Matíe 14

È hu Jǎan Yɛhwesinlɛnúmɛtɔ́

(Maki 6.14-29; Luki 9.7-9)

1Hwenɛ́nu ɔ́, tokpɔngán Elódu se nǔwiwa Jezu tɔn lɛ́ɛ, 2bó ɖɔ nú mɛsɛntɔ́ tɔn lɛ́ɛ ɖɔ: “Jǎan Yɛhwesinlɛnúmɛtɔ́ ɔ́ wɛ; é fɔ́n sín mɛkúkú lɛ́ɛ mɛ; énɛ́ wútu wɛ é ɖó hlɔ̌nhlɔ́n, bó ɖo nǔ énɛ́ lɛ́ɛ jlɛ́ wɛ.”

3-4 Ɖó tokpɔngán Elódu yí nɔví tɔn Filípu sín asi e è nɔ ylɔ́ ɖɔ Elodiadi ɔ́, bó da. Jǎan ka ɖɔ n'i ɖɔ: “Sɛ́n ɔ́ ná gbe we ɖɔ a nǐ da ɛ ǎ.” Xó énɛ́ e Jǎan ɖɔ n'i ɔ́ wɛ zɔ́n, bɔ é wlí i, bó blá ɛ, bó zé e dó gankpá mɛ, 5bó jló ná hu i; lo ɔ́, é ɖo xɛsi ɖi nú togun ɔ́ wɛ, ɖó togun ɔ́ nɔ́ mɔ Jǎan dó mɔ gbeyíɖɔ Mawu tɔn ná.

6Gbe ɖokpó ka wá su, bɔ Elódu ɖo jijizán tɔn sín xwe ɖu wɛ; Elodiadi sín vǐ ɖyɔ̌vǐ ɔ́ ka wá ɖú we ɖo jǒnɔ lɛ́ɛ nukɔn. We tɔn nyɔ́ Elódu nukún mɛ, 7bɔ é dó akpá nú vǐ ɖyɔ̌vǐ ɔ́, bo xwlé nǔ d'é jí ɖɔ é byɔ́ nǔ ɖěbǔ ɔ́, émí ná ná ɛ. 8Vǐ ɔ́ sín nɔ ka kplɔ́n nǔ i bɔ é ɖɔ: “Nǎ Jǎan Yɛhwesinlɛnúmɛtɔ́ ɔ́ sín ta mì dó gannúgbɛ́jɛ́ mɛ ɖo fí din tlóló.”

9Ée é ɖɔ mɔ̌ ɔ́, wǔ kú gǎn ɔ́; lo ɔ́, ée é kó dó akpá, bó xwlé nǔ d'é jí ɖo jǒnɔ lɛ́ɛ nukɔn ɔ́, é ná gbe 10ɖɔ è nǐ yi gbo Jǎan sín ta ɖo gankpá mɛ wá n'i. 11Bɔ è yi gbo ta tɔn dó gannúgbɛ́jɛ́ mɛ wá nú ɖyɔ̌vǐ ɔ́, bɔ é sɔ́ yi jó nú nɔ tɔn. 12Jǎan sín ahwanvú lɛ́ɛ wá sɔ́ cyɔ tɔn bó yi ɖi, bó ká yi ɖɔ nǔ e jɛ ɔ́ nú Jezu.

Jezu ná nǔɖuɖu gbɛtɔ́ děgba ɖě afatɔ́n (5.000)

(Maki 6.30-44; Luki 9.10-17; Jǎan 6.1-14)

13Ée Jezu se ɖɔ Jǎan Yɛhwesinlɛnúmɛtɔ́ ɔ́ kú ɔ́, é byɔ́ tɔjíhún ɖé mɛ, bó ɖidó zɔ fí e mɛɖé ma ná mɔ ɛ ɖe ǎ é. Ahwan ɔ́ ka wɔ́ fí e é xwe ɔ́, bó gosín to lɛ́ɛ mɛ to lɛ́ɛ mɛ, bó zɔn afɔ jɛ gǔdo tɔn. 14Ée Jezu wá tɔ́n sín tɔjíhún ɔ́ mɛ ɔ́, é mɔ gbɛtɔ́ wɔ̌buwɔ́bú ɖé lɛ́ɛ; nǔ yětɔn blá wǔ n'i, bɔ é gbɔ azɔn nú azinzɔnnɔ e ɖo yě mɛ lɛ́ɛ.

15Ée gbadanu wá su ɔ́, ahwanvú Jezu tɔn lɛ́ɛ sɛ yá ɛ, bó ɖɔ n'i ɖɔ: “Fí e mǐ ɖe ɖo fí ɔ́ yá dó toxo ɖěbǔ ǎ; zǎn ɖíe ká ɖo kúkú wɛ e; gbɔ bo nyi mɛ lɛ́ɛ, bónú yě ná yi ba nǔɖé ɖu ɖo gletoxo lɛ́ɛ mɛ.”

16Jezu ka yí gbe nú yě ɖɔ: “Yě ɖó ná yi gbɔn mɔ̌ ǎ; mi ɖésúnɔ mi ná nǔɖuɖu yě.”

17Lo ɔ́, yě ɖɔ n'i ɖɔ: “Wɔ̌xúxú atɔ́ɔ́n kpódó hweví we kpó jɛ́n ɖo mǐ sí.” 18Jezu ka ɖɔ nú yě ɖɔ: “Mi bɛ́ yě wá nú mì.”

19Bɔ é ɖe gbe nú mɛ lɛ́ɛ, bɔ yě jínjɔ́n gběhan jí. É fɔ wɔ̌xúxú atɔ́ɔ́n lɛ́ɛ, kpódó hweví we lɛ́ɛ kpán, bó kpɔ́n jǐ, bó dó kú nú Tɔ́ ɔ́. Énɛ́ ɔ́ gúdo ɔ́, é kán wɔ̌xúxú lɛ́ɛ, lobo bɛ́ nú ahwanvú tɔn lɛ́ɛ, bɔ yě má nú mɛ lɛ́ɛ. 20Yě bǐ ɖu nǔ, bó gɔ́ xo, bɔ è kplé nǔɖuɖu e kpo ɔ́, bɔ é gɔ́ xasun wěwe. 21Mɛ e ɖu nǔ lɛ́ɛ ka yi gbɛtɔ́ děgba ɖě afatɔ́n (5.000); è ka xa nyɔ̌nu lɛ́ɛ kpódó yɔkpɔ́vú lɛ́ɛ kpó ǎ.

Jezu ɖi zɔnlin gbɔn tɔ jí

(Maki 6.45-52; Jǎan 6.15-21)

22Énɛ́ gúdo tlóló ɔ́, Jezu ɖɔ nú ahwanvú tɔn lɛ́ɛ ɖɔ hwenu e émí ná ɖo mɛ lɛ́ɛ nyi sɛ́ dó xwé wɛ ɔ́, yědɛɛ lɛ́ɛ ní byɔ́ tɔjíhún ɔ́ mɛ, bó jɛ nukɔn ɖidó agě ɖě ɔ́ jǐ. 23Ée Jezu nyi mɛ lɛ́ɛ sɛ́ dó xwé ɔ́, é wá yi xá só ɖé jí, bó ná yi xo ɖɛ. Zǎn kú, bɔ é kpo é ɖokpónɔ géé ɖo fínɛ́. 24Tɔjíhún ɔ́ ko sɛ yi xuzan mɛ, bɔ xu ɔ́ nɔ xo wá gba kɔn nyi wú, ɖó hǔn ɔ́ ɖo jɔhɔn kpé wɛ. 25Sín gan atɔn sɔ́ yi gan ayizɛ́n mɛ ayǐtéhɔ̌nnu mɔ̌ ɔ́, Jezu ɖi zɔnlin gbɔn xu ɔ́ jí, bó ɖidó yě gɔ̌n. 26Ée ahwanvú tɔn lɛ́ɛ mɔ ɛ ɖo zɔnlin ɖi wɛ gbɔn xu jí ɔ́, ayi yětɔn gbadó, bɔ yě ɖɔ: “Nǔ ɖíe kpé wɛ mǐ ɖe e!” Énɛ́ ɔ́, xɛsi jɛ yě jí, bɔ yě sú xó. 27Jezu ka ɖɔ nú yě tlóló ɖɔ: “Mi kpan akɔ́n, nyɛ wɛ; mi ma ɖi xɛsi ó.”

28Piyɛ́ɛ ka ɖɔ n'i ɖɔ: “Aklúnɔ, ényí hwi jɛ́n wɛ nǔgbó hǔn, bo ɖe gbe nú ma ɖi zɔnlin gbɔn tɔ ɔ́ jí wá kpé we.” 29Bɔ Jezu ɖɔ n'i ɖɔ: “Wǎ!”

Piyɛ́ɛ ka tɔ́n sín tɔjíhún ɔ́ mɛ, bó jɛ zɔnlin ɖi jí, bó ɖidó Jezu gɔ́n. 30Lo ɔ́, ée Piyɛ́ɛ mɔ ɖɔ jɔhɔn ɔ́ ɖo syɛ́nsyɛ́n d'é jí wɛ ɔ́, xɛsi jɛ jǐ tɔn, bɔ é jɛ do yi jí, bó sú xó bó ɖɔ: “Aklúnɔ, hwlɛ̌n mì!” 31Tlóló ɔ́, Jezu dlɛ́n alɔ, bó hɛn ɛ, bó ɖɔ n'i ɖɔ: “Nǔɖiɖihwedónánɔ, étɛ́wú wɛ a xo nǔ kpɔ́n?” 32Bɔ yě byɔ́ tɔjíhún ɔ́ mɛ, bɔ jɔhɔn ɔ́ xwɛ. 33Mɛ e ɖo tɔjíhún ɔ́ mɛ lɛ́ɛ wá jɛ kpo ɖo Jezu nukɔn, bó ɖɔ: “Mawu ví wɛ a nyǐ nǔgbó.”

Jezu gbɔ azɔn nú azinzɔnnɔ lɛ́ɛ ɖo Jenɛzalɛ́ti gbé jí

(Maki 6.53-56)

34Ée yě jɛ agě ɖě ɔ́ jí ɔ́, yě jɛ Jenɛzalɛ́ti sín ayǐkúngban jí. 35Mɛ e ɖo fínɛ́ lɛ́ɛ ka mɔ ɖɔ Jezu wɛ wá, bó sɛ́ wɛn dó mɛ e ɖo toxo ɔ́ mɛ lɛ́ɛ bǐ, bɔ yě kplá azinzɔnnɔ lɛ́ɛ bǐ wá n'i; 36énɛ́ ɔ́, è sa vo n'i ɖɔ é ní ná gbe yě nú yě vɛ́ kó ɖó alɔ awu tɔn tó kpowun; bɔ azinzɔnnɔ e ɖó alɔ awu tɔn tó lɛ́ɛ bǐ sín azɔn gbɔ.

Currently Selected:

Matíe 14: Fon13

Highlight

Copy