Matthieu 24

Jésu ede de tà kei le Nube ke à tuju

(An-in Marc 13.1-2; Luc 21.5-6 tɔ)

1Loo ke Jésu unde loo kêm kei’t le Nube tee le kaw ɓaa, njékuwe-girnge reei rann’t le tɔje’n herge ke mbirin mbin ke d’unde’n kei ke kige le Nube le kade an. 2Nè Jésu tel ile de dè’t ede nè:

–An-in nyange nè nga malang maje. Kerɔte kuwe, man m’ede sei, kuberi herge ke an-in de nè nga, karé bè ke à nain dè made’t anje kade d’a jɔré’n nang goto.

Nyankumndooge ke à teei kété ɓita dè nang nè a tuju ɓai

(An-in Marc 13.3-13; Luc 21.7-19 tɔ)

3Taɓai Jésu ɔte aw ndi dè mbal’t ke kage olivierge ndai tutu. Njékuwe-girnge awi ingeii se kar’n deji nin edi nè:

– Ede jè, ké ndɔ ke ra nyange nè nga à teei wa? Ké ri á à tɔji jè kade jè ger ndɔ teli nga wa? Ké ndɔ ke ra gir nang nè à gang ɗás wa?

4Jésu tel ile de dè’t ede nè:

– Kêm si dè ra si’t le kade doo karé bè géa sú sei lé. 5Oiyo, dooge bule à unni ri’m le reei kedi nè: «Man nga kuwe m’ee Krist.» D’a tam bè le sú’n dooge bule kade ndemi. 6Sei a kooi ká rɔ se ser rɔ ke dooge à rɔi nan. Nè adii kàde si gete get-get lé. Gar-gar nyange nè nga à teei kété ɓita, nè à è ngei ndɔ kade dè nang nè bere mbak tuju’n lé ɓai. 7Girkoje dooge ke karé à in-in le rɔi se girkoje dooge karé ke rang a, ngar ke kêm ɓeekon karé à in le rɔ se ngar made’n ke kêm ɓeekon karé ke rang a tɔ. Ɓo-bò à oso se loo-loo a, kêl loo ke nange nang à yei ɓuk-ɓuk a tɔ. 8Nè nyange nè malang è kunn gir nyantosowur ke à ra sei ke ra ɓai titeke ndo ra’n dinye bè. 9D’a tuwe sei ra kum si ndoo a, d’a tɔl sei a, dooge ke geri Nube lé à ɔri sei njêt a tɔ, tede ri’m man ke m’ee Ngonn doo nga. 10Gir’n ke nè á, dooge bule à tusi kundekêm le de kinyei a, à unni dè nan a tɔ. 11Njé tête tà kunde tà Nube’tge bule à ɔsi nang kin-in le súi dooge bule a tɔ. 12Nyan ra ke bann-bann à in dè made’t ke kété-kété. Gir’n ke nè á tár nan le dooge bule à tel sɔl ɗêng-ɗêng. 13Nè nanan ke nda dè njann’t njáng sár ndɔ ke ngeinn’t ɓaa, d’a d’aje’n. 14Konɓee le Nube nga, d’a d’ile mber’n kade dooge malang ke geri Nube lé ke ndii dè nang nè bere mbak ooi kété ɓita dè nang nè à tuju ɓai.

Jésu ede de tà tuju le ɓee-bò ke Jérusalem

(An-in Marc 13.14-23; Luc 21.20-24 tɔ)

15Ndɔ karé a an-in Njè tuju loo à al ɗáng ndi loo ke tò se ninnen’t. Doo nè nga, Daniel njèribe-dè-tà ke tà Nube’t tam tà le’n kété. Maje kade nanan ke tute magtub nè ɓaa, gir tà nè nga maje le ger. 16Kêm ndɔn’t nè nga maje kade njétaakêm-Kristge ke ndii kêm ɓeekon ke Judée an-in awi dè mbalge’t. 17Doo ke kêm ndɔn’t nè, ndi dè kei’t dɔ ɓaa, maje kade tel rise nang aw kei le’n unn nyan karé lé ta. 18E ke nda kêm ndɔr’t kêm ndɔn’t nè ɓaa, maje kade tel aw ɓéee unn kubu le’n ke bòi yul lé ta. 19Habi! à è kumndoo ngain tede dinyege ke njé ndann ngannge se njé ke ngannge à ili mba kàde de’t ɓai kêm ndɔnge’t nè nga. 20Ɔji tà se Nube le kade nan kan-in nan le si nga è ɓara lé a, éké se ndɔ taa kebe lé a tɔ. 21Nyantosowurge ke à teei kêm ndɔnge’t nè nga, ei nyange ke teei ndɔ karé lé mari loo kunde gir nang’t sár tee ɓila. Tagar nyantosowurge nè à teei gugu rang ndan lé a tɔ. 22Ke nè á Nube gang tà ndɔge nè nga dɔ lé ɓaa, doo karé ke ayé kinge kaje géa goto. Nè Nube à gang tà ndɔge nè dɔ tede tà le njé ke è tɔr de. 23Ke nè á doo karé ede sei ede nè: «An-in! Krist nga è nè», éké «è nú bè» ɓaa, umi kêm si dè tà’t le’n lé. 24Njé tête tà kunde tà Krist’t se njé tête tà kunde tà Nube’t à undei loo teei. A rai nyankɔbege se nyanpindege ke tooi ɓel tede le kade bainléa súii njé ke Nube tɔr de kuwe géa tɔ. 25Gir’n ke nè á man m’ede’n sei tà nyange nè nga kété kade ooi.

26Ke nè á d’ede sei d’ede nè: «An-in! n’ee nga, n’nda kêm dile’t non» ɓaa, i teei awi tutu lé. Loo ke d’ede sei d’ede nè: «An-in! n’ee nga, n’ndi du loo’t kei non» ɓaa, umi kêmi si dè’t lé. 27Titeke ndi têl loo tee’t le kàde ndoin sár tee loo kur’t le kàde nga, ndɔ tel ree le’m man ke m’ee Ngonn doo nga géa à è titeke bè to. 28Loo ke rara ke ninn tò tutu ɓaa, è loo’n nè á malge à kebi nan tutu.

Ndɔ tel le’m man Ngonn doo

(An-in Marc 13.24-27; Luc 21.25-28 tɔ)

29Go ndɔ nyantosowurge’t nè nga ɓaa, ke loon’t nè kuwe kàde à tel ndul a, nan à nda lé a, kɔnyonge à unni gir tosoi nang a, tɔgmong-ge ke uwei nyange ke danrán nan’t sêm-sêm nga, à yeyi ɓuk-ɓuk a tɔ. 30Nyantɔjege le’m man ke m’ee Ngonn doo à teei kàde danran’t. E á girkoje dooge malang ke dè nang nè à undei de dai-dai se non. Girkoje dooge malang à an-in man ke m’ee Ngonn doo loo tel ree’t le’m dann kil’t le ndi se tɔgmong a, se ndubra a tɔ. 31M’a m’ule dooge le’m ke danrán se burunju ke à ɓar kase loo nák-nák le kade ɔsi nja dooge le’m ke m’tɔr de m’unde de se ninn’n gai dè nang bere mbak, loo tee’t se loo kur’t le kàde, dè jikon se dè jigel a tɔ.

Jésu unn tà le kage koté ɔje’n dè Konɓee le Nube ke nain ngɔr

(An-in Marc 13.28-31; Luc 21.29-33 tɔ)

32Gostà ke ɔje dè kage koté nga, à ade a i geri gir tà nè nga maje. Loo ke balkumnge unni gir tube mêin-mêin a, mbinnge iti ɗuk-ɗuk a tɔ ɓaa, sei geri titeke nan ɓar è ngɔr. 33Sei géa, loo ke an-in nyange nè nga teei malang titeke bè ɓaa, maje kade i geri titeke man ke m’ee Ngonn doo nga m’ee ngɔr tàbit keige’t. 34Kerɔte kuwe, man m’ede sei ndàt, nyange nè nga malang à undei loo teei kété pa ɓita girkoje dooge ke ndii dè nang nè ɗarinè à gang ɗás ɓai. 35Danran se nang nè à gotoi ɓai, nè tàge le’m à teli yai ndan lé sár kade nyange nè malang undei loo teei kété ɓita.

Nube kuwe karé á ger ndɔ tee le nyange nè

(An-in Marc 13.32-37; Luc 17.26-30,34-36 tɔ)

36Tà ke ɔje dè ndɔ’n éké kàde’n nga, doo karé bè géa ger lé. Dooge ke danrán éké man ke m’ee Ngonn doo nga géa jè ger lé a tɔ. Nè Bɔ’m kuwe se kar’n bere á ger. 37Nyan ke ndɔ ke tee kêm ndɔnge’t le Noé nga à è titeke bè ndɔ tel ree le’m man ke m’ee Ngonn doo nga tɔ. 38Kété ɓita kade ndo ke mann bêlm ree ɓai nga, dooge usei se an-in nyan se go dege non dege a, dé táa nan a, d’ade ngann dege géa taai nan a tɔ. Dé ra titeke bè sár tee’n kêm ndɔn’t ke Noé in ur’n kák kêm bato’t. 39Dooge ndii neng sár ade mann bêlm ree pujur’n dè de a, ndum’n de ndarak a tɔ. Ndɔ tel ree le’m man ke m’ee Ngonn doo géa à è titeke bè kuwe tɔ. 40Kêm ndɔ’n nè nga, loo ke dooge joo ndai à rai kule kêm ndɔr’t ɓaa, d’a d’ɔse njè ke karé seen kunn’n kaw se’n ɓaa, d’a d’inye è ke karé loo ndann’t jêke^. 41Kêm ndɔn’t nè nga, loo ke dinyege joo ndai à uri nyan kêm bir karé’t ɓaa, d’a d’ɔse njè ke karé seen kunn’n kaw se’n, nè d’a d’inye è ke karé loo ndann’t jêke^. 42Bè ɓaa, i ndii kum tede sei geri ndɔ tel le Kuwe-ɓee le si nga lé. 43Maje kade i geri tà nè nga maje: loo ke kuwe-kei ger kàde ke njèɓog à ree’n ɓaa, è à ɔge kum’n ɓi le kinye loo kade mbute’n kum bolè ɓoge’n nyange le’n ke kêm kei lé. 44Gir’n ke nè á sei géa, uwei dè nja ra si tede man ke m’ee Ngonn doo nga m’a m’tel ree dè kàde ke sei giri’t nga lé.

Gar-gar njékuwe-gir-Jésuge à rai kule le’n se ngonn koje

(An-in Luc 12.41-48 tɔ)

45Ké nan è ngonn njèndi ke gang tchat ke kuwe’n ɔr’n unde’n dè gute madennge’t le kade kai de nyankuse de se ndɔ karé-karé malang wa? 46Ngonn njèndi ke ra titeke bè nga, loo ke kuwe’n ree inge’n dè’t ɓaa, ra’n a nel’n ngain. 47Kerɔte kuwe, man m’ede sei ndàt, kuwe’n à unde’n ke njèkan dè nyanbawge le’n malang. 48Nè ke né á è ngonn njèndi ke majelé ɓaa, à tam kêmn’t k’ede nè: «Kuwe’m à tile mbɔr ɓai.» 49E unn gir kuse se kain nyan se goonge nonnge a, tunde ngann njéndi madennge a tɔ. 50Kuwe ngonn njèndi nè nga à tel se ndɔ ke è ndi ngine’n lé a, se kàde ke è ger lé a tɔ. 51Kuwe’n à rɔ’n kɔke a, à kade aw loo ndi’t le njékede gosge. E loo ke ndɔn’t dooge à non-in jik-jik tutu a, à ton-in tà de vbat-vbat tutu a tɔ.

Currently Selected:

Matthieu 24: GUL04

Highlight

Copy