Jean 18

Njérɔge uwei Jésu

(An-in Matt 26.47-56; Marc 14.43-50; Luc 22.47-53 tɔ)

1Loo ke Jésu tam tàge nè nga gir gang ɓá ɓaa, è se njékuwe-girnge undei loo teei awi gide mba-loo ke mann ba Cédron ɔr. Loo ke ei awi tutu nè nga, è loo man-kagege. 2Judas njèkule Jésu ji njérɔge’t nga ger loo nè mbak tede Jésu se njékuwe-girnge kebi nan tutu dɔ-dɔ. 3Judas ɔr non kos njérɔge se pajage le maw njékuje nyan-mesege se Pharisienge aw se de loo’t nè nga. Dé ree se portusge se nyankatege ji de’t tchukuk-tchukuk. 4Jésu ger nyan malang ke ayé tee dènn’t nga mbak. E njiye ngatat tile kum de, è deje de ede nè:

– Ké i sangi nan wa?

5D’ile’n dè’t d’ede nè:

– Jè sang Jésu ke Nazareth.

Jésu ede de ede nè:

– Man á m’nda nè.

Judas ke njékule’n ji kos njérɔge’t nga è se de nan’t. 6Loo ke Jésu ede de ede nè: «Man á m’nda nè» ɓaa, ke loon’t nè kuwe dé ger se go de, dé toso nang. 7Jésu tel deje de ede nè:

– Ké i sangi nan wa?

Dé tel d’ile’n dè’t d’ede nè:

– Jè sang Jésu ke Nazareth.

8Jésu tel ede de ede nè:

– M’ede sei ɓá m’ede nè, è man á m’nda nè. Ke nè á è man á i sangi man ɓaa, inyei njé ke nè ade awi.

9Jésu tam bè le kade tà ke è tam kété ede nè: «Njé ke i um de jim’t nga, m’ɔge kum’m ɓi m’an-in ngang de garar-garar m’ade doo karé bè géa dann de’t tuju lé» nga, aw’n loon’t deĵ. 10Simon Pierre uwe kuye kaskar kêm sabann’t ɔr tuge’n gir mbi paja le maw njèkuje nyan-mese ke dè jikon yap. Paja nè nga ri’n nè Malkus. 11Jésu ede Pierre ede nè:

– Ḿ-m̀, i tel se kuye kaskar lei ule kêm sabann’t gugu. Nyantosowur ke Bɔ’m ɔje’n dè’m nga, ké i ndige kade ra’m lé wa?

Njérɔge awi se Jésu non maw njèkuje nyan-mese’t

12Njèkan dè njérɔge ke aru dɔg se njérɔge le’n a, se ngann njé ngonm looge le Juipge uwei Jésu tɔi nin njanm-njanm. 13Go’t ɓaa, ei in-in se’n awi ra Hanne’t kété pa ɓita. Hanne nga è wum Caiphe ke dingem. Caiphe è maw njèkuje nyan-mese kêm ɓaln’t nè nga. 14E Caiphe nè nga kuwe á ndɔ ke ede Juipge gostà ede nè:

– E soo’t ngain kade doo karé wei tede le kosdooge.

Simon Pierre naje se ra’n dè Jésu’t

(An-in Matt 26.69-70; Marc 14.66-68; Luc 22.55-57 tɔ)

15Simon Pierre se njèkuwe-gir-Jésu karé ke rang ndolèi go Jésu. Njèkuwe-gir-Jésu karé ke rang nè nga aw se’n nan’t kêm geng’t le maw njèkuje nyan-mese. Njèkuwe-gir-Jésu nè nga, maw njèkuje nyan-mese ger’n kété. 16Nè Pierre nda nata ngɔr se tà kei. Njèkuwe-gir-Jésu karé ke rang ke maw njékuje nyan-mese ger’n nga tee aw nata ede tà dinye ke njè ngonm tà kei ade inye loo ade Pierre ree kêm kei . 17Dinye ke è ngonn njèndi ke nda à ngonm tà kei deje Pierre ede nè:

– Ké i géa i ke dann njékuwe-gir dingem’t nè nga tɔ lé wa?

Pierre tam ede nè:

– Ḿ-m̀, man m’ee ke dann de’t lé.

18Kul on ngain. Njérɔge se ngann njéndige umi kul poro ndii à ndibi. Pierre géa ndi se de à ndibe por tɔ.

Maw njèkuje nyan-mese Hanne deje tà Jésu

(An-in Matt 26.59-66; Marc 14.55-64; Luc 22.66-71 tɔ)

19Maw njèkuje nyan-mese deje Jésu tà ɔje dè njékuwe-girnge a, ɔje dè nyan ke è ndó dooge a tɔ. 20Jésu ile’n dè’t ede nè:

– Man m’ede dooge malang ke dè nang nè tà nata mbeng. M’ndó de nyan se ndɔge malang kêm kei kebe nange’t se kêm kei le Nube ke è loo kebe nan le Juipge malang. Nyan ke ndɔ ke m’ndó de nga è se go ngein lé. 21Ké bain á i deje’m tà nè titeke bè wa? An! njé ke ndɔ ke ooi tàge ke m’tam nga á ndai nè. I deje de ɓaa, à edi nin tede geri maje.

22Loo ke njè ngonm tà kei le Nube nda oo tàge ke Jésu tam nè bè baa, unde mbɔr’n se ji’n njanm ede nè:

– Ké maw njèkuje nyan-mese kuwe ile’n dè tà’t titeke bè wa?

23Jésu deje njè ngonm tà kei nè nga ede nè:

– Ɔrgir tà ke majelé ke m’tam nga ade d’oo. Ke nè á m’tam tà ke maje ɓaa, unde’m tede ri wa?

24Hanne in se Jésu ke kété ule se’n ra Caiphe, maw njèkuje nyan-mese’t se kule ke dé tɔ’n nga jinn’t mɔngong ɓai.

Pierre tel naje se ra’n dè Jésu’t

(An-in Matt 26.71-75; Marc 14.69-72; Luc 22.58-62 tɔ)

25Simon Pierre ndi gutenn’t à ɔde nan ndibe por kuwe ɓai. Dé deje’n d’ede nè:

– Ké i géa i ke dann njékuwe-gir doo nyan le doo’t nè nga tɔ lé wa?

Pierre naje se ra’n ede nè:

– Ḿ-m̀, man m’ee ke dann de’t lé.

26Paja le maw njèkuje nyan-mese karé è se de loon’t tɔ. E noje dingem ke ndɔ ke Pierre tuge gir mbi’n yap. E deje Pierre ede nè:

– Ké i nga kété m’an-in se Jésu kêm loo man kagege nga lé wa?

27Pierre tel naje se ra’n kuwe ɓai. Ke loon’t nè kuwe, kuren kunje non kɔkerɔ kon.

Njérɔge awi se Jésu non Pilate’t

(An-in Matt 27.1-2,11-14; Marc 15.1-5; Luc 23.1-5 tɔ)

28Njékɔr non Juipge in-in se Jésu ra Caiphe’t se ndɔgé ɓat awi se’n kêm kei le Pilate njèkonɓee. Juipge ke awi se’n nga, ilei nja de kêm kei lé. Ei ndigi le kade ra de mine lé tede le kuse’n nyan nan Paque. 29Gir’n ke nè á njèkonɓee Pilate tee ree inge’n de nata. E deje de ede nè:

– Dingem nè nga, ké tà ri á i sêki nin wa?

30Juipge ilei nin dè’t edi nè:

– Ke nè á doo nyan le doo nè nga è njè ra majelé lé ɓaa, né j’ayé k’ule’n jii’t lé.

31Pilate ede de ede nè:

– Sei kuwe i taai nin, i gangi tà dènn’t se go gute-ndu le si.

Juipge teli ilei Pilate dè’t edi nè:

– Gute-ndu le jè inye loo ade jè le tɔl doo lé.

32Tà ke Jésu tam ɔje dè ɓer ke d’ayé ɓer’n kade kage-ke-dese’t nga aw loon’t deĵ.

Pilate deje tà Jésu kêm kei kɔge-loo gangtà’t

33Pilate tel aw kêm kei kɔge-loo gangtà’t. E ɓar Jésu deje’n ede nè:

– Ké i nga i Ngar le Juipge wa?

34Jésu deje Pilate ede nè:

– Dooge ke rang á edi nin tà nè nga ɔji dè’m, ké i kuwe in se kêmi i deje’m tà nè wa?

35Pilate ile jésu dè’t ede nè:

– Ké man m’ee Juip wa? E girkoje lei se maw njékuje nyan-mesege á d’ulei jim’t. A ɓaa, ke mbain kuwe è ri á i ra wa?

36Jésu ile Pilate ede nè:

– Konɓee le’m è ke nang nè lé. Ke nè á konɓee le’m è ke dè nang nè ɓaa, pajage le’m ayé kan-in rɔ dèm’t kade d’ule’m ji Juipge’t lé. Kerɔte kuwe, konɓee le’m è ke dè nang nè lé.

37Pilate tel deje Jésu ede nè:

– A ɓaa, ké i ngar wa?

Jésu tel ilé dè’t ede nè:

– E kuwe i tam non. Man Ngar. Kede dooge ngarankum tà á è gir nyan ke d’oje’m d’ade m’ree’n dè nang nè. Nanan ke è le ngarankum tà ɓaa, à ur mbi’n le koo’n ndu’m.

38Pilate tel deje Jésu ede nè:

– Ké ngarankum tà nga è ri wa?

Dé gang tà yo dè Jésu’t

(An-in Matt 27.15-31; Marc 15.6-20; Luc 23.13-25 tɔ)

Loo ke Pilate deje Jésu tà nè nga bè ɓaa, tel unde loo tee aw ra Juipge’t nata ede de ede nè:

– Man ɓaa, m’an tà karé bè ke uwe dè dingem nè nga lé. 39Nè m’a m’ɔr dangai karé k’inye’n dɔ kade sei se go nyangirkà le si ndɔ ra nan Paque. Ké i ndigi kade m’ɔr ngar le Juipge nga m’inye’n dɔ m’ade sei wa?

40Juipge teli rai nyan wuu edi nè:

– Ḿ-m̀, è n’ee lé, nè è Barabbas.

Barabbas nga è gon-ɓog.

Currently Selected:

Jean 18: GUL04

Highlight

Copy