Zakariya 13
13
Dok mbo burmi kaŋ sḭḭm ma ne anabi ge hale ma uzi
1Dam mbe go, mam mbo fut ne se digi, ndwara usi sone ma ne ya̰l ma ge pehir ge Dawda ne ma ne naa ge ne ka ne Ursalima go ma uzi.
2Dam mbe go ɗe, ka̰l ge Bage ɗiŋnedin, Bage naa ge mbal pore ma ne, mbi mbo ndage kaŋ sḭḭm ma dḭl ne suwal diŋ uzi, ndu a̰me mbo gwan dwat nama pal to bat. Uwale, mbi mbo burmi anabi ge hale ma ne o̰yom ge seŋgre ma ne suwal diŋ uzi me. 3Kadɗa ndu a̰me ɓyare gwan ke tene anabi, na bá ma ne na ná ge tolla ma mbo jan na go: «Mo mbya suya! Ago mo waage fare ne dḭl ge Bage ɗiŋnedin ne hale pal!» Swaga waage fare go, na bá ma ne na ná ge tolla ma mbo hun na. 4Dam mbe go, saaso mbo wan anabi ma swaga waage bama fare ma ne wan bama daalam ma pe go, a mbo gwan lase naa ne bama ba̰r anabi ge tame susu ma ne kanna bama ta to bat. 5A mbo gá janna go: «Mbi be anabi ne to, mbi ndu ge gar kaŋ ne, ago mbi da ne mbi gaaso ne mbi pala ne mbi bool ya day.» 6Kadɗa ndu a̰me ele na ya go: «A ma jwaŋ ma ne mo tok ma go ne go ɗaa?» Mbo gwan ne nama janna go: «Mbi ɓó jwaŋ mbe ma da ne mbi kondore ma diŋ ya.»
Bage ɗiŋnedin mbo koy naa mbut ne na pe
7Kore digi, o kasagar,
ke ho̰l ne mbi bage koyya,
ne mbi ndu ge tuli,
ka̰l ge Bage ɗiŋnedin ne.
Hṵ bage koyya,
go no, gii ma ba ɓarse se,
go no me, mbi ba saŋge mbi ndwara ya ge jabso ma pal ke yál#Mat 26:31, Mar 14:27..
8Ge suwal go pet, naa azi ne ataa buwal zi a mbo su,
ndu ɗu ne naa ataa buwal zi mbo gá ne ndwara ne ɗeŋgo.
Ka̰l ge Bage ɗiŋnedin ne.
9Mbi mbo dol ge ne gá ɗu mbe ol zi,
mbi mbo ɗyage na
dimma ne naa ne ɗyage fool kaal go,
ko dimma ne naa ne ɗyage dinar go.
A mbo kaɗe ge dḭl ge mbi ne zi,
mbi mbo za̰ nama.
Mbi mbo jan go, nama mbi naa ma ne!
Nama sḛ ma mbo jan go, Bage ɗiŋnedin i Dok ne#Wat 6:7, Dwa 29:12, Irm 7:23, Eze 11:20, Hos 2:25.!
Currently Selected:
Zakariya 13: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
