Barug 4
4
1Ta e Buki di mandamentunan di Dios e ta,
e lei, fihá pa tur eternidat:#Sirag 24:23
tur esnan ku kumpli kuné lo biba,
ken ku bandon'é ta muri sigur.#Deuteronomio 4:1; 8:1; 30:15-20; Proverbionan 1:32-33; 8:35-36
Klousura
2Kombertí, Yakob, i tene duru n'e sabiduria,
bai n'e splendor di su lus!
3Nunka no sede bo gloria na un otro,
no duna un pueblo strañero bo privilegionan.
4Dichoso nos ta, o Israel,
pasobra na nos ta revelá
tur loke ta agradabel na Dios!
IV. KURASHAMENTU I KONSOLASHON DI HERUSALÈM
Kurashamentu di e eksiliadonan
5Ánimo, mi pueblo,
abo ku ta tene rekuerdo di Israel bibu!
6A bende boso ku nashonnan strañero,
pero no pa destruí boso.
Pasobra boso a lanta Dios su rabia,
El a entregá boso na boso enemigunan.#Isaías 50:1
7Boso a despresiá boso Kreador,
ofresiendo sakrifisio na diosnan pagano, no n'E.#Deuteronomio 32:16-17; Salmo 106:37-38; 1 Korintionan 10:20
8Boso a lubidá e Dios eterno,
ku a lanta boso fo'i chikí.
Herusalèm, ku a kria boso,
ta yen di tristesa pa boso motibu.
9Herusalèm a mira furia di Dios basha riba boso
i a bisa:
Herusalèm ta animá i kurashá su yunan
‘Skucha, siudatnan bisiña,
Dios a manda un gran doló pa mi!
10Mi a mira kon Esun Eterno
a manda mi yunan hòmber i muhé den koutiverio.
11Ku alegria mi a lanta nan,
ku lágrima i tristesa mi a mira nan bai.
12Mira pa niun hende no hari mi,
un biuda,#Lamentashonnan 1:1 ku nan a hòrta asina tantu yu di dje;
piká di mi yunan a hinka mi den soledat,
nan a desviá for di Lei di Dios;
13nan no a hasi kaso di dekretonan di Dios,
no a biba di akuerdo ku su mandamentunan,
ni no a laga E guia nan den bon kaminda.
14Bini, siudatnan bisiña,
tene rou ku mi
pa eksilio di mi yunan, hòmber i muhé,
ku Esun Eterno a disponé pa nan.
15El a trese for di leu kontra nan
un nashon kruel ku idioma straño,
sin rèspèt pa ansiano,
ni kompashon ku mucha;#Deuteronomio 28:49-50; Yeremías 5:15
16i El a kita mi yunan stimá
fo'i ami, biuda desampará.
17Ai, mi yunan, mare mi por a yuda boso!
18Ta Esun ku a manda e desgrasianan akí pa boso,
so por libra boso di boso enemigunan.
19Ayó, mi yunan, bai numa!
Ami ta keda atras, so i bandoná.
20Mi a kita mi bistí di fiesta,
bisti paña di rou manera muhé suplikante;
henter mi bida lo mi sklama na Esun Eterno.
21Ánimo, mi yunan, pidi Dios yudansa!
E lo libra boso di tirania i poder di boso enemigunan.
22Mi ta spera ku Esun Eterno lo salba boso,
Señor santu i eterno a duna mi e legria di sa
ku pronto lo E tene kompashon ku boso.
23Mi a mira boso bai ku lágrima i tristesa,
pero Dios lo manda boso bèk pa mi
ku alegria i goso eterno.
24I manera e siudatnan bisiña a mira boso sali koutivo,
pronto nan lo mira tambe kon boso Dios, Esun Eterno, lo salba boso
ku su gran gloria i splendor.
25Mi yunan, soportá ku pasenshi
e kastigu ku Dios a manda.
Boso enemigunan a persiguí boso,
pero pronto boso lo mira nan destrukshon
i lo pone pia riba nan garganta.
26Mi yunan stimá mester a pasa den kamindanan gròf,
a bai ku nan manera trupa di bestia,
botin ku enemigu a kohe.
27Ánimo, mi yunan, pidi Dios yudansa!
I E mes ku a manda e desaster akí pa boso,
sin duda lo kòrda riba boso.
28Meskos ku boso a insistí di alehá for di Dios,
kombertí awor i busk'É ku muchu mas empeño.
29Pasobra Esun mes ku a manda e desaster akí pa boso,
lo salba boso i duna boso legria eterno.’
Konsuelo pa Herusalèm
30Ánimo, Herusalèm!
Esun ku a duna bo bo nòmber#Barug 5:4 lo konsolá bo!
31Ai di esnan ku a maltratá bo
i a tuma gustu ku bo ruina!
32Ai di e siudatnan ku a sklavisá bo yunan!
Ai di e siudat ku a tene nan prezu!
33Meskos ku el a tuma gustu ku bo kaida
i gosa bo ruina,
di mes manera lo e bira tristu
ora e keda despoblá.
34Dios lo kita for di dje e multitutnan
ku ta dun'é tantu goso;
su orguyo lo kambia den doló.
35Esun Eterno lo kim'é kompletamente i pa semper,
ta demoñonan so lo ronkoná ei.
36Herusalèm, wak pariba
i lo bo mira e legria ku Dios ta manda pa bo.
37Wak, ata bo yunan ku bo a mira bai,
ta bini di pariba i pabou,#Isaías 43:5; 60:4; Barug 5:5
reuní riba òrdu di Dios Santu,
alegre di mira gloria di Dios.
Currently Selected:
Barug 4: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013