Judit 15
15
1Ora e sòldánan den e tèntnan a tende loke a pasa, nan a bira tur aríbabou. 2Spantu a drenta nan kurpa i ningun hende no a keda warda pa tende kiko e otro ta bisa, tur a kore sali for di e kampamentu i a purba hui pasando pa tur e kamindanan ku nan por a haña den vaye i den seru. 3Esnan ku tabatin nan kampamentu den e serunan rondó di Betülua tambe a hui. E ora ei tur e hòmbernan di Israel ku por a bringa a bula riba nan. 4Uzías a manda hende Betomastaim, Bebai, Koba i Kola i den tur region di Israel pa konta loke a pasa i bisa nan pa persiguí e enemigunan i kaba ku nan. 5Ora e israelitanan a tende esei, nan tur a ataká e enemigunan i a sigui mata nan te na Koba. E hendenan di Herusalèm i henter region di seru tambe a djòin nan, pasobra nan a konta kiko a pasa ku e kampamentu dje enemigu. Habitantenan di Guilead i di Galilea a changa e fugitivonan i a derotá nan mal derotá. Nan a sigui persiguí nan te pasa Damasko i bisindario.
6E habitantenan di Betülua ku no a bai huntu ku e otronan, a drenta den e kampamentu di e asirionan, sakia e kampamentu i probechá tur ku tin. 7E israelitanan ku a bini bèk di e masakre a poderá di loke a sobra; e pueblo- i pueblesitonan den region di e serunan i esunnan den vaye a haña hopi botin, asina tantu kos tabatin pa kohe.
Dia di triunfo pa Judit
8Gransaserdote Yoyakim i konseho di ansiano israelita di Herusalèm a bini pa mira e salbashon ku Señor a trese pa Israel i pa bishitá i felisitá Judit. 9Ora nan a yega serka dje, tur a gab'é riba un boka i a bis'é: ‘Bo ta fama di Herusalèm, orguyo grandi di Israel, prenda presioso di nos pueblo. 10Bo a hasi tur e kosnan ei riba bo mes, bo a trese salbashon pa Israel. Esei a agradá Dios. Señor Todopoderoso bendishoná bo te den eternidat.’ Henter pueblo a kontestá: ‘Amèn.’
11Nan tabatin mester di trinta dia mas pa saka tur botin for di e kampamentu asirio. Nan a duna Judit e tènt di Holoferne, e sèrvis di plata, su sofánan, su bekernan i su sobrá artíkulonan di arte. El a kohe nan i e mes a kuminsá pone nan riba su mula. Tambe el a laga trese su garoshinan halá pa bue i a stapel tur kos riba nan.
12Despues tur e hende muhénan a bini huntu pa mir'é i nan a honr'é. Algun di nan a kuminsá balia p'e; e ora ei Judit a kohe taki di oleifi i a parti pa e hende muhénan ku tabata huntu kuné. 13Nan a koroná nan mes ku krans di oleifi. Judit a kana dilanti di henter e pueblo i a guia e baile di e hende muhénan. E hòmbernan a sigui, bistí na nan armadura i ku krans di oleifi riba nan kabes. Tur tabata kanta na bos altu. 14E ora ei Judit a kanta e himno di alabansa akí pa henter e pueblo di Israel tende i despues tur a ripitié.
Currently Selected:
Judit 15: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013