Proverbionan 16
16
1Plan ta di hende,
palabra final, di Dios.#Proverbionan 16:9; 19:21; Predikador 9:1
2Tur loke un hende hasi ta bon den su bista,
pero ta SEÑOR ta evaluá intenshonnan.#Proverbionan 21:2
3Pone tur loke bo hasi den man di SEÑOR,#Salmo 37:5
i bo plannan lo realisá.
4Tur kos ku Dios a traha tin motibu di eksistensia,
asta e mal hende pa dia di su kastigu.
5SEÑOR ta repudiá hende orguyoso,
tardi òf trempan e hende ei ta haña su kastigu.
6Un aktitut di fieldat i rektitut ta drecha piká di pasado ku Dios,
bo por evitá di hasi maldat si bo tin rèspèt di SEÑOR.
7Si loke bo hasi ta agradá SEÑOR,
E ta hasi asta bo enemigunan, bo amigu.
8Mihó pober pero honesto,
ku riku anto inhustu.
9Ta na hende pa traha plan,
i na Dios pa dirigí hende su pasonan.#Proverbionan 16:1; 19:21; Predikador 9:1
10Rei ta papia komo representante di Dios,
e n' ta dikta sentensia inhustu.
11SEÑOR ta interesá pa hende usa balansa ku ta pisa eksakto,
ta E mes a fiha e pesonan.
12Reinan ta detestá hasimentu di maldat,
komo nan meta ta: goberná a base di hustisia.
13Reinan ta stima i gusta mira hende
ku ta papia bèrdat sin hasi trastu.
14Rabia di un rei por kosta un hende su bida;
p'esei un hende sabí lo purba plakia e rabia ei.
15Si kara di rei ta alegre, esei ta nifiká bida,
su bondat ta refreskante manera áwaseru.
16Optené sabiduria ta muchu mas mihó ku optené oro,
haña komprondementu ta muchu mas di preferá, ku haña plata.
17Rumbo di hende hustu ta: kita for di kaminda di maldat,
esun ku paga bon tinu kaminda e ta kana, ta salba su bida.
18Orguyo ta kana dilanti di frakaso,
soberbia dilanti di kaida.
19Preferibel biba humilde ku pobernan,
ku parti botin ku hende orguyoso.
20Lo bai hende ku sa skucha Dios su palabra, bon,
bendishoná ta esun ku ta konfia den Dios.
21Ta gaba un hende sabí pa su komprenshon,
un palabra amabel ta konvensé mas lihé.
22Sano huisio ta fuente di bida pa es ku tin e,
pero un hende bobo ta kastigá su mes ku su bobedat.
23For di un kurason sabí palabra sabí ta sali,
un kurason sabí ta kambia pensamentu di hende fásilmente.
24Palabra kariñoso ta e miel den kas di abeha,
dushi pa alma i saludabel pa kurpa.
25Tin kaminda ku parse règt,
pero finalmente nan ta hiba bo na morto.#Proverbionan 14:12; Sirag 21:10
26Apetit di trahadó a stimul'é pa traha
ta su hamber a dun'é un empuhe.
27Mal hende ta brota maldat,
su lenga ta manera kandela.#Hakobo 3:6
28Hende perverso ta kousa pleitu,
hasimentu di redu ta kousa enemistat.
29Ta un hende sin kompashon so ta gaña su amigu
mustr'é kaminda robes.
30Hende ku sera frenta ta pensa maldat pa hasi,
hende ku a hasi maldat kaba ta morde lep.
31Kabei blanku ta un korona digno,
ku bo ta gana ora bo biba segun Dios su palabra.
32Tene pasenshi ta bal mas ku ser balente,
dominá bo mes ta bal mas ku konkistá siudat.
33Hende ta purba suerte,
pero ta SEÑOR ta disidí, kon e piedranan ta kai.
Currently Selected:
Proverbionan 16: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
