Mateo 8

Hesus ta kura un leproso

(Marko 1:40-45; Lukas 5:12-16)

1Hesus a baha for di riba e seru i un laman di hende a siguiÉ. 2Anto a sosodé ku un hòmber ku tabata sufri di lepra, a bini serka Hesus, hinka rudia su dilanti i bis'É: ‘Señor, Bo por kura mi, si Bo ke.’ 3Hesus a saka su man, mishi kuné i bisa: ‘Mi ke, sea kurá.’ Mesora e hòmber a kura di e lepra. 4Hesus a bis'é: ‘Mira pa bo no bai konta niun hende kiko a pasa, ma bai serka saserdote sí i lag'é mira bo. Ofresé e sakrifisio ku Moises a ordená,#Levítiko 14:1-32 pa bo purifikashon. E ora ei tur hende tin prueba ku segun lei bo ta kurá.’

Hesus ta kura kriá di un kapitan romano

(Lukas 7:1-10; Huan 4:43-54)

5Ora Hesus tabata drenta Kafárnao, un kapitan romano a bai kontr'É i a rog'É: 6‘Señor, mi kriá ta na kas, bentá malu riba kama sin por move; e ta sufri teriblemente!’ 7Hesus a kontestá: ‘Mi ta bin kur'é.’ 8Ma e kapitan a bisa: ‘Nò, Señor, mi no ta digno pa Bo drenta mi kas, ma djis bisa un palabra so i mi kriá lo ta kurá. 9Ta asina ku mi mes ta un hòmber bou di outoridat di mi superiornan i ami tin sòldá bou di mi. Si mi bisa un di nan: “Bai!”, e ta bai; i un otro: “Bini!”, anto e ta bini tambe. Mi kriá mi ta bisa: “Hasi tal i tal kos!”, i e ta hasié tambe!’

10Ora Hesus a tende loke e hòmber a bisa, El a keda asombrá i El a bisa e hendenan ku tabata siguiÉ: ‘Mi ta sigurá boso: serka ningun hende den henter Israel Mi no a yega di topa un fe asin'akí. 11Laga Mi bisa boso un kos: hopi lo bini for di ost i for di wèst i sinta kome ku Abraham, Isak i Yakob den reino di shelu.#Lukas 13:29 12Ma lo tira esnan ku supuestamente ta siudadano di e reino den skuridat profundo; aya nan lo yora i morde djente di doló!’#Mateo 22:13; 25:30; Lukas 13:28 13Despues Hesus a bisa e ofisial: ‘Bai numa; lo sosodé manera bo ta kere.’ I na e mes momento ei e kriá a bira bon atrobe.

Hesus ta kura hopi hende

(Marko 1:29-34; Lukas 4:38-41)

14Hesus a bai kas di Pedro i a mira suegra di Pedro drumí malu na kama ku keintura. 15El a kohe man di e suegra tene i e keintura a kita. E suegra a lanta i a kuminsá sirbiÉ.

16Ora nochi a sera, nan a trese hopi hende ku tabata poseé serka Hesus. Ku su palabra so E tabata saka e mal spiritunan fo'i nan i E tabata kura tur esnan enfermo. 17Tur esaki a sosodé pa asina e palabranan akí di profeta Isaías keda kumplí:

El a tuma nos malesanan riba djE

i a karga nos enfermedatnan.#Isaías 53:4

Sigui Hesus

(Lukas 9:57-62)

18Ora Hesus a mira e multitut rondó di djE, El a duna su disipelnan òrdu pa bai otro banda di e lago. 19Awor un dòktor di lei a aserk'É i bis'É: ‘Maestro, mi ke sigui Bo; unda ku Bo bai, mi tambe ta bai.’ 20Hesus a kontest'É: ‘Zoro tin kueba i para tin nèshi, ma e Yu di hende no tin niun kaminda pa E sosegá su kabes.’ 21Un otro, un disipel di Hesus, a bis'É: ‘Señor, pèrmití mi bai dera mi tata promé mi sigui Bo.’#Tobit 4:3-4 22Hesus a kontest'é: ‘Sigui Mi i laga morto dera nan morto.’

Hesus ta kalma tempestat

(Marko 4:35-41; Lukas 8:22-25)

23Hesus a subi bordo i su disipelnan a siguiÉ. 24Diripiente a lanta un tempestat fuerte riba laman di moda ku e olanan tabata tapa e boto. Ma Hesus tabata na soño. 25Nan a bai serka djE lant'É fo'i soño i bis'É: ‘Maestro, salba nos! Nos ta muri!’ 26Hesus a bisa nan: ‘Pakiko boso tin tantu miedu asina? Esta poko fe boso tin!’ El a lanta i a papia severamente ku bientu i laman. A reina un silensio profundo. 27Nan a keda asombrá i bisa: ‘Ta ki sorto di hende e hòmber akí ta? Asta bientu i laman ta tende di djE!’

Hesus i e hòmbernan poseé di Gadarena

(Marko 5:1-20; Lukas 8:26-39)

28Ora Hesus a yega e otro banda di lago di Galilea, den teritorio di Gadarena, dos hòmber a sali for di kaminda ta dera hende bin top'É. Nan tabata poseé di mal spiritu i tabata asina violento ku niun hende no tabata por a pasa di e kaminda ei. 29Diripiente nan a grita: ‘Ta kiko Abo, Yu di Dios, ke di nos? Bo a bini aki bin tormentá nos promé ku ora?’

30Eibanda, no muchu leu, tabatin un trupa grandi di porko ta kana rondia kuminda. 31E demoñonan a supliká Hesus: ‘Por fabor, si Bo ta bai saka nos, manda nos den e trupa di porko ei.’ 32Hesus a bisa nan: ‘Bai.’ E spiritunan a sali i a drenta den e porkonan. E porkonan a saka un kareda bai kai den lago, na otro banda dje subida, i hoga.

33Wardadónan dje trupa di porko a kore limpi bai siudat bai konta henter e historia i tambe loke a pasa ku e hòmbernan poseé. 34E ora ei tur hende di e siudat a sali bai pa kontra Hesus i ora nan a hañ'É, nan a rog'É pa E bai for di nan region.

Currently Selected:

Mateo 8: PBDC13

Highlight

Copy