Huan 2

Hesus ta kambia awa hasié biña

1Dos dia despues#2:1 Dos dia despues; literalmente tin pará: Riba e di tres dia. E dos ekspreshonnan akí ta referí na mesun kantidat di tempu. ku Hesus a topa Natanaèl, tabatin un kasamentu na Kana di Galilea. Hesus su mama tabata na e kasamentu. 2Nan a kombidá Hesus tambe huntu ku su disipelnan. 3Ora ku biña a kaba, Hesus su mama a bis'É: ‘E hendenan no tin mas biña!’ 4Hesus a kontest'é: ‘Señora, kiko bo ta deseá di Mi anto? Mi ora no a yega ainda.’

5Hesus su mama a bisa e kriánan: ‘Hasi loke E bisa boso.’ 6T'asina ku hudiu tin nan kustumbernan religioso di purifikashon; pa e motibu ei tabatin seis tinashi einan. Kada tinashi por a tuma ochenta pa shen liter di awa. 7Hesus a bisa e kriánan: ‘Yena e tinashinan ei ku awa.’ I e kriánan a yena nan te na rant. 8E ora ei El a bisa nan: ‘Saka poko awa i hiba pa e maestro di seremonia.’ I nan a hiba e awa pa e hòmber. 9Ora e maestro di seremonia a purba e awa ku a kambia bira biña, el a manda yama e brùidehòm. E no tabata sa di unda e biña a sali, ma naturalmente e kriánan ku a saka e awa, sí tabata sa. 10El a bisa e brùidehòm: ‘Tur hende ta parti e mihó biña promé i despues ora e hendenan a bebe basta kaba, nan ta parti e biña di ménos kalidat. Ma abo a warda e mihó biña te awor!’

11Asin'akí Hesus a hasi su promé señal milagroso: ei na Kana di Galilea El a mustra su gloria i su disipelnan a kere den djE.

12Despues Hesus, su mama, su rumannan i su disipelnan a bai Kafárnao#Mateo 14:13 i nan a keda aya un par di dia.

Tèmpel ta kas di Dios

(Mateo 21:12-13; Marko 11:15-17; Lukas 19:45-46)

13E fiesta ku hudiunan sa selebrá, fiesta di Pésag,#Éksodo 12:1-27; Deuteronomio 16:1-8 tabata serka i Hesus a bai Herusalèm. 14El a haña nan ta bende bue, karné i palomba i tabatin kambiadó di plaka tambe sintá den tèmpel. 15Hesus a mara kabuya na otro, traha un karbachi i kore ku nan tur for di tèmpel huntu ku nan karnénan i nan buenan. El a basha sèn di e kambiadónan di plaka abou i bòltu nan mesa. 16Anto El a bisa esnan ku tabata bende palomba: ‘Saka e palombanan ei fo'i djaki! No hasi kas di mi Tata un marshe!’ 17E disipelnan a kòrda ku Skritura ta bisa: ‘Zelo pa bo kas, o Dios, lo kima den mi manera kandela!’#Salmo 69:9 18Outoridatnan hudiu a bis'É: ‘Mustra nos un señal milagroso pa nos mira ku kua derechi bo ta hasi e kos akí.’ 19Hesus a kontestá nan: ‘Destruí e tèmpel akí i den tres dia Mi ta lant'é atrobe.’#Mateo 26:61; 27:40; Marko 14:58; 15:29 20Nan a bis'É: ‘A tuma 46 aña pa traha e tèmpel akí. Awor abo ta bai lant'é den tres dia?’

21Ma e tèmpel ku Hesus tabata papia di dje, tabata su mes kurpa. 22Dia El a lanta for di morto, su disipelnan a bin kòrda loke El a bisa i nan a kere den Skritura i den e palabranan ku Hesus a bisa nan. 23E dianan ku Hesus tabata na Herusalèm durante fiesta di Pésag, hopi hende ku a mir'É hasi señal milagroso a pone nan fe den djE. 24Ma Hesus mes no ker a habri su mes pa nan, pasobra E tabata konosé kurason di tur hende. 25Niun hende no tabatin mester di bis'É loke ta biba den hende, pasobra E mes tabata konosé kurason di hende.

Currently Selected:

Huan 2: PBDC13

Highlight

Copy