Matio 9

Ny nanasitranana ilay malemy

(Jereo Mk 2,1-12; Lk 5,17-26)

1Ary niondrana tamin’ny sambo kely Izy, dia nita ka tonga tao an-tanànany. 2Dia indro nisy lehilahy anankiray malemy nandry tamin’ny fandriany nentin’ny olona teo aminy. Nony nahita ny finoan’ireo i Jesoa, dia hoy Izy tamin’ilay malemy: «Matokia, anaka, fa voavela ny helokao.» 3Tamin’izay ny sasany tamin’ny mpanora-dalàna nanao anakampo hoe: «Miteny ratsy an’Andriamanitra Ilay io.» 4Fa i Jesoa nahalala ny eritreriny ka nanao hoe: «Nahoana ianareo no mieritreri-dratsy ao am-ponareo? 5Inona no moramora kokoa, ny manao hoe: Voavela ny helokao, sa ny manao hoe: Mitsangàna, ka mandehana? 6Ary mba ho fantatrareo fa ny Zanak’olona manam-pahefana etỳ an-tany hamela heloka, dia hoy Izy tamin’ilay malemy: Mitsangàna, ento ny fandrianao, ary modia any an-tranonao.» 7Dia nitsangana izy ka nody tany an-tranony. 8Nony nahita izany ny vahoaka, dia natahotra sy nankalaza an’Andriamanitra noho Izy nanome ny olona fahefana toy izany.

Ny niantsoana an’i Matio

(Jereo Mk 2,13-14; Lk 5,27-28)

9Ary nony niala teo i Jesoa dia nahita lehilahy anankiray atao hoe Matio, nipetraka teo am-pamorian-ketra, ka hoy Izy taminy: «Andeha hanaraka Ahy ianao.» Dia nitsangana izy ka nanaraka Azy.

Nisakafo niaraka amin’ny mpanota

(Jereo Mk 2,15-17; Lk 5,29-32)

10Ary raha nisakafo tao an-tranon’i Matio i Jesoa, dia nisy poblikanina sy mpanota betsaka tonga niara-nihinana tamin’Izy sy ny mpianany. 11Ka nony nahita izany ny Farisianina, dia nilaza tamin’ny mpianany hoe: «Nahoana ity Mpampianatrareo no miara-mihinana amin’ny poblikanina sy ny mpanota?» 12Fa hoy i Jesoa nandre izany: «Tsy ny finaritra no mila mpanao fanafody, fa ny marary. 13Mandehana àry ianareo, ka fantaro ny hevitr’izao teny izao: Ny famindram-po no sitrako, fa tsy ny sorona#9,13 Fa tsy ny sorona. Izany hoe: mihoatra noho ny sorona na ny fomba ivelany rehetra momba ny fivavahana.; fa tsy tonga hiantso ny marina Aho, fa ny mpanota.»

Ady hevitra momba ny fifadian-kanina

(Jereo Mk 2,18-22; Lk 5,33-39)

14Tamin’izay, dia nankao aminy ny mpianatr’i Joany, ka nanao hoe: «Nahoana izahay sy ny Farisianina no mifady hanina matetika, fa ny mpianatrao kosa no tsy mba mifady?» 15Ary hoy i Jesoa taminy: «Moa mahazo misaona va ny zanaky ny mpampakatra#9,15 Ny zanaky ny mpampakatra, dia ny nàmany sy sakaizany; i Jesoa Kristy no toa mpampakatra, ary ny Apôstôly no sakaizany. raha mbola eo aminy ny mpampakatra? Fa mbola ho avy ny andro hanesorana ny mpampakatra hiala aminy, ka amin’izay vao hifady hanina izy. 16Ary tsy misy olona manampina akanjo tonta amin’ny tapa-damba vaovao, fa handrovitra ny tonta ny vao ka hitatra ny rovitra#9,16-17 Ny lamba sy ny divay vaovao, dia ny Evanjely, ary ny tonta kosa dia ny fomba taloha narahin’ny Farisianina. 17Ary ny barìka hoditra tonta tsy mba fasiana divay vaovao; fa raha izany, dia ho vaky ny barìka, ka ny divay raraka, ary ny barìka simba; fa ny barìka hoditra vaovao no fasiana divay vaovao, dia samy maharitra izy roroa.»

Ny nanasitranana ilay vehivavy nitsi-dra sy ny namelomana ny zanakavavin’i Jaira

(Jereo Mk 5,21-43; Lk 8,40-56)

18Raha mbola niteny izany tamin’ireo Izy, dia indro nisy lehiben’ny sinagoga anankiray niditra nanatona sy nitsaoka Azy, ka nanao hoe: «Tompoko, maty vao izao ny zanako vavy, ka andeha re hametraka ny tananao aminy, dia ho velona izy.» 19Dia nitsangana i Jesoa, ka nandeha nanaraka azy Izy mbamin’ny mpianany. 20Ary indro nisy vehivavy nitsi-dra nandritra ny roa ambin’ny folo taona, nanatona Azy avy eo ivohony, ka nanendry ny morontongotr’akanjony; 21fa hoy izy anakampony: «Na dia ny akanjony ihany aza no ho voakasiko, dia ho sitrana aho.» 22Ary nitodika i Jesoa ka nahita azy, dia nanao hoe: «Matokia, anaka, ny finoanao no nahasitrana anao.» Hatramin’izay dia sitrana ravehivavy. 23Nony tonga tany an-tranon’ilay lehibe i Jesoa, ka nahita ny mpitsoka sodina sy ny olona maro nitabataba, dia nanao hoe: 24«Mialà ianareo, fa tsy maty akory razazavavy, fa matory.» Dia nihomehezan’ireo izy. 25Ary rehefa navoaka ny olona, dia niditra izy, ka nandray ny tanan’ilay zazavavy, dia nitsangana io. 26Ary niely tamin’izany tany rehetra izany ny lazan’izany.

Ny nanasitranana ireo jamba roa lahy

(Jereo Mt 20,29-34)

27Ary nony niala teo i Jesoa, dia nisy jamba roa lahy nanaraka Azy, sady niantso mafy nanao hoe: «Ry Zanak’i Davida ô! mamindrà fo aminay.» 28Nony tonga tany an-trano Izy, dia nanatona Azy ireto jamba, ary hoy i Jesoa taminy: «Moa mino ianareo fa mahay manao izany Aho?». «Eny, Tompoko» hoy ireo taminy. 29Dia notendreny ny masony, ka hoy izy: «Aoka ho tanteraka aminareo araka ny finoanareo.» 30Dia nihiratra ny masony, ary i Jesoa nandrara azy mafy hoe: «Tandremo sao ren’olona izao.» 31Kanjo nony nandeha ireo, dia nampiely ny lazany tamin’izany tany rehetra izany.

Ny nanasitranana ilay moana azon’ny demony

(Jereo Mt 12,22-24; Lk 11,14-15)

32Nony lasa ireo, dia indro nentin’ny olona teo amin’i Jesoa indray ity lehilahy anankiray sady moana no azon’ny demony. 33Ary nony voaroaka ny demony, dia niteny ilay moana ka gaga ny vahoaka sady nanao hoe: «Tsy mbola nisy toy izany tamin’i Israely.» 34Fa ny Farisianina kosa nanao hoe: «Ny lehiben’ny demony no androahany ny demony.»

Fijalian’ny vahoaka

(Jereo Mt 4,23)

35Ary i Jesoa nitety ny tanàna sy ny vohitra rehetra, nampianatra teo amin’ny sinagogany sy nitory ny Evanjelin’ny fanjakan’Andriamanitra, ary nahasitrana ny aretina mbamin’ny rofy rehetra.

(Jereo Mk 6,34; Lk 10,2)

36Onena Izy nahita ireto vahoaka be nijaly sy nafoy#9,36 Nafoy: nariana. toy ny ondry tsy misy mpiandry. 37Dia hoy Izy tamin’ny mpianany: «Ny vary hojinjaina be, fa ny mpijinja no vitsy; 38koa mihantà amin’ny Tompom-bary mba haniraka mpijinja amin’ny variny.»

Currently Selected:

Matio 9: MBC

Highlight

Copy