Mat 6

Bwa kuheele kikabu kuri bawelu

1«Seenee madyeele, mu kuhele kusalila nsungumunu yeenu ha busu bwa baatu, mu nzala kumonoko kuri bo. Mbuti ka bubwo ko, lo beenu lutaambula museendu ko, kuri Taayi dyeenu diri mu mayulu. 2Habaanaa wuha kikabu kuri bawelu, lo yaa sika mvumvuri ko ha busu bwa ye, bu koosaana bangaa-bumpitu-bumpyoongo, mu manzo mankutukunu, na mu manzila, mpisi baatu babasiika. Ngwanwa me nyiluleele ti: bo bakootaambula museendu waaku. 3Ye habaanaa wuha kikabu kuri bawelu, lo kooko kwa ye kwalumoso yaa kuyaaba ma yirika kooko kwa ye kwa lubakala ko, 4mpisi heki kikabu kya ye kiba kya nsweeki; na Taayi dyaaku, wumonaa mu nsweeki, sa kakubvutukila.»

Nyikusulu mu dyaambu dya lusaambulu

(Luk 11.2-4)

5«Habaanaa lusaambila, lo yaa luba bunu bangaa-bumpitu-bumpyoongo ko, bukuri bo batiiri kwesaambila mu mutele, mu manzo mankutukunu na mu makuumbu ma manzila, mpisi baatu beebamono. Mu ngwanwa me nyiluleele ti: bo bakootaambula museendu waaku. 6Ngo kasi ye, habaana wusaambila, lo koto kunsa kihekiri kyaaku, kaanga mweelu, na saambila Taayi dyaaku mu nsweeki, na Taayi dyaaku, wumonaa mu nsweeki, sa kakubvutukila.»

7«Habaanaa lusaambilaa, lo yaa lulandukinaa bitoolo ko bunu bangooyi; bukuri bo kutsima ti mu bitoolo byalaka bo bataambula mamvutu. 8Yaa lufwanikina na bo ko; mukwongo, Taayi dyeenu yaari bi luri na nzala byo, tekekesele beenu lumuloombo. 9Hango beenu bumabu luyelemini kusambikila:

"Taayi dyeetu diri mu mayulu,

hemese nkuumbu yaaku yiduma;

10hemese kimfumu kyaaku kiisa;

hemese kutya kwa ye kuyirima ha butoto, bunu buri ku yulu.

11Tuha byandya byeetu bya kiluumbu ki, lolo dimadi.

12Tuhemesene bubi bweetu,

bunu bu twahemisini beetu se babee tuyirikila mamabi.

13Yaa tunata mu nsindukulu ko;

ngo ye tukuula kuri Ngaa-bubi."»

14«Mbuti beenu luhemisinaana baatu mamabi maaku, lo Taayi dyeenu diri ku yulu se sa kaluhemesene. 15Ngo mbuti beenu lwahele kuhemesene baatu, lo Taayi dyeenu se ka kaluhemesene mamabi meenu ko.»

Nyikusulu mu ntoono loomi

16«Habaana luri kunsa loomi, lo yaa luba na kidziri kya ngebe ko, bunu bangaa-bumpitu-bumpyoongo. Bo bakitula kidziri mpisi heki bamonokono kuri baatu ti bari kunsa loomi. Ngwanwa me nyiluleele ti: bo bakootaambula museendu waaku. 17Ngo kasi, ye habaanaa wuri kunsa loomi, lo swaaka kidziri kyaaku, kwasa mananaasi ku mutu waaku, 18mpisi hele kumonokono kuri baatu ti ye wuri kunsa loomi, ngo monokono kuri Taayi dyaaku mu nsweeki, na Taayi dyaaku, wumonaa mu nsweeki, sa kakubvutukila.»

Busina bwa ku yulu

(Luk 12.33-34)

19«Yaa lwekutukisa busina bweenu ha butoto ko, hari bubwiilila bansyelisi na bisekisi, na hari bangaa-kwiibi babula na bayiba. 20Ngo kutukiseenu busina bweenu ku yulu, kukwo kuri lo bansyelisi na bisekisi bahele kudya, na kukwo se kuri bangaa-kwiibi bahele kubula na kuyiba. 21Bukuri haho ha sweeku busina bwa ye, hanaho se haba mutima waaku.»

Mwiinda wa nyutu

(Luk 11.34-36)

22«Diisu ngo mwiinda nyutu. Mbuti diisu dya ye dyaditsiina, lo nyutu ye yoyinso yiri kunsa buungi. 23Ngo mbuti diisu dya ye dyabeele, lo nyutu ye yoyinso yiri kunsa mampimbisi. Ngo mbuti buungi buri mu ye bweki kuba mampimbisi, lo mampimbisi mamo nkati ma bubokoro.»

Nzaambi hoti mboongo

(Luk 16.13)

24«Kuri muutu ko wuri lo bangusini kusalila bamfumu boolo; mukwongo nde lo sa kabele wamosi, na kutya wakaka; bunu pe sa kakaangama mu wamosi, na kunyaafuna wakaka. Ka lutsiitsa kusalila Nzaambi kiteesu kimosi na mboongo ko.»

Kusa nsiitu mu Nzaambi

(Luk 12.22-31)

25«Hango-nkuumbu, me nyileele kuri beenu ti: Yaa lwenyoongo mu ntoono kidziingu kyeenu ko, mu bi ludya, [bunu pe bi lunwa], na mu ntoono nyutu ko, mu bi lulwaata. Buri kidziingu kyahele kubvula na byandya, na nyutu yahele kubvula na binkuta? 26Talee banoni ba yulu: Bo bakookunaa ko, bakootolaa ko, bakookutikisaa mu matalaka ko, ngo Taayi dyeenu, dya ku yulu wudiisilaa bo. Buri beenu lwahele kubvula mufunu na bo?» 27«Nani mu beenu, wuri mu minyoongi myaandi, lo bangusini kunonono mibvu myaandi, mwaa-kwantele?» 28«Ngo buri luri mu kwenyoongo mu ntoono ya binkuta? Taleenu bu kwebuukula bifulu bya manseke: byo byasala ko, byatuunga ko. 29Me nyiluleele ti: Solomo, kunsa nkeembu yaandi yoyinso, kasii lwaata bunu kitiiti ti kimosi mu byo ko. 30Mbuti Nzaambi wulwiikaa bitiiti bya manseke bubwo, biri lumalu biri, ngo bweepari babitubiri ku muduku wa mbaawu, lo dyaburi nde kahele kubvula kulwiika beenu, baatu bari kanyi mwaa-dyantele? 31Ngo yaa lweenyoongo na kweleele ti: "Nki tudya? Bunu pe ti nki tunwa? Bunu pe ti nki tulwaata?" 32Bukuri byobinso bibyo bangooyi bakwesakaana. Mukwongo, Taayi dya beenu, dya ku yulu, yaari ti beenu luri na nzala byobinso bibyo. 33Tekeselee meti kusaka Kimfumu [kya Nzaambi] na nsungumunu yaandi; tumi byobinso bibyo balubweese ha yulu. 34Hango-nkuumbu, yaa lunyoongo mu kiluumbu kya bweepari ko: bukuri kiluumbu kya bweepari sa kyanyoongo kyo-meene. Mpisi kiluumbu na mpasi dzaandi.»

Currently Selected:

Mat 6: MW2013

Highlight

Copy