2 Timoteo 1
1
Kumindamentu
1Esaki ta un karta di Pablo, apòstel di Kristu-Hesus segun boluntat di Dios, mandá pa proklamá loke Dios a primintí tokante bida den union ku Kristu-Hesus. 2Pa mi kerido yu Timoteo:#Echonan 16:1; 1 Timoteo 1:2 Dios Tata i nos Señor Kristu-Hesus duna bo grasia, mizerikòrdia i pas.
Sea fiel na e bon notisia
3Ora mi kòrda bo den e orashonnan ku mi ta hasi di dia i anochi, mi tin motibu pa gradisí Dios kontinuamente. Dios ku mi ta sirbi ku konsenshi limpi meskos ku mi antepasadonan. 4Mi ta kòrda bo lágrimanan di despedida; mi tin un deseo profundo di mira bo atrobe, pa mi kurason yena di goso. 5Tambe mi ta kòrda bo fe sinsero, e mesun fe ku tabata biba promé den bo wela Lois, despues den bo mama Eunike#Echonan 16:1 i awor, mi ta konvensí, den bo tambe!
6P'esei mi ta rekordá bo riba e don di Dios ku bo a risibí dia mi a pone man riba bo; waya e don ei pa e bira un kandela aktivo den bo bida. 7Pasobra Dios no a duna nos un spiritu di kobardia, pero di poder, amor i dominio propio.
8Ke men, bo no mester tin bèrgwensa di testiguá na fabor di nos Señor òf di e echo ku ami ta prizonero pa su kousa. Al kontrario, aseptá, ku forsa di Dios, bo parti di e sufrimentu ku ta konsekuensia di predikamentu dje bon notisia. 9Dios a salba nos i a yama nos pa bira un pueblo santu, no pa nos obranan, sino pasobra tabata su propósito i muestra di e bondat ku E tabatin pa nos for di eternidat, pa medio di Kristu-Hesus. 10Pero awor Dios a hasi e bondat ei visibel pa medio di binida di nos Salbador Kristu-Hesus: T'É a kaba ku poder di morto i pa medio di e bon notisia El a pone bida inmortal sali na kla. 11Ta pa anunsiá e bon notisia ei mes, Dios a nombra mi komo mensahero, apòstel i maestro.#1 Timoteo 2:7 12P'esei mes mi ta pasa den tur e sufrimentunan akí. Pero mi no tin bèrgwensa, pasobra mi sa den ken mi a pone mi fe i ta konvensí ku E tin sufisiente poder pa kuida loke mi a konfia n'E,#1:12 loke mi a konfia n'E; otro posibel tradukshon: loke El a konfia na mi te riba e dia ku Kristu-Hesus bini bèk.
13Tuma e palabranan ku bo a tende di mi komo ehèmpel di siñansa sano i sigui nan den e fe i amor ku nos tin, danki na Kristu-Hesus. 14Kuida e bon siñansa konfiá na bo, ku yudansa di Spiritu Santu ku ta biba den nos.
15Manera bo sa kaba, tur disipel den provinsia di Asia, inkluso Figelo i Hermogeno, a bandoná mi. 16Señor mustra mizerikòrdia ku famia di Onesiforo, pasobra el a animá mi hopi be. E no tabatin bèrgwensa ku mi tabata den prizòn. 17Al kontrario, dia el a bishitá Roma, el a buska mi fervorosamente te ora el a haña mi. 18Señor pèrmitié haña su mizerikòrdia riba e dia ku Hesus bini bèk. Bo mes sa mashá bon kon Onesiforo a yuda e hendenan na Éfese.
Currently Selected:
2 Timoteo 1: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013