Luk 12
12
Seenee madyeele mu bumpitu-bumpyoongo
(Mat 10.26-27)
1Mu mantaangu mamo, mafuunda ma baatu makutukina, mu kiteesu kiri babamosi bakwedyaata mu yulu bitaambi bya bakaka. Yesu wabeke kudzoonso dyatete kuri bayiki baandi ti: «Seenee madyeele mu ntoono lufunusu lwa Bafarisi, ngo bumpitu-bumpyoongo bwa bo. 2Kuri kyasweeku ko, kihele kuba kyamonokono; na kuri nsweeki ko, yihele kuba yayabakina. 3Hango-nkuumbu, momanso ma luri lwaleele kunsa mampimbisi, sa bamayuka kunsa buungi; na ma luri lwadzoonsolo mu mamfuundu kunsa ntari sa babikisa mo ku yulu miluri.»
Wu bayelemini kubata
(Mat 10.28-31)
4Banduku baami, me nyileele kuri beenu ti: «Yaa lubata bari badzusaana nyutu, ha mambisa haho bahele na ki babweese kusa. 5Me nyilusoongo wunde wuluyelemini kubata. Bateenu wunde wuri kamana kudzusa, wuri na lutumu lwa kutuba ku lubila. Heehe, me nyiluleele ti bateenu wa bubwo.»
6«Buri bakooyarika maseke mataanu, mu mipata myoolo ko? Ngo kuri ti dimosi mu mo diri Nzaambi wadidzimbukina ko. 7Na mfu dza mutu weenu, dzodzinso dzataangu. Yaa luba na boomo ko; beenu lubvuriri ndaandu ti na maseke malaka!»
Kutaambula bunu pe kutuna Yesu
(Mat 10.32-33, 12.32, 10.19-20)
8«Me nyileele kuri beenu ti, mpisi wunde wutaambula me ha busu bwa baatu, lo Mwaana muutu se sa kamutaambula, ha busu bwa bambasi ba Nzaambi. 9Ngo wunde wutuna me ha busu bwa baatu, lo sa bamutuna ha busu bwa bambasi ba Nzaambi.»
10«Mpisi wuleele ntoono yayibi mu Mwaana muutu, lo sa bamuhemesene; ngo kasi wunde wusaana Mpeeve Yangisi, lo bamuhemesene ko.»
11«Mu ntaangu yibalunata mu manzo mankutukunu, na ha busu bwa batsuundisi na bangaa-lutumu, lo yaa luba na boomo ko, ti buri lukalila manyutu meenu, bunu pe nki luleele; 12bukuri Mpeeve Yangisi sa kaluyikisa, mu kilookolo kikyo mamo mayelemene mu kuleele.»
Nkuma ya kisina kyakiwulu
13Muutu mosi mu mpuumbu waleele kuri Yesu ti: «Muyikisi, leele kuri mpaangi me, mpisi tukaba masaala.» 14Yesu wabvutula kuri nde ti: «Muutu wu, na wasuusiri me mu kuba nzoonsi, bunu pe mukabiri masaala ma beenu?» 15Yesu waleele kuri bo ti: «Taleenu na seenee madyeele mu mpisi kiteesu kya ntiki-mboongo, bukuri ti hayuku muutu waluula mu busina, lo kidziingu kya nde kyahele kukaangama mu bitotolo bi kari na byo.» 16Yesu wabateele nkuma yimayi ti: «Muutu mosi wa kisina waba na manseke mapalisiri bimbutu byalaka. 17Nde watsima kunsa mutima ti: "Buri nyisa, bukuri nyahele na kibeendu ki nyisuusa bimbutu byaami?" 18Tumi waleele: "Me bumabu nyisa. Me nyitsaamuna matalaka ma nyiri na mo, mpisi ntuunga mabvuriri bunene, na nkutukisa masaangu momanso na bitotolo byaami. 19Tumi nyeki leele kuri muheebulu waami ti: Muheebulu waami, ye wuri na bitotolo byalaka byawuunguku mu mibvu myalaka. Sa wuuma kwaaku, dya, nwa na sa munkeembu." 20Ngo Nzaambi wamuleele ti: "Ye kiwulu, mu butsuku buubu ye bee fwiiri. Heki bi mwaakutukisa bibyo bya na biba?"» 21«Bunubwo se buba mu muutu wukutukisaa busina mu ntoono nde-meene, na wahele kusaka busina mu ntoono Nzaambi.»
Kusa nsiitu mu Nzaambi
(Mat 6.25-34)
22Yesu waleele kuri bayiki [baandi] ti: «Hango-nkuumbu, me nyiluleele ti: yaa lwenyoongo mu ntoono kidziingu ko, mu bi ludya, na mu ntoono nyutu, mu bi lulwaata. 23Bukuri kidziingu kibvuriri ti na byandya, na nyutu yibvuriri ti na binkuta. 24Talee binkwaaka: Byo bikookunaa ko, bikootolaa ko; byahele na binzangala, na matalaka, kasi Nzaambi koobadiisilaa, ngo beenu lubvuriri mufunu na bo! 25Nani mu beenu, wuri mu minyoongi myaandi, lo bangusini kunonono kidziingu kyaandi, mwaa-kwantele?»
26«Hango mbuti lo lwahele kubangisina ti mwaa kitotolo kyantele, dyaburi lukwenyoongo mu byakaka? 27Taleenu bu kwebuukula bifulu bya manseke: byo byasala ko, bya tuunga ko; ngo kasi, me nyiluleele ti: Solomo, kunsa nkeembu yaandi yoyinso, kasii lwaata bunu kitiiti ti kimosi mu byo ko. 28Ngo mbuti Nzaambi wulwiikaa bitiiti bya manseke, biri lumalu biri, ngo bweepari babitubiri ku muduku wa mbaawu, lo dyaburi nde kahele kubvula kulwiika beenu, baatu bari kanyi mwaa-dyantele! 29Ngo yaa lwesaka bi ludya na bi lunwa ko, na yaa lweba na minyoongi ko; 30bukuri byobinso bibyo bangooyi ba nsi yimayi bakwebisaka. Ngo kasi Taayi dyeenu yaari ti, beenu luri na nzala bibyo. 31Bvulee kasaka Kimfumu kyaandi, tumi bibyo baluha ha yulu haho.»
Busina bwa ku yulu
(Mat 6.19-21)
32Yaa ba na boomo ko mwaa-mpuumbu, bukuri Taayi dyeenu wamwiini ti bwabubwete mu kuluha Kimfumu. 33Yarikeenu bitotolo byeenu, na kabuleenu kuri bawelu; yirikeenu bimpokoro bya mboongo byahele kufuuka, na sweekeenu ku mayulu, busina bwahele kuwa. Kukwo kuri ngaa-kwiibi lo wahele kukokosolo, na bisekisi byahele kudya. 34Bukuri, haho ha sweeku busina bweenu, hanaho se haba mutima weenu.
Bisari biri naana
35«Kaangee misweele myeenu, na namukee miinda myeenu. 36Beenee bunu baatu bari mu kukiingila mfumu yaaku, mu ntaangu yi kafumuna ku makweele, mpisi heki bu katubukiri na kombitiri, bo bamudzibukiri mu mawasu. 37Kiminu kuri bisari bibyo biri, Mfumu ha kakwiisa wubatangisini kuri bari naana. Mu ngwanwa me nyiluleele ti: nde sa kalwaata kinkuta kya kusalila, sa kabadzakisa mpisi badya, na sa kayooko mu kwebasiila byandya. 38Mbuti mu kitulu kyabyoolo bunu pe kyabitatu, nde kakwiisa kubatangusina kuri bari naana, lo kiminu kuri bo!»
39«Ngo yabee dyo ti, mbuti ngaa-nzo kooyaabaa kilookolo ki kwiisa ngaa-kwiibi, nkani lo katala ko ti bamubula na nzo. 40Ngo beenu se, beenee bayirima, bukuri lwahele kuyaaba mu nkya kilookolo Mwaana muutu kakwiisa.»
Kisari kya kwiikama na kisari kyahele kukwiikama
(Mat 24.45-51)
41Petelo wafuula ti: «Mfumu, nkuma yiyo, mu beetu teeriri yo, hoti mu baatu bobanso?» 42Mfumu waleele: «Nkya kisari kyakwiikama na kyalubuka, kiri mfumu wumuha lutumu ha yulu bisari bya mu nzo yaandi, mu kubaha byandya mu ntaangu yayelemene? 43Kiminu kuri kisari kikyo, kiri mfumu ha kakwiisa, wumumwiini kuri wuri mu kusa bubwo. 44Ngwanwa me nyiluleele ti, sa kamusuusa mu kukebe bitotolo byaandi byobinso. 45Ngo mbuti kisari kikyo wutsima kunsa mutima waandi ti: "Mfumu yaami wuri mu kudziingila mu kwiisa"; na baandikiri kulata bisari bya babakala na bya bakyeetu, na kwedya na kwekolo malu; 46lo mfumu kisari kikyo sa kiisa mu kiluumbu kiri nde wahele kumukiingila, na mu kilookolo kiri nde wahele kuyaaba. Sa kamubinga, na sa kabwiilila maseembu kintwaari na bahele kukwiikama.»
47«Kisari kimwaayaaba kutya kwa mfumu yaandi, ngo wahele kuyirima, bunu pe wahele kusa bunu buri kutya kwa nde, lo sa bamusyooso nkwaasulu dzalaka. 48Ngo kasi kisari kiri kyahele kuyaaba, ngo kayirikiri mari nde yelemini kubwiilila nkwaasulu, lo kumulata mwaa-kwantele. Kuri wunde wu bari baha byalaka, sa bamuloombo byalaka; na kuri wunde wu bari basiimbisa byalaka sa bamuloombo bibvuriri.»
Nkabunu mu ntoono Yesu
(Mat 10.34-36)
49«Me nyayisiri mu kutuba mbaawu ha butoto, na me ntiiri nkani yeki yanamusu. 50Me nyiri na mbotokulu yi bambotoko, na me nyiri mu kubingikila nkani habee yiyirima mu mawasu.»
51«Buri beenu bu lutsima ti me nyatweesi kiyeengi ha butoto? Pele, ngo kasi me nyiluleele ti nkabunu. 52Mukwongo, mu lumalu sa kuba bari bataanu mu nzo mosi, lo bakabumini kuri batatu betelemisi kitaatu mu boolo, na boolo mu batatu. 53Nkabunu sa dziba kuri lo taayi telemisi kitaatu mu mwaana wa mubakala, na mwaana wa mubakala se mu taayi; nguri mu mwaana wa mukyeetu, na mwaana wa mukyeetu mu nguri, nguri mulumi mu mukasi mwaana, na mukasi mwaana mu nguri mulumi.»
Kubakula bidiimbu bya mantaangu
(Mat 16.2-3)
54Yesu wabweese kuleele kuri mampuumbu ti: «Ha lukoomonaa beenu, tuti ditoombokiri ku dyaamunaa ntaangu, hanaho beenu luleelaa ti: "Mvula bee yinokini", na bunubwo se bukooyirimaa. 55Na mbuti kiteembu kikwiisikila dya ku sude, beenu luleelaa ti: "Lolo bee kubee mwiini", na bunubwo se bukooyirimaa. 56Beenu luri bangaa-bumpitu-bumpyoongo! Beenu luyaaba kubakula kinzeri kya butoto na yulu; ngo kasi ntaangu yimayi beenu lwahele kuyaaba kubakula?»
Kuyelekese mabuungu na wu luri lwabakana
(Mat 5.25-26)
57«Buri beenu luri, bitsimi kutsuundisa pe mu beenu-meene, mu kumono mamo masuunguma? 58Mukwongo, lubaanaa lukweende ku muyalu na wunde wu luri lwabakana, lo saka bu luyukisina na nde ha lwakiri mu nzila, mu kubata kuri ti kakukooko ha busu bwa mutsuundisi, na mutsuundisi kakuyakisa mu myooko mya muyongolo, na muyongolo kakusoko mu boroko. 59Me nyileele kuri ye ti, ye wuri mpalila mumwo ko, natee wakiri kufuta mwaa-mupata wampotulu.»
Currently Selected:
Luk 12: MW2013
Highlight
Share
Copy
Want to have your highlights saved across all your devices? Sign up or sign in
Nouveau Testament Beembe © Bible Society of the Republic of Congo, 2013.
