Zakariya 12
12
Zurra ge Ursalima ne
1Mḛreya ge Bage ɗiŋnedin ne Israyela pal.
ka̰l ge Bage ɗiŋnedin ne,
na ge ne kulbi pḭr ne digi,
ge ne dó suwar pe,
ge ne pá o̰yom ndu dasana zi.
2Ndi, mbi mbo ke ne Ursalima kop pore ge mbi ne, ndwara fere pehir ge ne na ziyar go ma. Suwal Yuda mbo ɓol yál mbe no me, swaga ge a ne mbo ver Ursalima dḛ ya se go. 3Dam mbe go, mbi mbo saŋge Ursalima njal ge dṵṵl neneg ne pehir ma pe pet. Nama ge ne mbo mbeɗe na ya digi ma, a mbo hon ta jwaŋ. Pehir ge ne suwar pal ma pet a mbo vwal bama wak na pal. 4Dam mbe go, ka̰l ge Bage ɗiŋnedin ne, mbi mbo kan vo tisi ma zi, mbi saŋge naa ge ne ndwar nama dale. Amma mbi mbo dol mbi ndwara pehir ge Yuda ne pal, mbi mbo dame pehir ge ɗogle ma tisi ma ndwara ma. 5Ga̰l ge Yuda ne ma mbo jan ta go: «Pool ge naa ge Ursalima ma ne ya Bage ɗiŋnedin, Bage naa ge mbal pore ma ne, Dok ge nama ne zi.» 6Dam mbe go, mbi mbo saŋge ga̰l ge Yuda ne ma dimma ne ol swala ge uwara ma buwal zi go, ko dimma ne gil wak ol ge gyaɗa tabeya zi go. A mbo til pehir ge ne bama ziyar go ma uzi mwaɗak. Ago naa ge ne Ursalima go ma, a mbo gwan kat bama byalam suwal Ursalima go.
7Bage ɗiŋnedin mbo é pe zur pehir ge Yuda ne ɓya, ne da pe, pehir ge Dawda ne ma ne naa ge ne Ursalima go ma, nama ndi ta dimma ne bama ne waɗe pehir ge Yuda ne ge may ma waɗe go to. 8Dam mbe go, Bage ɗiŋnedin mbo koy naa ge ne Ursalima go ma. Naa ge taŋgay ge ne nama buwal zi ma, a mbo hat pool dimma ne Dawda go, pehir ge Dawda ne me, mbo kat dimma ne Dok go, ko dimma ne maleka ge Bage ɗiŋnedin ne go nama ndwara zḛ.
Suwar pet mbo kat ne kḭḭmi
9Dam mbe go, mbi mbo burmi pehir ge ɗogle ma ge ne mbo ya det Ursalima ma uzi pet. 10Mbi mbo kan o̰yom ge kwa a̰se ma ne ge dwage kaɗeya ge pehir ge Dawda ne ma ne naa ge ne Ursalima go ma zi. Mbi ge a ne tṵ mbi, a mbo saŋge bama ndwara ya mbi ta#Yoh 19:37, Daa 1:7.. A mbo ke kḭḭmi ne mbi pe dimma ne naa ne fyal vya ge ɗu kikit go, a mbo fyal fyaso ge zwala ne mbi pe dimma ne naa ne fyal vya ge pul soy go. 11Dam mbe go, kḭḭmi mbo kat gḛ ge be to Ursalima go, dimma ne a ne ke kḭḭmi ge Hadad-Rimmon ne ge baal pul ge Megido ne go go. 12Suwal mwaɗak mbo kat kḭḭmi zi, pehir ge daage mbo ke na kḭḭmi. Ne vuwal pe ge Dawda ne zi, naa sonmo ma ne naa zaab ma a mbo kat hini hini ke kḭḭmi, ne vuwal pe ge Natan ne zi, naa sonmo ma ne naa zaab ma a mbo kat hini hini ke kḭḭmi, 13ne vuwal pe ge Levi ne zi, naa sonmo ma ne naa zaab ma a mbo kat hini hini ke kḭḭmi, ne vuwal pe ge Chimey ne zi, naa sonmo ma ne naa zaab ma a mbo kat hini hini ke kḭḭmi. 14Uwale, vuwal pe ge may ma pet a mbo ke bama kḭḭmi, naa sonmo ma ne naa zaab ma a mbo kat hini hini ke kḭḭmi me.
Currently Selected:
Zakariya 12: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
