Luk 4

Nsindukulu dza Yesu

(Mat 4.1-11; Mal 1.12-13)

1Yesu waba waluula mu Mpeeve Yangisi, wanangukina ku Yorodani, na Mpeeve yamutwaalusu mu nsi yankatu, 2mu biluumbu makuumi mana, na dyabulu wamusuusa mu nsindukulu. Nde kasii dya mu biluumbu bibyo ko. Biluumbu bimanaa kukuka, nde wabaka nzala. 3Dyabulu waleele kuri nde ti: «Mbuti ye Mwaana Nzaambi, leele kuri tari di dikituka mpa.» 4Ngo Yesu wabvutula kuri nde ti: «Diri dyatinu ti: "Muutu kari mbeele mwooyo mu mana mampa kitsu ko."» 5Dyabulu wamunata ku nkati yulu, wamusoongo bimfumu bya nsi yiri baatu, mu kilookolo kimosi, 6na wamuleele ti: «Me sa nyakuha lutumu lwolunso lu, na nkeembu ya bimabi bukuri kuri me bari bayiha, na me lo mpeeri yo, kuri wunde wutiiri kuha. 7Ngo mbuti ye tsukumini ha busu bwa me, lo yoyinso sa yaba ya ye.» 8Yesu wabvutula waleele kuri nde ti: «Diri dyatinu: "Mfumu Nzaambi yaaku yelemini kutsukumina, na wunu nde kitsu ye yelemini kusaambila."» 9Nde wanata Yesu ku Yerusalemi, na wamutelemese ku yulu nsoongi Nzo-nzaambi, na wamuleele ti: «Mbuti ye Mwaana Nzaambi, sonoko ye-meene ku nsuku nsi; 10bukuri diri dyatinu ti: "Nde sa kaha lutumu kuri bambasi baandi mu ntoono ye, mpisi bakukebe." 11Na ti: "Sa bakunaanguna mu myooko, mpisi heki kuulu kwa ye kuhele kubumina kya mu tari."» 12Yesu wabvutula, wamuleele ti: «Diri dyaleelu ti: "Yaa suusa Mfumu Nzaambi yaaku mu nsindukulu ko."» 13Dyabulu kamana nsindukulu dzodzinso, ha kamusisa natee mu kilookolo kikimi.

Yesu wabaandika kisalu kyaandi ku Ngalili

(Mat 4.12-17; Mal 1.14-15)

14Yesu wabvutuka ku Ngalili na mpinu dza Mpeeve, na mvuumfu yatsamukina mu nkoonsi yoyinso mu ntoono ya nde. 15Nde waba kweyikisaa mu manzo ma nkutukunu ma bo, na bobanso bamukeembese.

Yesu bahele kumutya ku Nadzareti

(Mat 13.53-58; Mal 6.1-6)

16Yesu wayende ku Nadzareti ku kabuukiri. Mu kiluumbu kya mpuumunu, nde wakoto mu nzo-nkutukunu bunu bwaba kifu kyaandi. Nde wateleme mu kutaanga, 17na bamuyakisa mukaanda wa mubikiri Esaya. Bu kamuyalimina, wamono ha kibeendu kyaba kyatina ti:

18«Mpeeve ya Mfumu yiri mu me,

bukuri nde wankila maasi, mu kunata Musamu Wamubwete kuri bawelu.

Nde wampeeke mu kubikisa bunsaalisi, kuri bari mu maboroko,

na nsinukunu kuri bafwa miisu,

kubvutula bari mu nkwaamusunu kunsa bunsaalisi, 19kubikisa mubvu wa bweese wa Mfumu.»

20Bu kafutuka mukaanda, wabvutula nde kuri kisari na wadzakala. Bobanso baba munsa nzo-nkutukunu bamusungumina kisoosi. 21Haho, nde wabaandika kuleele kuri bo ti: «Lolo di, matinu mamama, ma luyukiri beenu, meensi mu mana.» 22Bobanso bamuteele kimbaangi, na bakimuka mu maampu ma bweese maba palaana mu munwa waandi, na baleele ti: «Buri wu kari mwaana Yosefi ko?» 23Nde waleele kuri bo ti: «Beenu nkati sa lwateelile me nkuma yiri ti: "Ngaanga, buka nyutu ya ye-meene." Beetu twayukiri momanso mayirimini ku Kafarnawumi, sa yirika mo se, mu nkoonsi ya ye-meene yimayi.» 24Nde waleele ti: «Mu ngwanwa me nyiluleele ti: kuri mubikiri ti mosi ko wubataambulaa mu nkoonsi ya nde-meene. 25Mu ngwanwa me nyileele kuri beenu ti: bakyeetu ba bafwiiri baba balaka mu ntaangu ya Eliya, mu Isaheli, ha kaangimini yulu mu mibvu mitatu na mangoondo masaamunu, na ha yisiri kwaambala mu nsi yansiina. 26Ngo basii heeke Eliya kuri mufwiiri ti mosi ko mu bo, ha yulu kunu ku Salepeta mu nkoonsi ya Sidoni, kuri mukyeetu mosi wa mufwiiri. 27Babeeru ba bwaasi se baba balaka mu Isaheli, mu ntaangu ya mubikiri Elise, ngo kuri ti mosi ko mu bo wu batsyeemisini, ha yulu wunu Nayimani wa ku Sirya.» 28Bobanso baba mu nzo-nkutukunu, bu bayuka mamo, babaka nkesi. 29Bu bateleme, bamubingisa ku mbisa bvula, na bamunata natee ku teke beenge, dya mulaandu wu baba batuunga bvula, mpisi bamusindikila kunsuku beenge. 30Ngo nde kafyolomokaa ha kakati dya bo, weensi kwaandi.

Yesu watsinikisa muutu waba mu mpeeve yayibi

(Mal 1.21-28)

31Yesu wakulumuka ku Kafarnawumi, bvula dya mu nkoonsi ya Ngalili, kukwo nde kaba yikisaana baatu, mu kiluumbu kya mpuumunu. 32Baatu bakimuka mu nyikusulu dzaandi, bukuri maampu maandi maba na lutumu. 33Mu nzo-nkutukunu mwaba muutu mosi, waba na mpeeve yayibi. Nde wabikisa mu mbeembu yamakwa: 34«Ha! Nkya ntoono ha kakati dya ye na beetu, Yesu wa ku Nadzareti? Buri ye wiisiri mu kutufuukisa? Me nyaari ye na wuri, Wangisi wa Nzaambi!» 35Yesu waŋaŋana mpeeve yayibi yiyo, na waleele ti: «Kaanga munwa waaku, na pala mu muutu wu!» Mpeeve yayibi yatuba muutu wunde ha nsi, ha kakati dya baatu, na yapala mu nde kwahele kumumonoso mpasi. 36Bobanso bamono boomo, na balelesene bo na bo ti: «Nkya maampu ma? Muutu wumawu wudzoonso mu lutumu, na mu mpinu kuri mampeeve mamabi, na mapala!» 37Haho, mvuumfu yatsamukina mu ntoono ya nde, mu nkoonsi yoyinso.

Yesu watsinikisa babeeru balaka

(Mat 8.14-17; Mal 1.29-34)

38Yesu kapalaana mu nzo-nkutukunu, weekoto mu nzo Simoni. Kukwo nguri mukasi Simoni waba luungaa na baawu dya makwa. Baatu basa ndoombolo kuri Yesu mu ntoono ya nde. 39Nde, kayilimina mubeeru, ha kaŋaŋini baawu, na baawu dipariri mu nde. Hanaho, mukyeetu wunde, bu kateleme ha kabeke kubasalila.

40Mu nsinsika, bobanso baba na babeeru, babeele mabeeru ma bitsuumbu-bitsuumbu, babatwaala kuri Yesu. Nde wateeteke myooko ha yulu mosi mosi mu bo, na wabatsinikisa. 41Mampeeve mamabi se mapala mu babeeru balaka, kuri makwebikisa ti: «Ye ngo Mwaana wa Nzaambi!» Ngo Yesu wamaŋaŋina, na kasii kumaha miswa mu kuleele mimyo ko, bukuri maba mayaari ti nde ngo Kiristo.

Yesu wayikisa mu manzo mankutukunu

(Mal 1.35-39)

42Bwiisi bu bwakya, Yesu kapalaana weensi ku kibeendu kyankatu. Mampuumbu mabeke kwemusaka, natee beensi ku kaba nde. Bo baba batiiri kumukebe, mpisi kahele kweende la na bo. 43Ngo nde waleele kuri bo ti: «Me nyelemini kweyaabisa se Musamu Wamubwete, wa kimfumu kya Nzaambi ku mabvula makaka, bukuri mu bubwo me bari bampeeke.» 44Haho, nde wayende mu kweyaabisa mu manzo mankutukunu, mu nkoonsi ya Yudaya.

Currently Selected:

Luk 4: MW2013

Highlight

Copy