Esdras 5

1Den e aña ei dos profeta, Hagai i Zakarías, yu di Ido, a duna e hudiunan na Huda i Herusalèm e mensahenan ku nan tabata risibí serka SEÑOR, Dios di Israel. 2E ora ei Zerubabel, yu di Shealtiel, i Yeshua, yu di Yosadak, a kuminsá lanta e tèmpel na Herusalèm atrobe, ku sosten di e dos profetanan.#Hagai 1—2; Zakarías 1:1; 4:6-10; 6:15 3-4Pero mesora Tatnai, gobernador di e provinsia parti wèst di riu Eufrat, Shetar Boznai i nan koleganan a bai serka e hudiunan i puntra: ‘Ken a duna boso òrdu pa rekonstruí e tèmpel akí i akab'é? Kon yama e hendenan ku ta trahando riba dje?’ 5Pero Dios tabata protegé e lidernan hudiu, di manera ku Tatnai i e otronan a disidí di no stòp e trabou promé ku nan manda rospondi pa Dario i risibí kontesta.

6Aki ta sigui teksto di e karta ku Tatnai, gobernador di e provinsia parti wèst di riu Eufrat, Shetar Boznai i nan koleganan, nan funshonarionan di gobièrnu parti wèst di riu Eufrat, a manda pa rei Dario. 7Esaki tabata nan relato:

‘Na rei Dario.

Nos ta spera ku su mahestat ta gosando di un salú perfekto. 8Nos ke laga su mahestat sa ku nos a bishitá e region di Huda pa inspektá tèmpel di e gran Dios. Nan ta rekonstruí e tèmpel ku piedra grandi i nan ta fura e murayanan ku palu. Nan ta traha ku dedikashon i e trabou ta avansando rápidamente bou di nan man. 9Nos a interogá e lidernan pa sa ken a duna òrdu pa rekonstruí e tèmpel i akab'é. 10Tambe nos a puntra nan kon yama e personanan ku ta dirigí nan, pa nos nota nan nòmber manda pa su mahestat. 11Nan kontesta tabata: “Nos ta sirbidó di e Dios di shelu i tera i nos ta rekonstruí e tèmpel ku siglonan largu tabata pará aki. Un gran rei di Israel a konstruyé i akab'é.#1 Reinan 6—7 12Nos antepasadonan a lanta rabia di e Dios di shelu i esei a pone ku El a entregá nan den man di e kaldeo Nebukadnèsar, rei di Bábel. Nebukadnèsar a destruí e tèmpel akí i a hiba nos pueblo den eksilio na Babilonia.#2 Reinan 25:8-12; 2 Krónikanan 36:17-20; Yeremías 52:12-15 13Despues, den e promé aña di reinado di Korèsh, rei di Bábel, el a duna òrdu pa rekonstruí e tèmpel akí.#Esdras 1:2-11 14Tambe rei Korèsh a debolbé e ophetonan di uso di oro i plata ku Nebukadnèsar a yega di saka for di tèmpel na Herusalèm hiba tèmpel di Bábel. Korèsh a entregá un tal Sheshbasar nan, un hòmber ku el a nombra gobernador. 15El a orden'é pa hiba e ophetonan di uso bèk na e tèmpel di Herusalèm i rekonstruí e kas di Dios na e mesun sitio. 16E Sheshbasar akí a pone fundeshi di tèmpel na Herusalèm i for di e dia ei nan a traha riba dje, pero te ainda e no ta kla.”

17Asina ta, si su mahestat haña ta bon, laga hasi un investigashon den e archivonan di rei na Bábel pa haña sa si enberdat rei Korèsh a duna òrdu pa rekonstruí e tèmpel na Herusalèm.

Nos ta spera un kontesta tokante desishon di su mahestat.’

Currently Selected:

Esdras 5: PBDC13

Highlight

Copy