Luk 23

Yesu ha busu bwa Pilato.

(Mat 27.1-2, 11-14; Mal 15.1-5; Yow 18.28-38)

1Bobanso bu bateleme mu kintwaari, banata Yesu ha busu bwa Pilato. 2Babeke mu kumufuunda baleele ti: «Beetu twatangusini muutu wumawu kuri wusa kisaangila mu nsi yeetu. Nde wukwedika baatu ti yaa bafuta mpaku kuri Kayisari ko; na wukweleele ti nde ngo Kiristo, mbyaasi.» 3Pilato wamufuula ti: «Buri ye ngo mbyaasi Bayudayo?» Nde wabvutula kuri nde waleele ti: «Ye leeriri dyo.» 4Pilato waleele kuri bakuutu ba bangaanga-nzaambi, na kuri mampuumbu ti: «Me nyahele kumono lumvuki ti lumosi mu muutu wu.» 5Ngo baatu babweese kusika ti: «Mu nyikusulu dzaandi mu Yudaya dyodinso, kubandikila ku Ngalili natee hamaha, nde wukwesinda baatu mu kusa kisaangila.»

Yesu wateleme ha busu bwa Erode

6Pilato bu kayuka bubwo, wafuula kari nde muutu wa ku Ngalili. 7Pilato bu kayaaba ti Yesu wuri kunsa lutumu lwa Erode, wamuheeke kuri Erode, nde se waba wayisa ku Yerusalemi mu biluumbu binibyo.

8Erode bu kamonaa Yesu, wamono kiminu kyalaka, bukuri waba na nzala kumumono, kuholosono na kidzika, mu ntoono ma kaba kweyukaa mu nde, na waba na nsiitu mu kumono, kimaangu ki kayirika nde. 9Erode wamuha bifuuri byalaka. Ngo Yesu kasii kumubvutula ntoono ti mosi kuri nde ko. 10Bakuutu ba bangaanga-nzaambi, na batini ba mangisi baba hanaho, mu kumufuunda mu makwa. 11Erode na bayongolo baandi bamusaana na bamusiila munsiku. Bu kamulwiika kinkuta kyakibwe, wamubvutula kuri Pilato. 12Mu kiluumbu kikyo, Erode bo na Pilato boboolo baba beki banduku, koomosoko mu ntaangu yaluta bo baba na kitaatu.

Yesu bamukesele mukanu lufwa

(Mat 27.15-26; Mal 15.6-15; Yow 18.39–19.16)

13Pilato bu kakutukisa bakuutu ba bangaanga-nzaambi, bamfumu, na baatu bakaka, 14waleele kuri bo ti: «Beenu lutwesikiri me muutu wumawu, na kuleele ti: nde wukwesinda baatu mu kusa kisaangila. Me bu nyimuheeri bifuuri ha busu bwa beenu, nsii mono lumvuki ko, mu muutu wumawu wu luri mu kufuunda beenu. 15Erode se kasii mono ntoono ko, hango-nkuumbu kamubvutiri kuri beetu. Mu didyo, nde wahele na ntoono yi kari kayirika, yi bayelemini ku mudzusila. 16Ngo bamulataana nkwaasulu, tumi me nyimupatula. [17] 18Bobanso mu kintwaari babikisa, baleele ti: "Mudzusa! Na tupatukila Baraba!» 19Baraba wunde, bamusokiri mu boroko mu ntoono kisaangila kyabwiiri kunsa bvula, na muutu wu badzusiri. 20Pilato, wabweese kubafuula, bukuri waba tiiri kupatula Yesu. 21Ngo baatu babikisa ti: «Mukomono ha yulu kuruwa, mukomono ha yulu kuruwa.» 22Nde wabweese kubafuula mbala yatatu ti: «Nkya ntoono yayibi nde kari kayirika? Me ngo wuri nyahele kumono lumvuki ti lumosi lukafwiila nde. Bamulataana nkwaasulu, tumi me nyimupatula.» 23Ngo baatu babweese kufuula misaakulu myamakwa, baloombo ti, bamukomono ha yulu kuruwa; misaakulu myahamisa kwalaka. 24Pilato wakata kutaambula ndoombulu dza bo. 25Nde wapatula Baraba wu baba loombaana, waba mu boroko mu ntoono kisaangila na muutu wu badzusiri. Ngo kasi nde wayekele Yesu kuri bo, mpisi basa mi baba batiiri.

Yesu bamukomono ha yulu kuruwa

(Mat 27.32-44; Mal 15.21-32; Yow 19.17-27)

26Bu baba mu kwenata Yesu, baholo Simoni wa ku Kyrene, waba mwaafumuna ku manseke. Bamukwiika kuruwa mpisi kedinata ha mambisa ma Yesu. 27Mpuumbu baatu yayinene yaba kwenamaa Yesu. Kwaba se bakyeetu bateeteke myooko mu yulu mitu, na bari mu kwedila mu ntoono ya nde. 28Yesu bu kasyeeteke kuri bo, waleele ti: «Bantuumba ba Yerusalemi, yaa ludila mu me ko; ngo dileenu mu beenu-mee, na mu baala beenu. 29Bukuri mono, biluumbu biri mu kwiisa, biri sa baleele ti: "Kiminu kuri bakyeetu babisita, na bari basii buta ko, na bari basii nwiisa beene ko." 30Hanaho, baatu sa baleele kuri milaandu ti: "Bwilikileenu beetu!" Na kuri mikutu ti: "Fukee beetu!" 31Bukuri mbuti bayirika mya bumabu mu muti wamaampa, lo buri bubeele mu muti wakana?»

32Bo banata se, bangaa-bumfuna boolo, kintwaari na nde mpisi babadzusa. 33Bu batubuka ha kibeendu ki bakooteelaa ti: kiteengi kya mutu, bo bakomono Yesu ha yulu kuruwa, bakomono se bangaa-bumfuna, wamosi ha lubakala lwa nde, wakaka ha lumoso. 34[Haho, Yesu waleele ti: «Taata, wubahemesene, bukuri bahele kuyaaba ma bari mu kuyirika.»] Bo bakabula binkuta bya nde mu nteelulu wari. 35Baatu baba bateleme haho, na bari mu kutalilaana. Bamfumu baba musiila munsiku, baleele ti: «Nde wabvuukisiri baatu bakimi, kabvuuka se nde-meene, mbuti nde ngo Kiristo, wasoolu kuri Nzaambi.» 36Bayongolo se bakokosolo na nde, na bamusiila munsiku. Bamuha bviinya dyansa, 37na baleele ti: «Mbuti ye ngo mbyaasi Bayudayo, bvuuka ye-meene.» 38Ha yu-yulu dya nde kwaba bisoni byatina ti: «Wumawu ngo mbyaasi Bayudayo.» 39Mosi mu bangaa-bumfuna, babamanikini ha kuruwa, wamutuka, waleele ti: «Buri ye wuri Kiristo ko? Sa bvuukeeti ye-meene, na bvuukisa na beetu se.» 40Ngo wakaka waŋaŋana mbaasi, wamuleele ti: «Buri ye wahele kubata Nzaambi, habaanaa wuri kunsa kibila kyokimosi? 41Beetu na ye, mukanu wasuunguma, bukuri turi mu kufuta mamabi ma turi twayirika. Ngo nde wahele kuyirika ntoono ti mosi yayibi.» 42Tumi nde waleele ti: «Yesu, wumbaambukila mwooyo mu ntaangu yi wukwiisa ye mu kimfumu kyaaku.» 43Yesu waleele kuri nde ti: «Mu ngwanwa me nyikuleele ti: Lolo di, ye sa ba kintwaari na me ku paradiso.»

Mfwiilu Yesu

(Mat 27.45-56; Mal 15.33-41; Yow 19.28-30)

44Kyaba kyeki kampe kilookolo kya bisaamunu, kya nkati-mwiini; mampimbisi mabwa mu nsi yansiina natee mu kilookolo kyawa, 45ntaangu bu yaba yeki kumonoko pe. Nsaanda nzo yangisi yatyaabuka ha kakati. 46Yesu bu kafula musaakulu wamakwa, waleele ti: «Taata, me nyakisiri kiluunsi kyaami mu myooko mya ye.» Bu kaleele bubwo, muwuumunu watabuka. 47Mukuutu nkama bayongolo bu kamono mayirimini, wakeembese Nzaambi waleele ti: «Nkati ngwanwa, muutu wu wabee wasuunguma.» 48Baatu bobanso bayisiri mu mampuumbu, mu kumukyeese, bu bamono misamu myayirimini, bateeteke myooko mu yulu mitu na babvutuka. 49Bobanso baba bamuyaari, na bakyeetu baba kwemunamaana, kuholosono ku Ngalili, baba bateleme ku la, na bari mu kumono maba lutaana.

Nyutu Yesu bayisuusa mu mampeembe

(Mat 27.57-61; Mal 15.42-47; Yow 19.38-42)

50Kwaba muutu mosi, nkuumbu Yosefi, waba muhe-mandoongi, [na] muutu wuri na mutima-bubwete, na wasuunguma. 51Nde kasii taambula ma kaangiri bambasi ko, na ma bayirikiri bo. Nde waba wa ku Arimatayi, bvula dya Bayudayo, nde se waba kwekiingaana Kimfumu kya Nzaambi. 52Nde wayende kuri Pilato, mu kumuloombo nyutu Yesu. 53Bu kasundula nyutu, wayidziinga mutula, na wasuusa yo munsa bulu dyaba dyahaku mu tari, baba bakiri bahele kudziika mvuumbi munsa mumwo. 54Kyaba kiluumbu kya nyirimunu, na kiluumbu kya mpuumunu, kyaba kyeki bebele. 55Bakyeetu baba kwenamaana Yesu, na baba kintwaari na nde kuholosono ku Ngalili, bamono bulu na bu basuusiri nyutu nde. 56Bu babvutuka, bayirika milolongo mu maasi na mananaasi. Kiluumbu kya mpuumunu, bo bawuuma bunu buri mangisi.

Currently Selected:

Luk 23: MW2013

Highlight

Copy