Mal 9
9
1Nde wabweese kubaleele ti: «Ngwanwa me nyiluleeriri, babamosi mu bateleme hamaha, bafwa ko, natee bakiri kumono Kimfumu kya Nzaambi kiisiri mu mpinu.»
Yesu wakituka
(Mat 17.1-13; Luk 9.28-36)
2Biluumbu bisaamunu bu byaluta, Yesu waholo Petelo, Yakobo na Yowane, na wabatoombolo ku yulu mulaandu wadzaangama, kwa bo bakaka. Nde wakituka ha busu bwa bo; 3binkuta bya nde byaba byeki seme kwalaka, byahembeke mu kiteesu kiri lo, kwahele muhembikisi-mansaanda ti mosi ha butoto, wubangisina kuhembekese bubwo. 4Eliya na Moose bamonokono, bari mu ku kudzoonso na Yesu. 5Petelo wabaangula mbeembu, waleele kuri Yesu ti: «Muyikisi, buri bwabubwete ti tubeeneenu haaka na tutuungeenu misaampu mitatu, mosi wa ye, mosi wa Moose, na mosi wa Eliya.»
6Petelo waba wahele kuyaaba dya kuleele, bukuri baba na boomo. 7Tuti dyayisa ha yulu bo, na dyabafuka mu mposi yaandi; na mono, mbeembu mosi yayukukuna mu tuti, yaleele ti: «Wumawu ngo Mwaana waami wa mutima, mu ywiileenu!» 8Na sisuu, bayiki bu batala mpele na mpele ha baba, bahele bweese kumono muutu ti mosi, ngo wunu Yesu kitsu na bo-meene.
9Bu baba mu kukulumuka mulaandu, Yesu wabadika ti yaa bayaabisa kuri muutu ti mosi ko, mamo ma bamwiini natee Mwaana muutu fulukiri mu bafwa. 10Bo bakebe musamu wunde, na baba kwefulusinaa bo na bo ti: «Kufuluka mu bafwa mambangukulu nki?»
11Bo bafuula Yesu ti: «Bukuri nki batini ba mangisi bakoleelaa ti Eliya wakiri tekesele na kwiisa?» 12Yesu wabvutula kuri bo ti: «Bunubwo, Eliya wutekesele na kwiisa mu kubvutula bunkete. Ngo, mu nki ntoono diri dyatinu ti Mwaana muutu, sa kamono mpasi dzalaka, na sa kaba wanyaafunu? 13Ngo kasi me nyiluleeriri ti: Eliya wayeki wayisa, na bamuyirikiri myominso mi baba batiiri, bunu bu dyaba dyatinu mu ntoono ya nde.»
Yesu watsinikisa mwaana waba na mpeeve yayibi
(Mat 17.14-21; Luk 9.37-43a)
14Bu batubuka hari bayiki bakaka, bo bamono mpuumbu baatu yayinene yaba yabadyengekele, na batini ba mangisi baba kalikisaana na bo. 15Hanaho, mpuumbu yoyinso bu yamono Yesu, yakimuka. Baatu badzumuna kuri nde mu kumuha mboto. 16Nde wabafuula ti: «Mu nki ntoono lubee saana nkalikisi na babo?»
17Muutu mosi munsa mpuumbu wabvutula kuri nde ti: «Muyikisi, me mbee nyatwaala kuri ye, mwaana me wa mubakala, wuri na mpeeve ya bubaba. 18Mbuti Mpeeve yiyo yimwaamubaka, lo yimutubiri ha nsi, lo fulu dipala mu munwa, wukweete miinu na nyutu yikaangama. Me ndeerirye kuri bayiki ba ye, mpisi babinga mpeeve yiyo, ngo bahele kubangisina.» 19Yesu wabvutula kuri bo ti: «Ha! Kiseendu ki kyahele na kanyi, natee mantaangu makwe me nyiba na beenu? Natee mantaangu makwe me nyikuunda beenu? Muntwalikilee hamaha!»
20Bamunatikina nde, na mpeeve yiyo bu yamono Yesu, hanaho yanyingisa mwaana mu makwa; nde wabwa ha nsi, wabeke kwenengumuke kuri fulu dikwemupala mu munwa. 21Yesu wafuula taayi dya mwaana ti: «Mantaangu makwe mwaana kari kunsa kiteesu ki?» Taayi wabvutula ti: «Kuholosono bulesi bwaandi. 22Mantaangu malaka mpeeve yiyo yimutubaa ku mbaawu, na mu maampa mu kumudzusa. Ngo mbuti ye wakuka mu kusa kitotolo, lo bakisa beetu, tubakila ngebe!» 23Yesu waleele kuri nde ti: «Mbuti ye wakuka, lo momanso mayirimini kuri wunde wusa kanyi.» 24Hanaho, taayi dya mwaana waleele: «Me nsii kanyi, bakisa me mu kanyi di nyiri dyo pe.»
25Yesu bu kamono mpuumbu baatu yiri mu kwisikila, waŋaŋana mpeeve yayibi, waleele kuri yo ti: «Mpeeve ya bubaba, me nyikutumini: Pala mu mwaana wu, na yaa bweese kukoto mu nde ko!» 26Bu yafula misaakulu, yamunyingisa mu makwa, na yapala. Mwaana waba weki bunu wafwa, na baatu balaka baba beki leele ti: «Mwaafwa.» 27Ngo Yesu kamukwaataana mu kooko, wumusiimbiri na mwaana telemini. 28Yesu kakotaa mu nzo, bayiki baandi bamufuuriri ha bo bakaka ti: «Dyaburi beetu, tukooninyee kubingisa mpeeve yiyo?» 29Nde wabaleele ti: «Kuri kitotolo ko kitsiista kupalisa kitsuumbu kikyo, mbuti ka mu lusaambulu ko.»
Yesu wabweese kuyaabisa mfwiilu na mfulukulu yaandi
(Mat 17.22-23; Luk 9.43-45)
30Bo bayisikaa haho, bayookolo ku Ngalili. Yesu waba wahele kutya ti baatu bayaaba. 31Mukwongo, nde wayikisa bayiki baandi, wabaleele ti: «Mwaana muutu weki wayekulu mu myooko mya baatu, bo sa bamudzusa; bu bamudzusiri, biluumbu bitatu bilutaana, nde sa kafuluka.» 32Ngo kasi bo baba bahele kubakula musamu wunde; na baba bataana kumufuula.
Na bvuriri bukuutu?
(Mat 18.1-5; Luk 9.46-48)
33Bo batubuka ku Kafarnawumi. Babaanaa beki ku nzo, Yesu wabafuula ti: «Mu nki ntoono lubee kwesa nkalikisi mu nzila?» 34Ngo bo bawura, bukuri mu nzila, bo na bo babee kwesa nkalikisi mu kusaka kuyaaba wunde wubvuriri bukuutu. 35Yesu bu kadzakala, wateele bo kuumi na boolo na wabaleele ti: «Mbuti muutu ti kuba watete, lo kaba wampotulu mu bobanso, na kaba ngaamba bobanso.» 36Nde kaholaa mwaa-mwaana, wumutelemisi ha kakati dya bo. Bu kamubuumba kunsa myooko, waleele kuri bo ti: 37«Mpisi wunde wutaambula, mosi mu mwaa-baala ba bumabu, mu nkuumbu yaami, lo me kataamburi; na mpisi wutaambula me, lo kari me kataamburi ko, ngo wunde wampeeke.»
Na wuri kintwaari na beetu?
(Luk 9.49-50)
38Yowane waleele kuri Yesu ti: «Muyikisi, beetu tumwiinyee muutu mosi wukwebingisa mampeeve mamabi mu nkuumbu ye; na beetu tumudikiryee, bukuri nde wahele kweyende na beetu.» 39Yesu waleele ti: «Yaa lumudika ko, bukuri kuri muutu ti mosi ko, wuri kasaana kimaangu mu nkuumbu yaami, mwaa-kidzika kyantele, weki dzoonso bwabubi mu me, 40bukuri wunde wahele na kitaatu mu beetu, lo wuri kintwaari na beetu. 41Mpisi wunde wuha beenu mbasi maampa ma kunwa, mu nkuumbu yiri ti beenu baatu ba Kiristo, ngwanwa me nyiluleeriri ti: lo kahelele museendu waandi ko.»
Seenee madyeele
(Mat 18.6-9; Luk 17.1-2)
42«Mpisi wunde wubwiisa mu masumu, mosi mu mwaa-bilesi bimabi, byasa kanyi [mu me], lo buri bwabubwete mu nde, ti bamukaanga nguku-tari mu nkiingu yaandi, na bamutuba mu mubu. 43Mbuti kooko kwaaku kubwiisa ye mu masumu, lo taabala kwo, buri bwabubwete mu ye, mu kukoto na kooko kumosi mu kidziingu, ti na kuba na myooko myoolo, ngo weensi ku lubila, ku mbaawu yiri yadzimaa ko. [44] 45Mbuti kuulu kwaaku kubwiisa ye mu masumu, lo taabala kwo; buri bwabubwete mu ye, mu kukoto na kuulu kumosi mu kidziingu, ti na kuba na miilu myoolo, ngo bakutubiri ku lubila. [46] 47Mbuti diisu dyaaku dibwiisa ye mu masumu, lo hokolo dyo; buri bwabubwete mu ye, mu kukoto na diisu dimosi mu Kimfumu kya Nzaambi, ti na kuba na miisu myoolo, ngo bakutubiri ku lubila, 48kukwo kuri mitaka myafwaa ko, na mbaawu yadzimaa ko. 49Mukwongo, sa basa mungwa mu mpisi muutu, ku mbaawu.»
50«Mungwa wamubwete. Ngo mbuti weki wahele nyeke, lo mu nki lumubvutukila nyeke yiyo? Beenee na mungwa mu beenu-meene, na beeneenu na kiyeengi beenu na beenu.»
Currently Selected:
Mal 9: MW2013
Highlight
Share
Copy
Want to have your highlights saved across all your devices? Sign up or sign in
Nouveau Testament Beembe © Bible Society of the Republic of Congo, 2013.
