Marc 1

Mber kile le Jean ke njèkule dooge manné njonm

(An-in Matt 3.1-12; Luc 3.1-18; Jean 1.19-28 tɔ)

1Tà ke Maje le Jésu-Krist, Ngonn le Nube nga unn gir’n titeke bè. 2Dé ndang kêm magtub’t le Esaie njèribe-dè-tà ke tà Nube’t d’ede nè:

«An! m’ule njèkawkule le’m noin’t.

E à gɔl rebe lei.

3E ndu dingem karé ke njèkile mber kêm dile’t ede nè:

I gɔli rebe le Kuwe-ɓee Krist,

i rai kile rebe le’n adi asenan lêtêt.»

4Jean ke njèkule dooge manné njonm unde loo tee kêm dile’t ile mber ede nè:

– I turi hal si adi d’ule sei manné njonm. Titeke bè á Nube à inye’n go kaiyage le si.

5Dooge ke ɓeekon ke Judée bere mbak se njé ke kêm ɓee-bò ke Jérusalem malang awi rann’t ɔri gir kaiyage le de ke nata adi ule’n de manné njonm dann ba ke Jourdain loo ke ɔri gir kaiyage le de ke nata.

6Jean ule kubu ke ngal ke d’ojo se bin lugman rann’t, è dɔ ɓede’n se ndar; ganrin dɔg-ge se wubu tuju ke walé á ke nyankuse’n. 7E ede doobulege ndàt ede nè:

– E ke à ree goom’t gugu non nga tɔgmong le’n dum dè le’m; man m’ase tutu kule gabang-ge ke njann’t lé. 8Ma m’ule sei manné njonm, nè è ɓaa à ɔr sei kunde sei se ninn’n se Ndil-Kêmnda.

Jean ule Jésu manné njonm a, sú nan’n a tɔ

(An-in Matt 3.13—4.11; Luc 3.21-22; 4.1-13 tɔ)

9Kêm ndɔnge’t nè nga, Jésu in Nazareth ɓeekon ke Galilée ree ade Jean ule’n manné njonm dann mann ke Jourdain. 10Loo ke à unde loo dann mann’t le tee ɓaa, ke loon’t nè kuwe è an kum danran teen halal, Ndil ree ndi dènn’t tite der-nda bè. 11Ndu Nube ɓar danran nú ede nè:

– I i Ngonn’m ke m’tári ngain, i nyan ranel le’m a tɔ.

12Ke loon’t nè kuwe, Ndil ɔse’n aw se’n kêm dile’t. 13E ra ndɔ kɔr-sɔ kêm dile’t, Sú ree rann’t ule kêm’n. E ra ɓee se dange ke walé, nè dooge ke danrán rai se’n dè nyan ke aw ndoo’n.

Jésu ɓar mbawge sɔ

(An-in Matt 4.12-22; Luc 4.14-15; 5.1-11 tɔ)

14Loo ke d’uwe Jean d’ile’n dangai’t ɓá ɓaa, Jésu in ree ɓeekon ke Galilée, è ile mber Tà ke Maje le Nube, ede nè:

15– Ndɔ ke Nube ɔje nga ase deĵ ɗarinè ta, Konɓee le Nube nain ngɔr. I turi hal si, undei kêm si dè Tà ke Maje’t a tɔ.

16Loo ke Jésu à njiye tà ba ke Galilée ɓaa, è an Simon se ngokon’n André ndai à ilei bure le de dann ba’t tede ei mbawge ke njékɔse kanjege. 17Jésu ede de ede nè:

– Unni rebe goom’t, m’a m’tel sei ke njéndon dooge ɗarinè ta.

18Ke loon’t nè kuwe, d’inye burege le de, d’unn rebe goon’t. 19Loo ke è aw ndêin ke kété ɓaa, an Jacques ngonn le Zébédée, se ngokon’n Jean, ndii kêm ngonn bato’t à gɔli burege le de. 20Ke loon’t nè kuwe, Jésu ɓar de ɓaa, ei inyei bɔ de Zébédée kêm ngonn bato’t se njékulege le’n unni rebe go Jésu’t.

Jésu aje dingem ke ndil ke majelé tò kêmn’t

(An-in Luc 4.31-37 tɔ)

21Jésu se njékuwe-girnge awi kêm ɓee ke Capernaum. Ke loon’t nè kuwe, Jésu aw kêm kei kebe nan’t se ndɔ taa kebe, è unn gir ndó dooge nyan. 22Tà ige de sêl dè gos nyan-ndó’t le’n. E ndó de nyan se tɔgmong ke Nube ade’n m ndó de nyan tite le njékɔrgir gute-nduge karè lé.

23Dingem karé ke ndil ke majelé tò kêmn’t ndi kêm kei kebe nan’t nè nga tɔ. Ke loon’t nè kuwe, è tam tà se ndu’n ke bòi ede nè:

24– Ké usi ri ra jé’t wa? I Jésu ke Nazareth. Ké i ree le tuju jè kɔke ta wa? Man m’geri mbak, i i ke njè maje kɔr njêt le Nube.

25Jésu in se ndil ke majelé ndáng’n ede nè:

– Ade asi, unde loo i tee kêm dingem’t nè kɔke.

26Ndil ke majelé sure dingem nè mbangang-mbangang a, ade non ɓerer-ɓerer ɓita unde loo tee kêmn’t ɓai. 27Ndil dooge malang tee an-in soin-soin ade deji nan tà edi nè:

– Ké nyan nè nga è ri wa? E nyan-ndó ke gai se tɔgmong ke in ra Nube’t. Ndilge ke majelé géa Jésu on de njanm-njanm ade ulei dè de adii.

28Ke loon’t nè kuwe, kɔbe nyan ke Jésu ra nga oso se loo mbit mbit kêm ɓeekon ke Galilée bere mbak.

Jésu ɔr ratur ra dooge’t bule

(An-in Matt 8.14-17; Luc 4.38-41 tɔ)

29Loo ke Jésu unde loo tee nata kêm kei kebe nan’t ɓaa, ke loon’t nè kuwe è se Jacques se Jean, awi kêm kei le Simon se André. 30Wum Simon ke dinye tò nang se ratur. Ra’n taa por làm-làm. Ke loon’t nè kuwe, dé ree d’ede Jésu tà’n. 31Jésu aw rann’t, uwe ji’n ute’n dɔ. Ra’n ke taa làm-làm nga in kengeng. E unn gir ra nyan kuse ade de. 32Tà loo sɔlé, loo ke kàde ur ɓá ɓaa, d’oto njératurge malang se njé ke ndilge ke majelé rai kum de ndoo dé ree se de som-som ra Jésu’t. 33Dooge ke kêm ɓee-bò’t nè bere mbak kebi nan tàbit kei rebe’t. 34Jésu ɔr ratur ra njératurge’t ke raturge gai-gai rai kum de ndoo. E rɔ ndilge ke majelé kɔke bule kêm dooge’t. E inye loo ade ndilge ke majelé tami tà lé, tede ei nè nga geri Jésu mbak.

Jésu ile mber guguru’n kêm ɓeekon ke Galilée

(An-in Luc 4.42-44 tɔ)

35Tà gir loo’t, loo ke loo ar lé ɓai, Jésu in gir ɓi’t unde loo tee kêm kei aw ngang loo’t nata. E unn gir kɔje tà se Nube. 36Simon se njé ke ei se’n ndolèi go Jésu. 37Loo ke ingei nin deĵ ɓá ɓaa, edi nin edi nè:

– Dooge malang sangi nin.

38Jésu ede de nè:

– Ade j’awi kêm ɓeege ke rang ke tooi kɔte nan’t nè, le kade m’ile mber tà le Nube tutu tɔ. E tede è ke nè á m’unde loo m’tee’n kêm ɓee-bò’t.

39Jésu aw ile mber kêm kei kebe nange’t le de ke ɓeekon ke Galilée bere mbak. E rɔ ndilge ke majelé kɔke a tɔ.

Jésu ɔr banje ra dingem karé’t

(An-in Matt 8.1-4; Luc 5.12-16 tɔ)

40Dingem karé ree ra Jésu’t. E ɔse keje’n nang nonn’t, ndête’n ɓɔk-ɓɔk ede nè:

– Kɔkrɔ karè, ke nè á i ndige se’m le kade banje ɔr ram’t ndát-ndát ɓaa, ram à tel tò karè ndát-ndát kuwe tɔ.

41Jésu an kumndoo le dingem ke njèbanje. E ule ji’n ɔde’n ra njèbanje, ede’n ede nè:

– M’ndige bè kuwe, maje kade rai tel tò karè ndát-ndát.

42Ke loon’t nè kuwe, banje ɔr ra dingem’t nè nga nyonk. 43Jésu ede’n tàge ke rang ngain ɓita inye’n ade aw ɓai. 44Go’t gugu, è ede dingem ke banje ɔr rann’t nga ede nè:

– I tam tà nè nga ade doo karé bè géa oo lé nè aw ra njèkuje nyan-mese’t, i tɔje’n rai ade an. Go’t ɓita unn nyan-noje ade se go gute-ndu ke Moise ndang. Titeke bè á i tɔje’n njékuje nyan-mesege titeke banje ɔr rai’t ɓá ta.

45Nè loo ke dingem nè ɔte aw ɓaa, è unn gir kɔrgir nyan ke tee nè nga ase’n loo nák-nák. Gir’n ke nè á Jésu ase kum kaw ɓee-bò’t tàkum dooge’t ndái-ndái lé. E ndi ngang loo’t nata nè dooge in-in se loo-loo reei rann’t som-som.

Currently Selected:

Marc 1: GUL04

Highlight

Copy