Luk 16
16
Nkuma ya mukebi walubuka
1Yesu wabweese kuleele kuri bayiki baandi ti: «Muutu mosi wa kisina waba na mukebi; bafuunda mukebi kuri nde ti wuri mu kwebvuka lubaku lwa nde. 2Bu kamuteele, waleele kuri nde ti: "Nki mo, me nyiri mu kuyuka mu ye? Tangumisa bi wuri mu kukebaa, bukuri ye wubweese kubikebe ko." 3Mukebi waleele kunsa mutima waandi ti: "Nki nyisa, bukuri mfumu yaami weki yisila me, mu kisalu kya kukebe lubaku lwaandi. Kuhata manseke, me nyiri na makwa ko! Kusa luloombo, me nyiri na nsoni! 4Me nyaari ma nyiyirika, mpisi heki, ha banyisila mu kisalu kya kukebe, baatu bataambula mu manzo ma bo." 5Nde wateele mosi-mosi mu baba na bibiimbu bya mfumu yaandi; nde wafuula kuri watete ti: "Kibiimbu kya kikwe, ye wuri na kyo kya mfumu me?" 6Nde wabvutula ti: "Midungulu nkama mya maasi." Nde wamuleele ti: "Holo mukaanda waaku, dzakala, tina mu mawasu ti makuumi mataanu." 7Tumi kuri wakaka nde waleele ti: "Kibiimbu kya kikwe ye wuri kyo?" Nde wabvutula ti: "Matsaaka nkama ma masaangu." Nde wamuleele ti: "Holo mukaanda waaku, tina ti makuumi mpoomo." 8Mfumu wasiika mukebi wunde wuri na bubayi, bukuri waba walubuka mu kusalila bubwo. Mukwongo, baala ba ntaangu yimayi, babvuriri kulubuka, mu mitariri kiseendu kya bo-meene, ti na baala ba buungi.»
9Ngo me nyiluleele ti: «Sakee banduku, mu busina bwa bubayi, mpisi heki mu ntaangu yiri lweki tikila, bo balutaambula mu nzo ma bibvu ngo bibvu. 10Wunde wakwiikama mu myantele, wuri wakwiikama se mu myaminene; wunde wuri na bubayi mu myantele, wuri na bubayi se mu myaminene. 11Ngo mbuti, beenu lwahele kuba bakwiikama mu busina bwa bubayi, lo na mbasi-tsuku wuluha busina byangwanwa? 12Na mbuti lwahele kuba bakwiikama mu byaŋani, lo na wuluha bya beenu-meene?»
13«Kuri kisari kya mu nzo, kiri lo sariri bamfumu boolo ko. Mukwongo, nde lo sa kabele wamosi na kutya wakaka, bunu pe, sa kakaangama mu wamosi na kunyaafuna wakaka. Ka lutsiitsa kusalila Nzaambi na kusalila se busina ko.»
Mangisi na kimfumu kya Nzaambi
(Mat 11.12-13, 5.31-32; Mal 10.11-12)
14Bafarisi batiiri mboongo, baba yukaa momanso mamo, na basiila Yesu munsiku. 15Nde waleele kuri bo ti: «Beenu lukwesoongo ha busu bwa baatu ti lwasuunguma, ngo kasi Nzaambi yaari mitima mya beenu. Mukwongo, bibyo biri baatu bamono ti byadzaangama, ha busu bwa Nzaambi biri byanyaafuna.»
16«Mangisi na babikiri byaba natee mu ntaangu ya Yowane; ngo kuholosono haho natee lu, Musamu Wamubwete wa Kimfumu kya Nzaambi wuri wayaabusu; na mpisi muutu wusalila makwa mu kukoto. 17Dibvuriri kuleenge ti yulu na butoto biluta, ti na kuri mwaa mpita mosi ya Mangisi yiyaaluka.»
18«Mpisi bakala dibinga mukasi waandi, na kweeriri mukimi, lo nde teeri kimpala. Na wunde wukweele mukyeetu wuri mulumi mwaamubinga, lo teeri kimpala.»
Muutu wa kisina na Ladzaro
19«Kwaba mubakala mosi wa kisina, waba kwelwaataa binkuta byabibwete na byantaalu yalaka. Mpisi kiluumbu nde waba yirikaa munkeembu nkati wamubwete. 20Bebele na nde, kwaba muwelu mosi nkuumbu yaandi Ladzaro, nyutu yaandi yaba yaluula mu mamputa. 21Nde waba na nzala kuyukuta, mu bibyo bisonokaa ku nsuku taabala dya wa kisina; ngo kasi, bambwa se, kusa kwiisa kuheende mamputa ma nde. 22Muwelu wayisa kufwa, na bambasi bamunata ha nkata Abalaami. Wa kisina se wafwa na bamudziika. 23Ku nsi ya bafwa, wa kisina bu kaba wuri mu kubama, wasyeetele miisu ku yulu na watalila Abalaami ku la, na Ladzaro ha nkata yaandi. 24Nde wateele Abalaami, waleele ti: "Taata Abalaami, bakila me ngebe, na heeke Ladzaro, mpisi katsuuba nto muleembu waandi mu maampa, na kaboloso ludima lwa me, bukuri me nyiri mu kubama kunsa milaka mya mbaawu." 25Abalaami waleele kuri nde ti: "Mwaana me, baambuka mwooyo ti ye wataamburi byabibwe bya ye, ha wabee mu bumwooyo, na Ladzaro nde se wamwii manyoongi. Ngo mu lumalu, nde wuri mu mboondulu hamaha, kasi ye wuri mu kubama. 26Ha yulu haho se, kuri beenge dyadinene diri ha kakati dya beenu na beetu, kuri heki batiiri kuyisika hamaha mu kuluta kuri beenu, lo bahele kubangisina; na kwahele se bwa kuyisikila kukwo, mu kusabuka kuri beetu."»
27«Wa kisina waleele ti: "Me nyikuyingukila, taata, mpisi ye wumuheeke ku nzo taayi dya me, 28bukuri me nyiri na bampaangi bataanu kukwo, mpisi keende kabalubula, kuri heki bo se bahele kwiisa, ku kibeendu kya mbamusunu kimaki." 29Abalaami wamuleele ti: "Bo bari na Moose na babikiri, baywiila babo." 30Nde wabvutula ti: "Pele, taata Abalaami, mbuti muutu nangukini kuri bafwa, na weensi kuri bo, lo sa bayiinga madyeele." 31Abalaami wamuleele ti: "Mbuti bo bahele kuywiila Moose na babikiri, lo ti hayuku muutu fulukiri mu bafwa, lo bamutambikila ko."»
Currently Selected:
Luk 16: MW2013
Highlight
Share
Copy
Want to have your highlights saved across all your devices? Sign up or sign in
Nouveau Testament Beembe © Bible Society of the Republic of Congo, 2013.
