Zakariya 14
14
Dam ge Bage ɗiŋnedin ne
1Ndi, dam ge Bage ɗiŋnedin ne mbo ya go,
mo Ursalima, naa mbo var ta mo kaŋ paal ma mo ndwara go#Juw 1:15..
2Mbi mbo kote pehir ge ɗogle ma ya pet
ndwara mbo ya mbal Ursalima,
a mbo ame suwal,
a mbo pál yàl ma,
a mbo fí ne naa zaab ma ne pool,
a mbo abe naa ge ne suwal diŋ ma le ɗu mbo mo̰r zi,
naa ge ne gá ma a mbo ga suwal diŋ.
3Go̰r go, Bage ɗiŋnedin mbo zut ya zum
mbal pehir ge ɗogle mbe ma,
dimma ne na pore mballa ge na ne ka mballa dam ge hṵsi ma go go.
4Dam mbe go, mbo kan na koo ge njal olive pal,
na ge ne Ursalima ziyar go gwa, le ge ham ge go.
Njal olive mbo wage se pe azi,
mbo ya̰ baal pul ne ham ya mbo sya.
Le ɗu mbo tit mbo le kuu,
le ge may tit mbo le mbii me.
5Aŋ mbo hé baal pul ge ne njal ma buwal zi sya ya,
ago baal pul mbe mbo det diŋ Atsal ya.
Aŋ mbo sya dimma ne aŋ bá ma ne dḛ ne sya
suwar ndatɗa ndwara zḛ zaman ge
Ozias, gan ge Yuda ne go go.
Ago Bage ɗiŋnedin, Dok ge mbi ne mbo mbo ya
poseya ne na naa ge mbegeya ma pet.
6Dam mbe go, kaŋ a̰me ge hon kwaya̰l mbo kat to bat,
iyalam ne tuwar-ndaar ge swarra mbo kat to bat.
7Mbo kat dam a̰me ɗu ge Bage ɗiŋnedin ne kwa na ne ɗeŋgo,
dam mbe go gyala ko ɗaal mbo kat to bat,
ko le ndwara pisil puy, swaga mbo kat kwaya̰l.
8Dam mbe go, mam so̰o̰l mbo zut ne Ursalima diŋ ya,
le ɗu mbo so mbo dol tene maŋgaɗam ga̰l yuwam ge ham ge pal ya,
ge le ɗu mbo so mbo dol tene maŋgaɗam ga̰l yuwam ge siya ge pal ya,
mbo ka sorra go mbe no, ko watuwak, ko somor.
9Dam mbe go, Bage ɗiŋnedin mbo kat gan suwal pal pet,
Bage ɗiŋnedin mbo kat ne myalam ɗu kikit,
na dḭl mbo ka tolla ne ɗu kikit.
10Suwal ge ne Ursalima ziyar go ma pet a mbo saŋge babur,
ne suwal Geba kuu ya mbo suwal Rimmon mbii ya.
Ursalima pala mbo her digi,
na suwal mbo don ne viya̰ wak ge Bayami ne ya
ɗiŋ mbo viya̰ wak ge ne keŋ ya,
na ge ne viya̰ wak ge zaŋgal byalam ya,
mbo ɗage ne zok burgu ge Hananeel ne ya,
ɗiŋ mbo swaga ɓerse oyo̰r ge gan ne ya.
11Naa mbo gwan kat suwal Ursalima diŋ,
a mbo gwan burmi na uzi to bat.
Ursalima mbo gwan kat halas.
12Ndi, yál ma ge Bage ɗiŋnedin ne mbo é ya
nama ge a ne mbá Ursalima pore ma pal no:
Swaga ge a gale ne anna ne bama koo digi go,
nama duur ma mbo hubi nama ta,
nama ndwara fa̰ ma mbo hubi nama ndwara pul zi,
nama ɗel ma mbo hubi nama wak ma pul zi me.
13Dam mbe go,
Bage ɗiŋnedin mbo e iigiya ge ɓaŋlaŋ nama buwal zi,
a mbo saŋge ndwara ta pal,
a mbo gá hun ta ta buwal zi.
14Naa ge Yuda ne ma mbo mbo ya Ursalima diŋ
mbal pore na pe go,
a mbo pál pehir ge ɗogle ge ne nama ziyar go ma
kaŋ gan ma mwaɗak:
dinar, ne fool kaal ne ba̰r ma gḛ ge be to.
15Yál ge ne ɓó naa dasana ma mbe, mbo ɓol kavaar ma go no me.
Kavaar ge naa ge ho̰l ma ne ma, ndwara go:
tisi ma, ne kwara fisan ma, ne jambal ma, ne kwara ma,
a mbo ɓol yál mbe.
16Swaga mbe go, pehir ge ɗogle ge ne mbo ya mbal Ursalima ma
ge ne mbo gá ya ne ndwara ma,
del ge daage zi, a mbo ka mbo Ursalima mbo uware gan,
Bage ɗiŋnedin, Bage naa ge mbal pore ma ne,
mbo ke vḛso ge gur ma ne me.
17Ago kadɗa pehir a̰me ge ne suwar pal
mbo ya Ursalima mbo uware gan,
Bage ɗiŋnedin, Bage naa ge mbal pore ma ne to ɗe,
mam mbo swar na pal to bat.
18Kadɗa naa ge suwal Masar ne ma mbo ya Ursalima
mbo ke vḛso ge gur ma ne to,
yál ge Bage ɗiŋnedin ne é na ne naa ge ne mbo ya mbo ke vḛso
ge gur ma ne to mbe mbo det nama pal.
19Ago mḛreya ge Masar ma, ne pehir ge ɗogle ma ne pet,
ge a ne mbo ya mbo ke vḛso ge gur ma ne to mbo kat go no.
20Dam mbe go, ko gergeleŋ ge tisi ma ne puy,
a mbo njaŋge nama ta go: «Mbegeya ne Bage ɗiŋnedin pe.»
Kaja̰le ge ne zok ge Bage ɗiŋnedin ne zi ma puy,
a mbo kat mbegeya dimma ca ne seɗe ge cigi swama twal tuwaleya ta ma go.
21Kaja̰le ge ne Ursalima ma ne Suwal Yuda go ma pet,
a mbo kat mbegeya ne Bage ɗiŋnedin,
Bage naa ge mbal pore ma ne pe.
Naa ge ne mbo mbo ja tyare tuwaleya ma pet,
a mbo abe nama sḭ bama duur ma.
Dam mbe go, naa ge ke suk ma mbo gwan kat
zok ge Bage ɗiŋnedin, Bage naa ge mbal pore ma ne zi to bat.
Currently Selected:
Zakariya 14: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
