Salamo 97
97
SALAMO 97#97 Araka ny filazan’ny Septanty sy ny Volgata, ity Salamo ity dia nataon’i Davida rehefa tafaverina taminy ny taniny (taorian’ny fikomian’i Absalôma). (Volgata 96)
I Iaveh Mpandresy
1Mpanjaka i Iaveh: aoka hifaly ny tany;
Aoka hiravoravo ny nosy maro!
2Rahona aman’aloka no manodidina Azy,
rariny sy hitsiny no iorenan’ny seza fiandrianany.
3Afo no mandroso eo alohany,
sady mandevona ny fahavalony manodidina.
4Mahazava izao tontolo izao ny tselany,
mahita izany ny tany ka mipararetra.
5Miempo hoatry ny savoka ny tendrombohitra eo anatrehan’i Iaveh,
dia eo anatrehan’ny Tompon’ny tany rehetra.
6Ny lanitra mitory ny fahamarinany,
ary ny firenena rehetra mibanjina ny voninahiny.
7Hangaihay izay rehetra mivavaka amin’ny sarin-javatra,
izay mirehareha amin’ny sampiny.
Hiankohoka eo anatrehany ny andriamanitra rehetra#97,7 Hiankohoka eo anatrehany ny andriamanitra rehetra (teny hebrio Elohima). Amin’ny Septanty sy ny Volgata dia milaza izany teny izany hoe: Miankohofa aminy, ianareo Anjeliny rehetra. Ny mpanoratra ny Heb 1,6 raha milaza ny Zanak’Andriamanitra tonga olombelona, dia mamerina izany teny izany..
8Nandre i Siôna, ka nifaly;
niravoravo ireo zanakavavin’i Jodà,
9satria Ianao, ry Iaveh, no Avo Indrindra ambonin’ny tany rehetra;
Ianao dia tafasandratra indrindra ambonin’ny andriamanitra rehetra.
10Mankahalà ny ratsy, ianareo izay tia an’i Iaveh;
miaro ny fanahin’ny mpino Azy Izy,
dia manafaka azy amin’ny tanan’ny ratsy fanahy.
11Afafy ho an’ny marina ny fahazavana,
ary ho an’ny mahitsy fo ny fifaliana.
12Mifalia amin’i Iaveh, ry olo-marina,
ary manomeza voninahitra ny Anarany masina.
Currently Selected:
Salamo 97: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.
