Génesis 11

Toren di Bábel

1Den e tempu ei tur hende tabata papia e mesun lenga. 2Ora nan tabata bai den direkshon ost, nan a haña un sabana den e pais Shinar, kaminda nan a keda biba. 3Un dia nan a bisa otro: ‘Ban traha klenku i hòrna nan bon.’ Nan a usa e klenkunan pa blòki i breu pa pega e blòkinan na otro. 4Despues nan a bisa: ‘Ban lanta un siudat ku un toren ku ta yega te na shelu. Asin'ei nos lo bira famoso i nos lo no haña nos plamá riba henter mundu.’

5Ora SEÑOR a baha pa mira e stat ku e toren ku e hendenan tabata trahando, 6El a pensa: ‘Mira, e hendenan akí ta ún pueblo, i nan tur ta papia e mesun lenga. Esaki ta djis e kuminsamentu di loke nan ke logra. Aworó nada riba mundu lo no ta imposibel pa nan. 7Laga Nos baha anto i bruha nan lenga, ya nan no ta komprondé otro mas.’ 8Asina SEÑOR a hasi ku nan a plama riba henter mundu. Nan mester a laga trahamentu di e stat para. 9Einan SEÑOR a bruha lenga di henter humanidat. For di einan El a pone nan plama riba henter mundu. P'esei e siudat yama Bábel.#11:9 Na hebreo e palabra Bábel i e palabra ku ta nifiká bruhá tin un zonido ku parse otro.

Desendientenan di Sèm

(1 Krónikanan 1:24-27)

10Aki ta sigui lista di e desendientenan di Sèm. Dos aña despues di diluvio, tempu Sèm tabatin 100 aña, su yu hòmber#11:10 Komo kabes di famia ta e yu hòmbernan so ta riba e lista. Arpakshad a nase. 11Despues Sèm a biba 500 aña mas, i e tabatin mas yu hòmber i mas yu muhé.

12Tempu Arpakshad tabatin 35 aña, su yu Shèlag a nase. 13Despues Arpakshad a biba 403 aña, i e tabatin mas yu hòmber i mas yu muhé.

14Tempu Shèlag tabatin 30 aña, su yu Ebèr a nase. 15Despues Shèlag a biba 403 aña mas, i e tabatin mas yu hòmber i mas yu muhé.

16Tempu Ebèr tabatin 34 aña, su yu Pèlèg a nase. 17Despues Ebèr a biba 430 aña mas, i e tabatin mas yu hòmber i mas yu muhé.

18Tempu Pèlèg tabatin 30 aña, su yu Reú a nase. 19Despues ku Reú a nase, Pèlèg a biba 209 aña mas, i e tabatin mas yu hòmber i mas yu muhé.

20Tempu Reú tabatin 32 aña, su yu Serug a nase. 21Despues ku Serug a nase, Reú a biba 207 aña mas, i e tabatin mas yu hòmber i mas yu muhé.

22Tempu Serug tabatin 30 aña, su yu Nahor a nase. 23Despues Serug a biba 200 aña mas, i e tabatin mas yu hòmber i mas yu muhé.

24Tempu Nahor tabatin 29 aña, su yu Tèrag a nase. 25Despues Nahor a biba 119 aña mas, i e tabatin mas yu hòmber i mas yu muhé.

26Tempu Tèrag tabatin 70 aña, su yunan Abram, Nahor i Haran a nase.

Desendientenan di Tèrag

27Aki ta sigui e desendientenan di Tèrag. Tèrag tabatin tres yu hòmber: Abram, Nahor i Haran. Haran tabata tata di Lòt. 28Haran a muri na Ur di Kaldea, kaminda el a nase. E tempu ei su tata Tèrag tabata na bida ainda. 29Abram a kasa ku Sarai, i Nahor ku Milka. Milka tabata yu muhé di Haran i ruman di Yiska. 30Sarai no tabatin yu, pasobra e no por a haña yu.

31Tèrag a sali for di Ur di Kaldea pa bai e pais Kanaan. El a bai ku su yu Abram, su ñetu Lòt i su suegra Sarai. Ma ora nan a yega e stat Haran nan a keda biba einan. 32Tèrag a muri na Haran ku 205 aña.

Currently Selected:

Génesis 11: PBDC13

Highlight

Copy