Zakarías 9
9
Israel lo no tin nada di teme di e pueblonan bisiña
1Mensahe di SEÑOR:
SEÑOR ta papia ku e pais Hadrak, su palabra ta zona na Damasko tambe.#Isaías 17:1-3; Yeremías 49:23-27; Amos 1:3-5 Pasobra no ta riba tribunan di Israel so E ta fiha su bista, pero riba tur hende. 2Su palabranan ta dirigí na Hamat tambe, ku tin frontera ku Damasko, i na Tiro i Sidon,#Isaías 23:1-18; Ezekiel 26:1—28:26; Yoel 3:4-8; Amos 1:9-10; Mateo 11:21-22; Lukas 10:13-14 maske kon sabí nan ta. 3Habitantenan a hasi Tiro un fòrti. Oro i plata ku nan a stiwa ta mes komun ku stòf i sushi riba kaya. 4Pero SEÑOR lo kita loke e siudat ta poseé fo'i dje i basha su murayanan den laman; e siudat mes lo kima den kandela.
5Ora habitantenan di Ashkelon mira esaki, miedu lo poderá di nan. Gaza lo tembla manera bara bèrdè i Ekron lo pèrdè tur speransa. E rei ta disparsé for di Gaza, Ashkelon ta keda despoblá i 6strañeronan ta bin biba na Ashdod. ‘T'asina Mi ta bai kibra orguyo dje filisteonan,’ SEÑOR ta bisa.#Isaías 14:29-31; Yeremías 47:1-7; Ezekiel 25:15-17; Yoel 3:4-8; Amos 1:6-8; Sofonías 2:4-7 7Mi ta bai ranka karni ku sanger aden fo'i den nan boka i e kuminda ku Mi ta repudiá tambe. E filisteonan ku sobrebibí, lo pertenesé na nos Dios. Nan lo bira un famia den tribu di Huda; lo toka e habitantenan di Ekron e mesun destino ku e yebusitanan.#Yozue 15:63
8‘Mi ta tene warda den mi pais,’ SEÑOR ta bisa, ‘pa Mi proteg'é kontra ehérsitonan ku ta pasa dor di dje. Niun hende no ta bin oprimié mas, pasobra t'Ami mes ta kuid'é.’
E rei ku ta trese pas
9Basha gritu di legria, mi yu Herusalèm,
hubilá, mi yu Sion!
Pasobra ata bo rei#Sofonías 3:14-15 ta bini serka bo,
E ta hustu i triunfante,
E ta humilde, sintá riba un buriku,
un buriku machu, di rasa puru.#Mateo 21:5; Huan 12:15
10‘Ami,’ SEÑOR ta bisa,
‘ta bai destruí e garoshinan di guera den teritorio di Efraim
i e kabainan den Herusalèm.’
E ora ei flecha i bog di guera lo ta kibrá
i e rei lo planta pas den pueblonan;
lo e goberná di laman te laman,
di riu Eufrat te na ekstremonan di mundu.#Salmo 72:8
Liberashon di e eksiliadonan
11SEÑOR ta bisa:
‘Pa motibu di mi aliansa ku boso, seyá ku sanger,
Mi ta duna boso libertat,
esnan di boso ku tabata será manera den pos seku.#Éksodo 24:8; Mateo 26:28; Marko 14:24; Hebreonan 9:20
12Prezunan, tin speransa pa boso,
bai Herusalèm bèk,
e fòrti fuerte.
Fo'i djawe Mi ta anunsiá:
Mi ta bai rekompensá boso dòbel pa tur loke a pasa.
13Mi ta usa Huda pa mi bog,
Efraim pa mi flecha.
Mi ta usa bo habitantenan, Herusalèm,
manera spada di un guerero
kontra esnan di bo, Gresia.’
14SEÑOR ta aparesé riba su pueblo;
su flechanan ta kòrta manera welek.
Señor Dios ta supla su kachu
i ta ranka sali den tormenta di zùit.
15SEÑOR soberano ta protegé su pueblo.
Israelitanan ta kaba ku nan enemigu;
su piedr'i chincha no ta yud'é ku nada.
Bou 'i bochincha israelitanan ta bebe su sanger pa biña,
te ora nan bòfi yena
manera skalchi di sakrifisio;
nan kurpa ta tur na sanger
16Asina SEÑOR, nan Dios,
e dia ei lo salba su pueblo,
su trupa di karné.
Nan lo bria den su pais
manera piedra presioso den un korona.
17Esta próspero nan ta, esta bunita!
E yònkumannan, e mucha muhénan ta bona;
trigo i biña ta fortalesé nan.#Yeremías 31:12-13
Currently Selected:
Zakarías 9: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
