Luc 19

Jésu aw kêm kei le Zachée ke njètaa tir

1Jésu unde kêm ɓee ke Jéricho se nja’n dɔ gang. 2Doo karé bè ke è baw ndi kêm ɓee’t nè nga. Ri’n nè Zachée. E ngar le njétaa tirge. 3Zachée sang rebe le kan ké nan á è Jésu nga wa? Nè è asekum kan’n lé tede doobulege d’utu’n loo tede è doo ke gɔje. 4E an-in ngɔde-ngɔde aw al ndi dè kage koté’t non Jésu’t kété le kan’n tede à dese se rebe ke rann’t. 5Loo ke Jésu ree tee rann’t ngɔr ɓaa, è unn kum’n dɔ ɓar Zachée ede’n ede nè:

– Zachée, i rise nang kalang tede gar-gar m’a m’ndi kei lei ɓila.

6Zachée rise nang kalang aw se Jésu kêm kei le’n, ra’n mba se ranel. 7Loo ke dooge malang an-in bè ɓaa, unni gir murin tà edi nè:

– Doo nè nga aw kêm kei le doo ke njè ra majelé tá taa kebe tutu.

8Zachée in nda dɔ non Kuwe-ɓee’t ede’n ede nè:

– Njèdum dè nyange malang, man m’kai nyange ke m’inge danné loo joo, m’ade è ke karé njéndooge. Loo ke m’banm doo m’taa nyan le’n ɓaa, m’tel m’ade’n made dè’t loo sɔ.

9Jésu tel ede Zachée ede nè:

– Ɓila njé ke kêm kei lei uwei è ke è njèkaje de nga ke ra de’t, tede è nè géa è ngonnkà Abraham tɔ. 10Man ke m’ee Ngonn doo nga, m’ree le sang njé ke ndemi osoi kɔke le tel se de ke ra Nube’t.

Sertà le ngonn-ngar ke um nar ji ngann njéndige’t le’n

(An-in Matt 25.14-30 tɔ)

11Dooge uri mbi de ooi tà le Jésu. Loo ke è an titeke d’ur mbi de d’oo tà le’n ɓaa, è unn sertà karé ke rang ede de tede nain ngɔr kade à tee Jérusalem. Dooge nè giri kêm de’t edi nè nain ngɔr ɓaa Konɓee le Nube ayé kunde loo tee pan ta. 12E ede de ede nè:

– Doo karé bè girkoje le’n è ngar. E ndi dè njann’t tchên le kin kaw kêm ɓeekon ke heb’t le kade ngar karé ke bò unde’n ngar nú ɓita à tel ree ɓai. 13E ɓar ngann njéndige le’n dɔg ade reei ingeii. E nobo de karé-karé malang nar kule ke ndɔ aru, ede nè: «Awi se nar nè i ndogoi nyan i turi gir sár kade m’ree m’inge’n sei.» 14Nè njé ke kêm ɓeekon’t le ngonn-ngar nga d’ɔr’n njêt. Dé d’ɔr dooge d’ule de goon’t d’ede nè: «Jè ndige kade è nè on jè lé.» 15Loo ke d’unde’n ngar ɓá ɓaa, è tel ree ɓéee. E ade dé ɓar ngann njéndige le’n ke è ade de nar nga. E ndige le ger gir nyan ke dé ra se nar nè nga tɔ. 16Ngonn njèndi le’n ke desêin ree rann’t ede nè: «Ngar, nar ke i ade’m nga, m’inge made dɔg dè’t.» 17E tel ile ngonn njèndi nè dè’t ede nè: «Oiyo, i ngonn njèndi ke kanm, i tɔse kumi dè nyan ke ndêin bè ke m’um jii’t. Gir’n ke nè á m’a m’undei ngar le ɓeege dɔg.» 18Ngonn njèndi ke njèkon’t joo ree ra ngar’t ede’n ede nè: «Ngar, nar ke i ade’m nga, m’inge made mi dè’t.» 19Ngar tel ede ngonn njèndi nè ede nè: «I géa m’undei ngar dè ɓeege gir mi tɔ.» 20Ngonn njèndi ke njèkon’t mute ree rann’t ede’n ede nè: «Ngar, an nar lei ke ade’m nga, m’ndêm se tà kubu ɓar-ɓar m’ule m’ɓɔyɔ. 21Man m’ra titeke bè tede m’ɓeli a, tede i doo ke manni ate ngain a tɔ. Nar ke i um loo ɓɔyɔn’t lé géa, aw ɔr a, ko ke i á i dubu lé géa, aw loon’t uje a tɔ.» 22Ngar tel ile ngonn njèndi nga dè’t ede nè: «I ngonn njèndi ke majelé, man m’gangtà dèi’t se go tà ke tee tài’t kuwe. I ger’m ke doo ke mann’n ate ngain ke ɔr nar loo ke è ɓɔyɔ nar tutu lé a, ke doo ke uje ko loo ke è dubu ko tutu lé a tɔ. 23A ɓaa, ké bain á inye nar le’m ji dooge’t ade turi gir lé wa? Ke nè á ndɔ ke i ra titeke bè ɓaa, bainléa ɓila m’a m’inge mann’n dè’t.» 24Go’t gugu ngar nè nga ede njé ke ndii kɔtenn’t ede nè: «Uwei n’ee i taai nar ke jiyé’t adi madé ke aw se nar kule ke ndɔ aru nè nga dè made’t le’n.» 25Dé tel d’ede’n d’ede nè: «Doo nè nga aw se nar kule ke ndɔ aru jinn’t ɓá.» 26Kuwe ngann njéndige nè tel ede de ede nè: «Man m’ede sei ndàt, doo ke nyan tò jinn’t á d’a d’ade’n made dè’t. Doo ke nyan è jinn’t ndêin bè ɓaa, è ke ndêin bè nè kuwe d’a d’uwe’n taa jinn’t kɔke. 27Njébange le’m ke ndigi kade m’on de lé nga, i tuwei de i reei se de ndá’t, i tɔli de tàkum’t nè.

28Loo ke Jésu ede de tàge nè bè ɓá ɓaa, è oso non de’t kété aw kum’n ke ɓee-bò ke Jérusalem.

Jésu aw kêm ɓee-bò ke Jérusalem tite ngar bè

(An-in Matt 21.1-11; Marc 11.1-11; Jean 12.12-19 tɔ)

29Nain ngɔr kade Jésu tee kêm ɓee ke Bethpagé se ɓee ke Béthanie. Ɓeege nè nga tooi kɔte mbal ke kagege ke ri de nè olivier ndai tutu. Jésu ɓar njékuwe-girnge joo ule de kété ede nè:

30– Awi kêm ɓee ke tò non jéi’t kété non. Loo ke sei a teei kêm ɓee’t nè nga ɓaa, sei a kingei ngonn koro ke dé dɔ’n dè bel’t. Ngonn koro nè nga ndɔ karé bè doo in dènn’t lé ɓai. I tutii, i ndɔrii i reei se’n adi man. 31Ke nè á doo karé deje sei ede nè: «Ké bain á i tutii wa?» ɓaa, sei edii nè: «E Kuwe-ɓee á aw ndoo’n le kin dènn’t.»

32Loo ke njékulege awi ɓaa, ei ingei ngonn koro nga deĵ tite kum ke Jésu ede’n de kété nga tɔ. 33Loo ke dé d’unn gir le tutu koro nè nga ɓaa, kuwege deji de edi nè:

– Ké bain á sei tuti ngonn koro nè nga wa?

34Njékuwe-gir-Jésuge ke joo nè nga tel ilei de dè’t edi nè:

– E Kuwe-ɓee á aw ndoo’n le kin dè’t.

35Dé ree se ngonn koro nga d’ade Jésu. Dé tɔr kubuge le de ke bòi yul dé labe gide ngonn koro’t nè ɓá ɓaa, d’ade Jésu in ndi dè’t. 36Ka-rebe ke Jésu à njiye’n nga, dooge tɔri kubuge le de ke bòi yul-yul labi tutu le ɗɔi’n. 37Loo ke nain ngɔr kade Jésu tee kêm ɓee-bò ke Jérusalem se rebe ke in dè mbal ke kage olivierge ndai tutu nga ɓaa, kos njékuwe-girnge malang rai ranel. Taɓai ei unni gir piti Nube se ndu de ke bòi beng tede nyankɔbege ke Jésu ra ade an-in edi nè:

38– Maje kade Kuwe-ɓee Nube tɔr ndu’n dè ngar ke è kuwe ule’n. Jè j’inge kêmlom ke ra Nube’t. Gir’n ke nè á jè j’ule’n ndubra dènn’t dè nang nè.

39Pharisienge ke nange dann kosdooge ke ndai loon’t edi Jésu edi nè:

– Njèndó dooge nyan, in se njékuwe-girige ade ebi’t ndêin.

40Jésu tel ile de dè’t ede nè:

– Man m’ede sei ndàt, ke nè á dé nè d’ebe’t géa, kɔr herge kuwe à rai nyan beng-beng ɓai.

Jésu tam tà tuju ke à oso dè ɓee-bò ke Jérusalem

41Loo ke Jésu an dè ɓee-bò ke Jérusalem ngɔr ɓaa, è non se mann-non kumn’t tede nyan ke à tee dè dooge ke kêm ɓee’t nè nga. 42E tam ede nè:

– Sei dooge ke Jérusalem géa, ke nè á ndɔ ke kum si gang dè rebe nyan ke ɔje dè kêmlom’t nè nga ɓaa, à è bè lé ɓai. Nè ɗarinè ɓaa, asenan’t ade sei lé ta, tede nyan nè nga ɓɔyɔ ra’n kák tàkum si’t. 43Kêm ndɔge ke à reei, njébange le si à an-in dè si king-king; d’a d’uje bolè gan’n dè si a, d’a mbusu sei nják-nják a tɔ. 44D’a d’ide sei nduju reend-reend a, d’ade tɔse kuberi herge ke undei keige palang-palang tɔr kɔke m karé bè géa à nain dè made’t dɔ lé. D’a ra sei titeke bè tede din ke Nube din sei nga kum si gang dè’t lé sár.

Jésu rɔ njéra gatege kêm kei le Nube

(An-in Matt 21.12-17; Marc 11.15-19; Jean 2.13-22 tɔ)

45Jésu aw gate-loo ke kêm kei le Nube. E unn gir rɔ njéra gatege ede de ede nè:

46– Magtub le njéribe-dè-tàge tami edi nè: «Kei le’m nga è kei ke dooge ɔji se’m tà. Nè sei ɓaa, i telii ke loo kebe nan le njéɓog-ge.»

47Jésu ndó dooge nyan kêm kei le Nube se ndɔ karé-karé malang. Maw njékuje nyan-mesege se njékɔrgir gute-nduge a, se dooge ke kum de unju sangi le kade dé tɔl’n. 48Nè ei geri nyan ke kum ra le tɔl’n lé tede kosdooge malang uri mbi de ke rann’t tchên le koo’n tà le’n.

Currently Selected:

Luc 19: GUL04

Highlight

Copy