ jí.

Jezu hun nukún nú nukúntíntɔ́nnɔ we

27Ée Jezu gosín fínɛ́, bó xweyǐgbe ɔ́, nukúntíntɔ́nnɔ we ɖé lɛ́ɛ xwedó e; yě ɖo xó sú wɛ bó nɔ́ ɖɔ: “Kú nǔbláwǔ nú mǐ, Davídi ví.”

28Ée Jezu wá xwé gbe ɔ́, nukúntíntɔ́nnɔ lɛ́ɛ sɛkpɔ́ ɛ, bɔ é kanbyɔ́ yě ɖɔ: “Mi ɖi ɖɔ un hɛn ɔ́, un ná hun nukún nú mi a?” Yě yí gbe n'i ɖɔ: “Ɛɛn Aklúnɔ.”

29Ée yě ɖɔ mɔ̌ ɔ́, Jezu ɖó alɔ nukún yětɔn lɛ́ɛ wú, bo ɖɔ: “Nǔ e mi ɖi ɔ́ ní nyí gbɔn mɔ̌ nú mi.”

30Bɔ nukún yětɔn lɛ́ɛ hun. Jezu ka dó sɛ́n nú yě syɛ́nsyɛ́n ɖɔ: “Mi cɔ́ miɖée, nú mɛ ɖěbǔ ní ma se ɖo nu mitɔn ó.” 31Lo ɔ́, ée yě tɔ́n ɔ́, yě jɛ nǔ e Jezu wa ɔ́ jlá jí gbɔn gbě ɔ́ bǐ jí.

Jezu gbɔ azɔn nú ɖɛ̌kúnánɔ ɖé

32Yiyi wɛ mɛ énɛ́ lɛ́ɛ ɖe kɛ́ɖɛ́ bɔ è kplá nya ɖé wá nú Jezu, bɔ é nɔ́ sixú ɖɔ xó ǎ, ɖó yɛ nyanya ɖo jǐ tɔn. 33Ée Jezu nya yɛ nyanya ɔ́ sín ɖɛ̌kúnánɔ ɔ́ jí ɔ́, é jɛ xó ɖɔ jí. Nǔ énɛ́ ɔ́ kpácá mɛ lɛ́ɛ ɖésú, bɔ yě nɔ́ ɖɔ: “Mǐ mɔ nǔ lěhunkɔtɔn kpɔ́n gbeɖé ɖo Izlayɛ́li ǎ.”

34 Lo ɔ́, Falizyɛn lɛ́ɛ ɖɔ: “Yɛ nyanya lɛ́ɛ xɔ́sú sín hlɔ̌nhlɔ́n wɛ é nɔ dó nya yɛ nyanya lɛ́ɛ ná.”

Gbɛtɔ́ lɛ́ɛ sín nǔ blá wǔ nú Jezu

35 Jezu nɔ ɖo toxo ɖaxó lɛ́ɛ bǐ kpódó gletoxo lɛ́ɛ bǐ kpó mɛ gbɔn wɛ, bó nɔ́ ɖo nǔ kplɔ́n mɛ wɛ gbɔn kplɔ́ngbasá Jwifu lɛ́ɛ tɔn, bó nɔ́ ɖo axɔ́súɖuɖu Mawu tɔn sín Wɛn Ɖagbe jlá wɛ; lobo nɔ ɖo azɔn alɔkpa alɔkpa lɛ́ɛ, kpódó wɔ̌nzɔn lɛ́ɛ kpó gbɔ wɛ. 36 Ée Jezu mɔ mɛ énɛ́ lɛ́ɛ ɔ́, nǔ yětɔn blá wǔ n'i, ɖó é mɔ ɖɔ nǔ gbɛ́ dó yě, bɔ wǔ kú yě, bɔ yě cí lɛ̌ngbɔ́ e ma ɖó nyinyitɔ́ ǎ lɛ́ɛ é ɖɔhun, 37 bɔ é ɖɔ nú ahwanvú tɔn lɛ́ɛ ɖɔ: “Nǔkún ɖo kpɔ́ gégé ɖo gle mɛ; nǔkún-yatɔ́ lɛ́ɛ ka nyí kpɛɖé. 38Mi bo sa vo nú jinukúnnɔ ɔ́, nú é sɛ́ azɔ̌watɔ́ dó jinukúngbo tɔn mɛ.”

Currently Selected:

Matíe 9: Fon13

Highlight

Copy