Jeremia 8
8
1Amin’izany andro izany, - teny marin’i Iaveh, -
hofongarina avy ao am-pasany,
ny taolan’ny mpanjakan’i Jodà,
ny taolan’ny mpanapaka ao aminy,
ny taolan’ny mpaminany,
ary ny taolan’ny mponina ao Jerosalema.
2Fa hahahy eo anatrehan’ny masoandro amam-bolana,
mbamin’ny tafiky ny lanitra rehetra,
izay efa tiany, notompoiny, narahiny,
nilany hevitra ary niankohofany teo anatrehany;
ka tsy hangonina na halevina ireo taolana ireo,
fa hanjary zezika eo ambonin’ny tany.
Ary ny ho faty fa tsy ho velona, no ho aleon’
3izay sisa tavela rehetra amin’ity taranaka ratsy ity,
any amin’ny tany handroahako azy any,
- teny marin’i Iavehn’ny tafika. -
Fandrahonana, fitarainana, fampianarana.
Ny nivadihan’i Israely
4Lazao azy ireo hoe: Izao no lazain’i Iaveh:
«Moa ny lavo, tsy miarina va?
ary moa ny diso lalana, tsy miverina va?
5Ka nahoana àry ity vahoaka eto Jerosalema no efa diso lalana,
ka no dia mbola mizotra amin’ny hadisoana ihany?
Fa mikikitra mafy amin’ny fitaka izy ireo,
ka tsy mety miverina akory.»
6«Nitandrina tsara Aho ary nihaino:
Tsy miteny araka ny mety izy ireo;
tsy misy manenina amin’ny haratsiany,
na manao hoe: Inona re ity nataoko e?
Fa dia samy rafitra mihazakazaka indray avokoa,
hoatra ny soavaly miezaka ho amin’ny ady!
7Ny vano eny amin’ny habakabaka aza
mahalala ny fotoan’androny#8,7 Fotoan’androny: Izany hoe ny andro izay tsy maintsy hialany amin’ny tany mangatsiaka, mba hankanesany any amin’ny tany mafana; toy izany no fanaon’ny vorona domohina, sy ny sidintsidina ary ny vanobe.,
ny domohina aman-tsindintsidina mbamin’ny vanobe,
samy mitandrina ny fotoam-piverenany koa;
fa ny vahoakako kosa, tsy mahalala
ny lalàn’i Iaveh.
Ny lalàna eo an-tanan’ny Mpisorona
8Ahoana no ahalazanareo hoe Hendry izahay,
ary mby ato aminay ny lalàn’i Iaveh?
Indro fa ny fandaharan-dainga nataon’ny mpampiana-dalàna
mahatonga izany ho lainga!
9Ny hendry dia efa mahazo henatra,
miraviravy tanana, ary voasambotra;
indro fa nanary ny tenin’i Iaveh izy ireo!
Ka inona intsony no ho fahendreny eo...?
Famerenana fandrahonana
(Jereo Jer 6,12-15)
10Noho izany, dia homeko ny hafa ny vadiny,
ary ny sahany homeko ny tompo hafa;
satria hatramin’ny kely indrindra ka hatramin’ny lehibe indrindra,
samy manao filàna tsy marina avokoa;
ary hatramin’ny mpaminany ka hatramin’ny mpisorona,
samy mpamitaka avokoa.
11Ataotaony foana ny fitsaboana ny ferin’ny zanaka vavin’ny vahoakako,
lazainy hoe: Fiadanana! Fiadanana!
Nefa tsy misy fiadanana tsinona.
12Homenàrina izy, fa nanao fahavetavetana,
nefa tsy mba mahalala menatra intsony izy,
ary tsy mba valahara!
koa dia hiara-davo amin’izay lavo izy ireo;
ary hiteraka amin’ny andro hamangiako azy izy»,
hoy i Iaveh.
Fandrahonana an’i Jodà foto-boaloboka
13Indro horaofiko izy ireo, dia hongoahako, -
teny marin’i Iaveh. -
Ny voaloboka tsy misy voam-boaloboka intsony;
ny aviavy tsy misy voan’aviavy intsony,
ary ny raviny aza malazo!
Ary izy ireo, nanendreko olona hanafika ny taniny.
14Nahoana isika no mitomoe-poana?
Mivoria ianareo, andeha isika ho ao an-tanàna mimanda,
dia aoka ho faty ao;
satria i Iaveh Andriamanitsika mandevona antsika,
sy mampisotro antsika rano misy poizina,
noho ny nanotantsika tamin’i Iaveh!...
15Nanantena fiadanana isika, nefa tsy mahita soa kely akory;
sy andro fanaretana, kanjo fampitahorana no mitranga!
16Re hatrany Dana ny fiefonefon’ny soavaliny#8,16 Soavaliny: Izany hoe, ny soavalin’ny fahavalo..
Raha mahare ny fanenon’ny soavaliny
dia mihorohoro avokoa ny tany.
Tonga izy dia levoniny ny tany mbamin’izay ao aminy,
ny tanàna mbamin’ny mponina ao aminy.
17Fa indro alefako hamely anareo
ny bibilava sy ny aspìka,
izay tsy leon’ny ody fankatoavana;
dia hanaikitra anareo ireny, - teny marin’i Iaveh. -
Mosary itarainan’ny mpaminany
(Jereo Jer 5,20-25; 14)
18Indrisy, ry fampiononana ahy amin’ny fahoriako ô!
Reraka ny foko ato anatiko!
19Injany tonga amiko avy any an-tany lavitra,
ny fitarainan’ny zanaka vavin’ny oloko manao hoe:
Tsy ao Siôna intsony va i Iaveh?
Tsy ao afovoany intsony va ny mpanjakany?
Nahoana izy ireo no nampahatezitra ahy tamin’ny sampiny,
sy tamin’ny zava-poana#8,19 Zava-poana. Izany teny izany dia mazàna hita ao amin’ny Baiboly Masina izay entina milaza ny andriamanitra sandoka, mba hanambaràna ny tsy fananany hery. avy any amin’ny firenen-kafa?
20Lasa ny fararano, tapitra ny fampakaram-bokatra
nefa isika ity tsy mbola voavonjy!
21Mangana aho amin’ny hamanganan’ny zanaka vavin’ny oloko;
misaona aho ary raiki-tahotra aho.
22Tsy misy baoma intsony any Galaada,
tsy misy dokotera intsony va any?
Sa nahoana no tsy nasiana
bandy ny zanaka vavin’ny oloko? #8,22 Baoma: ditin-kazo manitra aok’izany erỳ, ka katsahin’ny olona any Azia sy Palestina sady vidîny lafo; ka ny baoma tao Galaada, no voalaza ho ambony indrindra, ao amin’ny Soratra Masina. Jereo toko 66,11; 51,8; Jen 37,25.
23Iza no hanova ny lohako ho rano?
sy ny masoko ho loharanon-dranomaso,
mba hitomaniako andro aman’alina,
ireo maty tamin’ny zanaka vavin’ny oloko?
Currently Selected:
Jeremia 8: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.
