Izaia 52
52
1Mifohaza, mifohaza, tafio ny herinao, ry Siôna!
Tafio ny fitafiana fitondranao amin’ny fety,
ry Jerosalema tanàna masina ô!
Fa ny tsy mifora#52,1 Ny tsy voafora: Ny firenena mpanompo sampy. sy ny maloto tsy hiditra eo aminao intsony.
2Ahintsano ny vovoka eny aminao; mitsangàna ianao;
mipetraha ianao, ry Jerosalema;
vahao ny fatorana amin’ny vozonao,
ry voababo, zanaka vavin’i Siôna.
Ny antony nahababo ny vahoaka
3Fa izao no lazain’i Iaveh:
Tsy vola tsy harena no nivarotana anareo#52,3 Tsy vola tsy harena no nivarotako anareo: Natolotra ho an’ny Kaldeanina ianareo nefa tsy manam-pahefana hitana anareo izy, ka azoko esorina eo am-pelatanany, araka izay tiako, tsy andoavako avotra na kely akory aza.;
ka dia tsy vola tsy harena koa no hanavotana anareo!
4Fa izao no lazain’i Iaveh Tompo:
Ny honina any no nidinan’ny vahoakako tany Ejipta fahiny;
ary tatỳ aoriana dia nampahorin’i Asora,
tsy ahoan-tsy ahoana izy.
5Koa ankehitriny, inona no hataoko eto?
- teny marin’i Iaveh -
fa nobaboina tsy an-drariny ny vahoakako?
Ny mpifehy azy masiaka, manerona;
- teny marin’i Iaveh,-
ary ny anarako, tevatevaina tsy an-kijanona, isan’andro.
6Koa indro, hahalala ny Anarako kosa ny vahoakako;
eny, ho fantany amin’izany andro izany,
fa Izaho miteny hoe: «Inty aho!»
Mifoha i Iaveh, mifoha i Jerosalema
7Endrey izany hatsaran’ny#52,7 Endrey izany hatsaran’ny, sns. I Masindahy Paoly dia naka izany teny izany ho an’ireo iraka mpitory ny Evanjely (jereo Rm 10,15). tongotr’ilay iraka eny an-tendrombohitra,
izay mitory ny vaovao mahafaly, dia ny fiadanana;
ilay manambara ny fahasambarana, ilay mitory ny famonjena;
ilay milaza amin’i Siôna hoe:
«Manjaka ny Andriamanitrao!»
8Ny feon’ny mpitilinao! Manandra-peo izy ireo,
miara-mihoby an-kafaliana,
satria hitany maso
ny fiverenan’i Iaveh ao Siôna.
9Miaraha mihoby an-kafalina,
ry Jerosalema rava!
Fa i Iaveh efa nampionona ny vahoakany,
sy efa nanavotra an’i Jerosalema.
10Nasehon’i Iaveh ny sandrin’ny fahamarinany,
hiharihary eo imason’ny firenena rehetra.
Ary ny faran’ny tany rehetra,
hahita ny famonjen’ny Andriamanitsika.
11«Mialà, mialà, mivoaha teo ianareo;
aza mikasika izay maloto.
Mivoaha avy ao aminy, mandiova tena ianareo,
izay mitondra ny fanak’i Iaveh.
12Fa tsy hikoropaka no hivoahanareo,
ary tsy handositra no ho fandehanareo;
fa i Iaveh no mandeha eo alohanareo,
ary ny Andriamanitr’i Israely#52,12 Andriamanitr’i Israely: Izany hoe, amin’ny fiaingàna avy any Babilôna, dia hoangoniny ireo vodilalana amin’ny tafika, ka izy no hitarika ny vodilalana, tahaka ny nitondrany ny vahoakany fony niala tany Ejipta. Teo alohan’i Israely izy, ary ny Anjeliny sy rahony no nataony mpitari-dalana; ka raha manatona hamely an’i Israely ny fahavalo, dia hosaronany amin’ny alony, ary izy dia ho ao afovoan’izy ireo tahaka ilay nataony fahiny, raha nita ny Ranomasina Mena ny Zanak’i Israely (ampitahao amin’ny Eks 13,21; 14, 19, 20). no ho vodilalanareo!»
Hira fahefatr’ilay Mpanompon’i Iaveh
(Jereo Iz 42,1; Sal 22; Fah 2,12-24)
13Indro fa hambinina ny Mpanompoko#52,13 Indro fa hambinina ny mpanompoko: Araka ny filazan’ireo Ray ao amin’ny Fiangonana sy ny mpivaofy Soratra Masina, hatreto amin’ity andininy ity, ka hatramin’ny faran’ny toko manaraka, dia tsy manao teny atsipin’ny mpanam-panahy momba an’i Sirosy sy i Babilona intsony i Izaia, fa ny momba ny Mesia ihany no lazainy; noho izany ho foana ny fitadiavan’ireo Raby (olon-kendry tamin’ny Jody, izay natao ho mpanora-dalàna sy mpampianatra ny Soratra Masina) izay mitady amin’ireo teny ireo, hahita filazana an’i Jeremia, na Josiasa, na i Zôrôbabela, na i Esdrasa, na ny vahoaka Jody; satria tsy misy na iray akory aza amin’ireo olona ireo izay mifanandrify amin’ny faminaniana.,
hitombo, hankalazaina, ary ho tafasandratra indrindra.
14Toy ny nigagan’ny maro nahita azy,
- fa rava endrika loatra izy,
ka ny tarehiny efa hoatra ny tsy tarehin’olombelona intsony;
ary ny tavany efa hoatra ny tsy tavan-janak’olombelona intsony, -
15no hampiontanany firenena maro.
Hitampim-bava eo anatrehany ny mpanjaka,
satria hahita ny tsy mbola nolazaina taminy,
sy handre ny tsy mbola reny.
Currently Selected:
Izaia 52: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.
