Luk 7

Yesu watsinikisa kisari kya mukuutu bayongolo

(Mat 8.5-13)

1Yesu kamana kudzoonso maampu mamo kuri mpuumbu baatu, ha wakoto ku Kafarnawumi. 2Mukuutu nkama bayongolo waba na nkutu mosi ya mutima, yaba yabeele na yeki mu kufwa. 3Bu kayuka badzoonsolo mu Yesu, nde waheeke bakulu ba babakala ba Bayudayo kuri Yesu, mu kumuyingukila, mpisi kiisa kabvuukisa nkutu yiyo. 4Bo bu batubuka kuri Yesu, bamuyingukila nkati mu kifiki na baleele ti: «Muutu wu wayelemene mu kuri ti ye muyirikila mamo; 5bukuri nde tiiri kaanda dyeetu, na watutuungula se na nzo-nkutukunu.» 6Yesu ha kayende kintwaari na bo. Yesu kabaanaa weki bebele na nzo, mukuutu nkama bayongolo waheeke banduku baandi mu kuleele kuri Yesu ti: «Mfumu, yaa wiisa kwaandi ko, bukuri me nyahele kukuka mu kuri ti ye koto mu nzo yaami. 7Mu didyo, me mwiinyee ti nyahele kuyelemene mu kwiisa me-meene ku wuri ye. Ngo leele kwaandi ntoono mosi, lo kisari kya me bwee kitsiinikini. 8Mukwongo, me se nyiri muutu wuri kunsa lutumu lwa mukuutu, na me se nyiri na bayongolo bari kunsa lutumu lwa me. Me ndeelaana kuri mosi ti: "Yende", lo weensi; kuri wakaka ti: "Wasa", lo wiisiri, kuri nkutu yaami ti: "Sa bumabu", lo siiri.» 9Yesu bu kayuka mamo, wamuha masiiku, na bu kasyeeteke kuri mpuumbu yaba kwemunama, waleele ti: «Me nyiluleele ti, me nyamwiini kwaami mu Isaheli, kanyi dya bumabu ko.» 10Baatu babasiindikiri babo babvutuka ku nzo, bamono nkutu kuri watsiinika.

Yesu wafulukisa mwaa-munkuula mosi ku Nayini

11Ha mambisa haho, Yesu wayende ku bvula dimosi diri nkuumbu Nayini. Bayiki baandi na mpuumbu baatu yayinene se bayende na nde. 12Mu ntaangu yi kaba weki kokosolo na mweelu bvula, mono, baba beki kweedziika muutu wafwa, mwaana ndemosi mu nguri yaandi, yaba yiri se mufwiiri. Mpuumbu yafwaana yaba kintwaari na nde. 13Mfumu bu kamumono, wamubakila ngebe, na wamuleele ti: «Yaa dila ko!» 14Yesu kakokosolaa, belemini sanduku. Banati bateleme, na nde waleele ti: «Mwaa-munkuula, me nyikuleele ti siimbika!» 15Waba wafwa ha kadzakiri, na bekiri kudzoonso. Yesu ha kamubvutiri kuri nguri yaandi. 16Bobanso boomo bwababwiilila, bakeembese Nzaambi, na baleele ti: «Mubikiri wamunene telemini ha kakati dya beetu!» Na ti: «Nzaambi wiisiri mu kubakisa baatu baandi!» 17Ntoono yitariri Yesu yiyo, yatsamukina mu Yudaya dyodinso, na mu nkoonsi yoyinso.

Yowane Mubotiki waheeke bantumu kuri Yesu

(Mat 11.2-19)

18Bayiki ba Yowane bayaabisa momanso mamo kuri nde. Yowane bu kateele boolo mu bayiki baandi, 19ha kabaheeke kuri Mfumu, mu kumufuula ti: «Ye ngo wunde wukwiisa, hoti beetu tukiinga mukimi?» 20Bu batubuka kuri Yesu, baatu babo baleele ti: «Yowane Mubotiki wutuheekiri kuri ye, nde ti: "Ye ngo wunde wukwiisa, hoti beetu tukiinga mukimi?"»

21Mu kilookolo kinikyo, Yesu watsinikisa baatu balaka baba na mabeeru, baba na bipfuumi, baba na mampeeve mamabi, na wasa kuri ti balaka baba bafwa miisu bataambula bweese bwa kwemono. 22Tumi nde wabvutula kuri bo ti: «Bu lubvutuka yaabiseenu kuri Yowane mamo ma lumwiini na ma luyukiri: bafwa miisu bari mu kumono, bikata biteleme, babeele bwaasi batsyeemeke, bafwa makutu bayuka, bafwa bari mu kufuluka, na bawelu bari mu kutaambula Musamu Wamubwete. 23Kiminu kuri wunde wuhele kubwa mu ntoono me!»

24Bantumu ba Yowane bamanaa kubvutuka, Yesu wabeke kudzoonso kuri mampuumbu mu ntoono Yowane ti: «Nki beenu lweensyee kumono ku nsi yankatu? Dyaari dyanyingusu mu kiteembu? 25Heki nki beenu lweensyee kumono? Muutu walwaata binkuta byabibwete? Hambeti, balwaataa binkuta byabibwete, na bari mu lwambwe mu manzo ma bambyaasi bakoobaanaa. 26Heki nki lweensyee kumono? Mubikiri? Heehe, me nyiluleele ti nde bvuriri na mubikiri. 27Mu ntoono ya nde, diri dyatinu ti:

"Mono, me nyiheeke munati-mukeensu waami ku mankula ma ye,

nde wuyirika nzila yaaku, ku mankula ma ye."»

28«Me nyiluleele ti, mu babutuka mu bakyeetu, kwahele wubvuriri bukuutu na Yowane; ngo wubvuriri bulesi mu Kimfumu kya Nzaambi, bvuriri bukuutu na nde. 29Baatu bobanso bayukiri, na batori ba mpaku se, bamono dyo ti Nzaambi wasuunguma, na bataambula mbotokulu ya Yowane. 30Ngo nkasi, Bafarisi na batina ba mangisi, babisiri maba matiiri Nzaambi mu bo, na bahele kutaambula mbotokulu kuri Yowane.»

31Na ba na, «me nyiyelekese baatu ba kiseendu kimaki, na ba na bo bari bafwanikina? 32Bo bafwanikina na mwaa-baala bari badzakala ha kibeendu kya bobanso, babamosi bari mu kubikisaa kuri bakaka, baleele ti: "Beetu twasikiri nseembe mu beenu, ngo kasi beenu lwaasii kina ko; beetu twayimbiri mikuunga mya lufwa, ngo kasi beenu lwaasii dila ko!" 33Mukwongo, Yowane wayisa, wahele kwedya byandya, na wahele kwenwa malu; beenu luleele ti: "Nde wuri na mpeeve yayibi!" 34Mwaana muutu wayisa, wukwedya na wukwenwa; beenu luleele ti: "Monee ngaa-lutee lwa kudya, na yaa-kinwi, nduku batori ba mpaku na bangaa-masumu!" 35Bobanso bari na madyeele, bamonaa kuri ti madyeele masuunguma.»

Yesu mu nzo Simoni Mufarisi

36Mosi mu Bafarisi wateele Yesu mbila mu kudya kintwaari na nde. Nde bu kakoto mu nzo, walaambula miilu mu kudya. 37Na mono, mukyeetu mosi, ngaa-masumu, waba kunsa bvula, bu kayuka ti Yesu wuri mu kudya mu nzo Mufarisi, wanata yuku dya mananaasi. 38Bu kaba ha mbisa miilu mya Yesu, wabeke mu kudila na kuboloso miilu mya Yesu mu mansangasa, wayaala myo mu mfu dza mutu waandi, waminyumutina, na wakila myo mananaasi. 39Mufarisi watumisini Yesu bu kamono bubwo watsima kunsa mutima ti: «Muutu wu ngo kabeeri mubikiri, nkani nketi kuyaaba mukyeetu wuri mu kumubelemene wumawu na kari, na nkya nzelu kari na yo, bukuri ngaa-masumu.» 40Yesu wabvutula kuri nde ti: «Simoni, me nyiri na di nyikuleele.» Simoni waleele ti: «Muyikisi, dzoonso kwaaku.» 41«Baatu boolo baba na kibiimbu kuri musoombisi-mboongo mosi. Watete waba na kibiimbu kya nkama taanu dza bidenali, ngo wakaka makuumi mataanu. 42Bu baba bwa kubvutukila pe kibiimbu, nde wabahemesene boboolo. Mu boboolo babo na wubvula kumutya?" 43Simoni wabvutula ti: "Me tsimini ti wubabvuriri kuhemesene." Yesu waleele kuri nde ti: "Ye heeri mvutu yayibwete.»

44Yesu bu kasyeeteke kuri mukyeetu, ha kaleele kuri Simoni ti: «Ye wumono mukyeetu wumawu? Me nkotirye mu nzo ye, ngo ye sii haanaa me maampa ma kuswaaka miilu; kasi nde bolisiri miilu mya me mu mansangasa maandi, na yaariri myo mu mfu dzaandi. 45Ye sii nyumutinaa me ko; ngo kasi nde, kipilu kinkotirye me, nde wahele kuhoto mu kunyumutina miilu mya me. 46Ye sii yitilaa me maasi mu mutu ko; ngo kasi nde yitiri mananaasi mu miilu mya me. 47Mu ntoono yiyo me nyileele kuri ye ti: Masumu ma nde malaka meki mahemusunu, bukuri nde soongiri ntiilu yalaka. Ngo kuri wunde wubahemisini kwantele, lo ntiilu yi kasoongo se yantele.» 48Tumi Yesu waleele kuri mukyeetu ti: «Masumu maaku meki mahemusunu.» 49Baba dyanaa kintwaari na nde, baleele mu bo-meene ti: «Nkya muutu wumawu wu kwehemesene na masumu?» 50Yesu wabweese kuleele kuri mukyeetu ti: «Kanyi dyaaku dikubvuukisiri; yende mu kiyeengi.»

Currently Selected:

Luk 7: MW2013

Highlight

Copy