Ezekiela 36

Tenin’Andriamanitra momba ireo tendrombohitr’i Israely

1Ary ianao, ry zanak’olona, maminania amin’ny tendrombohitr’i Israely ka ataovy hoe: Ry tendrombohitr’i Israely, mihainoa ny tenin’i Iaveh#36,1-15 Rehefa voaroaka hiala amin’i Jodà ny fahavalo (1-7) dia aoka handroso hankao kosa ny vahoaka vaovao (8-15).: 2Izao no lazain’ny Tompo Iaveh: Noho ny fahavalo nilaza ny aminareo hoe: «Hia! Hia! lasanay ny fanananay ny havoana fahagola!» 3Noho izany dia maminania, ka ataovy hoe: Izao no lazain’ny Tompo Iaveh: Noho ny andravan’ny olona sy nanitsakitsahan’ny tongony anareo, hatraiza hatraiza, mba hahatongavanareo fananan’izay sisa amin’ny firenena, ary noho ianareo tonga fitenenan’ny vava mitsaontsaona, sy firesaka ratsin’ny olona; 4noho izany, ry tendrombohitr’i Israely, dia mihainoa ny tenin’ny Tompo Iaveh: Izao no lazain’ny Tompo Iaveh amin’ny tendrombohitra sy havoana, amin’ny hantsan-driaka sy ny lohasaha, amin’ny toeran-dravarava mahalao monina sy amin’ny tanàna haolo, izay efa natolotra horobaina sy hihomehezan’ny sisa amin’ny firenena manodidina; 5noho izany, izao no lazain’ny Tompo Iaveh: Eny, noho ny firehitry ny fahasaro-piaroko, no nitenenako namely izay sisa amin’ny firenena sy namely an’i Idomea manontolo izay nisazoka ny taniko ho fananany tamin’ny hafalian’ny fony rehetra sy tamin’ny fanesoan’ny fanahiny, hataony fandroba foana. 6Koa noho izany maminania ianao ny amin’ny tanin’i Israely, ary lazao amin’ny tendrombohitra sy ny havoana, amin’ny hantsan-driaka sy ny lohasaha hoe: Izao no lazain’ny Tompo Iaveh: Indro Aho miteny amin’ny fahasaro-piaroko amam-pahatezerako, satria ianareo nitondra ny latsa avy tamin’ny firenena.

7Koa noho izany, izao no lazain’ny Tompo Iaveh: Efa nanangan-tanana Aho#36,7 Efa nanangan-tanana Aho: Efa nianiana Aho.! Ireo firenena manodidina anareo, dia hitondra latsa koa izy ireo. 8Ary ianareo kosa, ry tendrombohitr’i Israely, haniry ny rantsanareo, sy hahavokatra ny voanareo ho an’i Israely vahoakako; fa efa akaiky ny hiaviany. 9Indro Aho ho avy eo aminareo, sy hitodika ny tavako ho aminareo, ka dia hasaina sy hofafazana ianareo. 10Hohamaroiko ny olona eo aminareo, dia ny taranak’i Israely rehetra rehetra; ny tanàna, honenana; ary ny efa rava, haorina indray.

11Hampitomboiko ny olona sy ny biby fiompy eo aminareo; ka ho maro sy hitombo ireny; hataoko honenan’olona toy ny taloha ianareo. Hanao soa aminareo, mihoatra noho ny tamin’ny niandohanareo Aho; ka ho fantatrareo fa Iaveh Aho. 12Hitondra olona ho eo aminareo Aho dia i Israely vahoakako, ka izy hanana anao; ho lovany ianao, ary tsy hahalany fara azy intsony.

13Izao no lazain’ny Tompo Iaveh: Noho ny anaovany aminareo hoe: «Nandany olona ianao, sady nahalany fara ny firenenao:» 14noho izany dia tsy handany olona intsony ianao, na hahalàny fara ny firenenao, - teny marin’ny Tompo Iaveh.- 15Tsy avelako handre latsa avy amin’ny firenena intsony ianao, na hitondra fanaratsiana avy amin’ny firenena, sady tsy hahatafintohina ny firenenao koa, -teny marin’ny Tompo Iaveh.-

16Tonga tamiko ny tenin’i Iaveh nanao hoe#36,16 Ny antony namonjen’Andriamanitra an’i Israely tsy mba noho ny fahamendrehany; fa tsy nibebaka izy, na dia eny am-pielezana eny aza; fa nampitomboiny aza ny fahotany, ka tafintohina hatramin’ny mpanompo sampy aza. Fa noho ny voninahitry ny Anarany no namonjen’Andriamanitra azy sy nampodiany azy any amin’ny tany masina. Ary ao Izy mbola hanamasina azy ireo.: 17Ry zanak’olona, ry zareo taranak’i Israely, fony izy nitoetra teo amin’ny taniny, dia nandoto azy, tamin’ny fitondran-tenany aman’asany; fa ny fitondran-tenan’izy ireo dia toy ny fahalotoan’ny vehivavy teo anatrehako. 18Ka naidiko tamin’izy ireo ny fahatezerako, noho ny ra nalatsany tamin’ny tany, sy noho ny nandotoany azy tamin’ny sampiny vetaveta. 19Naeliko ho any amin’ny firenena izy ireo, ka nahahaka tany amin’ny tany samihafa. Notsaraiko araka ny fitondran-tenany aman’asa nataony izy. 20Nony mby tany amin’ny firenena nalehany izy ireo, dia nanala baraka ny Anarako Masina#36,20 Nanala baraka ny Anarako: Izany hoe, izy ireo nampiseho tamin’ireo fokom-pirenena samihafa izay tsy nahalala Ahy, fomba aman-toetra mety hanamavo ny Anarako. Fa niseho taminy izy ho tena tsy tia vavaka sy tena ratsy, nefa vahoaka milaza ny tenany ho olom-boafidy sy nahazo tombon-tsoa tamin’Andriamanitra Mpahary ny lanitra sy ny tany (Iz 48,9; 52,5)., fa izao no filazan’ny olona azy: «Ireo no olon’i Iaveh, avy any amin’ny taniny no nialany.» 21Ka nangoraka ny Anarako Masina Aho, izay nalan’ny taranak’i Israely baraka, tamin’izay firenena nalehany any.

22Noho izany, lazao amin’ny taranak’i Israely hoe: Izao no lazain’ny Tompo Iaveh: Tsy noho ny aminareo, no anaovako an’izao, ry taranak’i Israely, fa noho ny Anarako Masina izay nalanareo baraka, tany amin’ny firenena nalehanareo. 23Hohamasiniko ny Anarako lehibe izay voaala baraka, eny amin’ny firenena nanalanareo baraka azy, dia ho fantatry ny firenena fa Tompo Iaveh Aho - teny marin’ny Tompo Iaveh, - rehefa manamasin-tena ao aminareo, eo imasony Aho. 24Halaiko avy any amin’ny firenena ianareo, hangoniko avy any amin’ny tany rehetra ka hampodiko eo amin’ny taninareo. 25Hofafazako rano madio ianareo, dia hadio#36,25 Hofafazako rano madio ianareo dia... Izany dia hain-teny enti-milaza ireo famafazan-drano, fomba fanao fahiny tamin’ny Hebrio mba ho fidiovana amin’ny loto araka ny lalàna, izay tandindon’ilay fidiovana atỳ aoriana amin’ny Ran’i Jesoa Kristy. Ny Rain’ny Eglizy sy ny ankamaroan’ny mpivaofy Soratra Masina milaza fa ireo fampanantenana voalaza amin’ity andininy ity sy ny manaraka, dia tanteraka tamin’ny Fanekena vaovao, ka i Jesoa Kristy no Mpanalalana. Ka izay ho voaray ho isan’ny fanjakan’Andriamanitra dia hadio, tsy hoe ny eo ivelany fotsiny, fa hatrany amin’ny fony izay miafina indrindra; ny Fanahin’Andriamanitra no hanova toetra azy ireo, ka hahatonga azy ho tena mora toroana amin’ny lalàny.; ny fahalotoanareo rehetra mbamin’ny fahavetavetanareo rehetra, ataoko afaka aminareo. 26Homeko fo vaovao ianareo, ary hasiako fanahy vaovao ao anatinareo; hoesoriko amin’ny nofonareo ny fo vato, ka homeko fo nofo ianareo. 27Hataoko ao anatinareo ny Fanahiko, ary hataoko manaraka ny fitsipiko ianareo, ka hitandrina ny didiko, sy hanaraka izany. 28Honina eo amin’ny tany nomeko ny razanareo ianareo, dia ho vahoakako ianareo, ary Izaho ho Andriamanitrareo. 29Hovonjeko ianareo ho afaka amin’ny lotonareo rehetra; hantsoiko ny vary, ary hataoko be dia be, ary tsy haniraka mosary aminareo intsony Aho. 30Hampitomboiko ny voankazo, mbamin’ny vokatry ny saha, mba tsy hitondranareo intsony latsa ama-mosary eo amin’ny firenena. 31Hahatsiaro ny lalan-dratsinareo ianareo mbamin’ny asa tsy mety nataonareo, ka haharikoriko anareo ny tenanareo, noho ny hadisoanareo amam-pahavetavetanareo. 32Tsy noho ny aminareo no anaovako izany, - teny marin’ny Tompo Iaveh, - ka aoka ho azonareo izany; aoka ho menatra sy hivoaramena ianareo, noho ny nataonareo, ry taranak’i Israely. 33Izao no lazain’ny Tompo Iaveh: Amin’ny andro hanadiovako anareo ho afaka amin’ny helokareo rehetra, dia haveriko ho amin’ny tanànany ny mponina ao aminy, ary ny efa rava haorina indray. 34Ny tany voarava, hasaina, izy izay efa tany lao teo imason’ny mpandalo rehetra. 35Holazaina hoe: «Io tany io efa foana teo, nanjary hoatra ny sahan’i Edena, ary ny tanàna efa rava, lao, nirodana, efa misy mponina hoatra ny tanàna mimanda.» 36Ary ho fantatry ny firenena sisa tavela manodidina anareo, fa Izaho Iaveh dia nanorina indray ny efa rava, namboly ny efa fongotra. Izaho Iaveh sady nilaza no manatanteraka!

37Izao no lazain’ny Tompo Iaveh: Amin’izao koa Aho no mba hety hotadiavin’ny taranak’i Israely mba hanaovako izany ho fanasoavana azy: hohamaroiko toy ny biby fiompy ny olona. 38Toy ny andian’ondry masina, toy ny andian’ondry any Jerosalema, amin’ny fetiny lehibe, ny olona hanao andiany, hameno ny tanàna rava; dia ho fantatry ny olona fa Iaveh Aho.

Currently Selected:

Ezekiela 36: MBC

Highlight

Copy