Luk 2

Mbutukulu Yesu

(Mat 1.18-25)

1Mu biluumbu bibyo, Kayisari Oguste wapalisa lutumu lwa kusa ntaangulu baatu bobanso bari ha butoto. 2Ntaangulu baatu yatete yiyo yasalimini mu ntaangu yiri Kirinyo waba ngoforo mu nsi ya Sirya. 3Baatu bobanso baba kweendaana kukwetinima, muutu-muutu ku bula bwa nde-meene. 4Na Yosefi, wayisika ku bula bwa Nadzareti, mu nsi ya Ngalili, na watoomboko mu kweende ku nsi ya Yudaya ku bula bumosi bwa Davidi buri nkuumbu Beteleemi, bukuri nde waba wa mu kaanda na mu nzo ya Davidi. 5Yosefi wayende kukwo mu kweetinama bo na Mariya, nduku yaandi ya lulelusunu lwa makweele, waba weki na yimi. 6Mu ntaangu yi baba kukwo, biluumbu bya Mariya bya kubuta byatubuka. 7Nde wabuta mwaana waandi wa mubakala watete. Nde wamudziinga mansaanda na wamuneŋesene munsa kidiilulu kya bibulu; bukuri bo basii baka kibeendu ko mu nzo banzeense.

Mbasi na batari ba bibulu

8Mu nkoonsi yiyo, kwaba batari ba bibulu baba kwedzakalaana ku bibiti, mu kwekebe bibulu bya bo butsuku. 9Mbasi mosi ya Mfumu yateleme ha mankula ma bo, na nkeembu ya Mfumu yabafuka kunsa buungi na kinkuuka kya babwiilikila. 10Ngo mbasi yaleele kuri bo ti: «Yaa luba na boomo ko; bukuri me nyiluyaabisa musamu wamubwete, wuba wa kiminu kyalaka kuri baatu bobanso. 11Lolo dimadi, mu bvula dya Davidi, Mubvuukisi butukiri mu ntoono beenu. Nde ngo Kiristo Mfumu. 12Kidiimbu kuri beenu ngo kimaki: sa lwamono mwaa-mwaana wa nsoombo wadziinga mansaanda na waneŋesene munsa kidiilulu kya bibulu.» 13Hanaho na sisuu, fundu-fundu dya mukaangu bambasi wa ku yulu dyabvutuna na mbasi yiyo, mu kudumusa ti: 14«Nkeembu kuri Nzaambi kunu kinsongi-yulu, na kiyeengi ha butoto, kuri baatu ba katiiri.»

Batari ba bibulu beensi ku Beteleemi

15Bambasi bamanaa kubvutuka ku yulu, batari ba bibulu balelesene bo na bo ti: «Tweendee natee ku Beteleemi, mpisi twetumonee mamo mamwaayirima, ma tuyaabisiri Mfumu.» 16Bo babingukila mu kweende, na bamono Mariya, Yosefi na mwaa-mwaana wansoombo, waneŋesene munsa kidiilulu kya bibulu. 17Bu bamumono, bo bayaabisa mamo, ma babaleeriri mu ntoono ya mwaana wunde. 18Bobanso bayukuri ma yaabisiri batari ba bibulu, bamono dyo dyankimukunu. 19Mariya ngo wuri, waba kebaa misamu myominso mimyo, na kwemitsima kunsa mutima waandi. 20Tumi batari ba bibulu, babvutuka kuri bakwedumusa Nzaambi, mu momanso ma bayukiri na ma bamwiini, bunu bu babaleeriri.

Yesu wataambula nkuumbu yaandi

21Biluumbu mpoomo bu byakuka, mu kuteende mwaana bubakala, bamuteele nkuumbu Yesu, yaba leele mbasi, tekesele yimi dya mwaana disonoko mu mwooyo nguri.

Yesu bamusakumuna ku Nzo-nzaambi

22Biluumbu bu byatubuka, bya nsyemusunu, bunu buri mangisi ma Moose, bo banata mwaana ku Yerusalemi mu kumusoongo kuri Mfumu, 23bunu bu diri dyatinu mu mangisi ma Mfumu ti: «Mpisi mwaana wubutuka watete, ngo wa mubakala, sa kaba wasakumunu mu kuba wa Mfumu.» 24Bo baha mu kikabu bya kudzusa, bunu bu diri dyaleelu mu mangisi ma Mfumu, «biduka byoolo bunu pe, mabeembe moolo makiri mantele.»

25Ku Yerusalemi, kwaba muutu mosi nkuumbu Simehoni. Muutu wunde waba wasuunguma, na wubvuminaa Nzaambi; waba kiingaana mboondulu ya Isaheli, na Mpeeve Yangisi yaba ha yulu nde. 26Mpeeve Yangisi yamuyaabisa ti: nde kafwa ko natee wakiri kumono Kiristo wa Mfumu. 27Mpeeve Yangisi yamutwaalisa ku Nzo-nzaambi. Mu kilookolo kyaba twaala ba taayi na nguri mwaa-mwaana bo Yesu, mu kuyirika bunu buri kifu kya mangisi mu ntoono ya nde, 28Simehoni wamutaambula mu myooko, na wadumusa Nzaambi, na waleele ti:

29«Mu lumalu, Mfumu, hemese kisari kyaaku keende kwaandi mu kiyeengi,

bunu bu waba leele. 30Bukuri miisu myaami mimwiini mvuukulu ye,

31yi wuri watekesele kuyirika ye ha busu bwa baatu bobanso.

32Bubwo ngo buungi mu kuyabakana kuri makaanda,

na nkeembu ya baatu baaku, Isaheli.»

Mbikululu ya Simehoni

33Ba taayi na nguri bamono dyo, dyankimukunu mu misamu mi baba leele mu ntoono mwaana. 34Simehoni wabasakumuna na waleele kuri Mariya, nguri mwaana ti: "Mono, mwaana wumawu wuri ha mu ntoono ya mbwiilulu, na ntelemunu ya baatu balaka mu Isaheli, na mu kuba kidiimbu kiri baatu batya kyo ko. 35Ye-meene nguri ngo wuri, mbeesi yayila sa yakutobolo mutima, kuri heki mi kwetsima baatu balaka kunsa mitima miba mayabakana."

Ana mubikiri wa mukyeetu

36Kwaba se mubikiri wa mukyeetu wuri nkuumbu Ana, mwaana Fanweli, mu kaanda dya Asere. Nde waba weki wanuna kwalaka. Mibvu nsaamu kadzakiri na mulumi wu kakweeriri kuri wakiri mwaa-ntuumba yanswaasa, 37Ha mambisa haho nde wasaala mufwiiri natee kukatubuka mibvu makuumi mpoomo na mina. Nde kabaa sasikaa la na Nzo-nzaambi ko. Nde waba salila Nzaambi butsuku na mwiini, mu nkotulu maloomi na mu nsaambulu. 38Mu kilookolo kikyo, nde se waba hanaho, wabeke mu kubvutula matoondo kuri Nzaambi, na wadzoonsolo mu mwaana wunde, kuri bobanso babakiingila nkuululu ya Yerusalemi.

Mvutukulu ku Nadzareti

39Ba Yosefi na Mariya bamana kuyirika momanso, bunu buri ndoombolo dza mangisi ma Mfumu, bo babvutuka ku bula bwaaku ku Nadzareti, mu nkoonsi ya Ngalili. 40Mwaa-mwaana waba kwebuukaana, wukwebaka makwa, wukweluula mu madyeele, na bweese bwa Nzaambi bwaba ha yulu nde.

Yesu mu Nzo-nzaambi

41Mu mpisi mubvu, bataayi na nguri ba nde baba kweendaana ku Yerusalemi, ku munkeembu wa Paaka. 42Yesu kabaanaa weki na mvula kuumi na dzoolo, taayi na nguri bayende na nde ku munkeembu bunu bwaba kifu kya bo. 43Biluumbu bya munkeembu bu byawa, mu ntaangu yi baba bvutuka, mwaana wuri nkuumbu Yesu wasaala ku Yerusalemi, kuri taayi na nguri bahele kuyaaba. 44Bo baba kutsima ti kampe wuri munsa mpuumbu. Bo badyaata kiluumbu kyakitsiina mu nzila, na babaandika kwemusaka kuri ba bari mu kaanda, na kuri ba bari bayabisina. 45Bo babaanaa bahele kumudzuukila, ha babvutukiri ku Yerusalemi, mu kunamitina kwemusaka. 46Biluumbu bitatu bu byakuka, bo bamudzuukila mu Nzo-nzaambi, wadzakala ha kakati dya bayikisi, wuri mu kubaywiilaana na wuri mu kubahaanaa bifuuri. 47Bobanso baba muywiilaana, bamono nkimukunu mu madyeele ma nde na mu mamvutu ma nde. 48Bataayi na nguri, bu bamumono bakimuka, na nguri yaandi wamuleele ti: «Mwaana me, buri ye yirikiri beetu ma bumabu? Moneti, me beetu na taayi dya ye twafwa mu kwekusaka.» 49Ngo Yesu wabvutula kuri bo ti: «Nki luri mu kwensakila? Buri beenu luyaa ko ti, me nyelemini kunama misamu mya taayi dyaami?» 50Ngo kasi bo basii bakula musamu wu kaba baleele ko. 51Tumi nde, ha kakulumuka na bo, na wayende ku Nadzareti. Nde waba watumuma kuri bo. Na nguri yaandi waba kwekebaa misamu myominso mimyo kunsa mutima waandi. 52Na Yesu waba kwebuukaana [mu] madyeele, mu mutele na mu bweese, ha busu bwa Nzaambi na ha busu bwa baatu.

Currently Selected:

Luk 2: MW2013

Highlight

Copy