Titus 1

Wak sanna

1Bulus, mo̰r ge Dok ne, bage temeya ge Jeso Kris ne, na ge Dok ne e na ndwara gene naa ge talla ge Dok ne ma ya hon fareba go, ne e nama kwa fare ge fareba ndwara ke Dok kerra ge jwap, 2ne da pe, nama ɓo jobreya ge ndwara ge ɗiŋnedin ne, na ge Dok ge ne kun hale to, ne ke na wak tuli ne pe dolla ya day, 3swaga ge na dam ma ne mbya, dya̰ na ya fare ge na ne zi, na ge a ne ho̰ mbi na, ge mbi oy na wak honna ge nee Bage máya, Dok ne pal. 4Mbi teme maktub hon mo Titus, mbi vya ge tolla hon fareba ge nee ne ge ɗu zi. Kwa a̰se ma ne halas ge Bá Dok ne, ne ge Kris Jeso ge nee Bage máya ne, na ka poseya ne mo#1:4 Ne fare janna Titus pal pe, ndi 2Kor 8:23, Gal 2:3, 2Tim 4:10..

Temel ge Titus ne suwal Krete go

5Mbi ya̰ mo ne suwal Krete ya ndwarra go, mo á kaŋ ge ne ga ma nṵsiya, mo e naa ga̰l ge temel ma suwal ge daage go dimma ne mbi ne ho̰ mo wak go. 6Ndu ge a ne é na ga̰l, na ka be fare a̰me na pal, ndu ge ne gwale ɗu, na vya ma ka naa ge hon fareba ma, naa ge a ne ɓol fare ge o̰y ne nama ta to ma, naa ge be ge pala ga̰l ma#1Tim 3:2-7.. 7A kwaɗa go, bage ne ɗame naa, dimma ne bage koy kaŋ ge Dok ne go, ka ndu ge a ne ɓol fare eya ne na pal to, na ka ndu ge ne maare naa fare to, ndu ge ne ame pore to, ndu ge ne fere jiya̰l to, ndu ge laar ol to, ndu ge na laar ne wa̰ kaŋ dunya to. 8Amma na ka ndu ge ame gwasal, ndu ge na laar ne wa̰ kaŋ ge kwaɗa, ndu ge ne ke kaŋ ma ne na viya̰ go, ndu ge dosol, ndu ge ne ho̰ tene Dok, ndu ge ne wan tene, 9na ka ndu ge ne wan tene fare hateya ge fareba pal. Go no me, na ka ndu ge ne mbya moɗege naa hateya ge dosol pal, ne gage naa ge a ne pili ta ne hateya ma me.

10Ago, ge naa ge ne vya̰ ba̰y ma buwal zi, naa gḛ a naa ge be ge gwan ne bama pala se to ma ne, naa ge sot fare ma se janna yayak ma ne, naa ge ya̰me naa ma ne, 11a kwaɗa go mo dibi nama wak. Ago a iigi yàl ma gḛ, a hate naa fare ge ne na viya̰ go to, ndwarra ɓol kaŋ ge ne na viya̰ go to. 12Ndu a̰me ɗu ne nama buwal zi, a nama anabi sḛ jya̰ ne: «Naa ge suwal Krete ma, ɗaɗak a kun hale, a kavaar ge sone ma ne, vagal ge uwal ma ne.» 13Fare janna mbe no a fare ge fareba ne. Ne da no ɗe, mḛre nama ndaar kaka, ne da pe nama ho̰ fareba honna ge hatal. 14na kaage nama e nama haŋgal sigir ge Yuda ma ne ma pal to, ne eya ge naa dasana ma ne ge ne saŋge fare ge fareba na go̰r ma pal to. 15Kaŋ ma pet a yaɗat ne naa ge yaɗat ma pe. Amma ne nama ge a ne hat ta seŋgre, ge a ne kuri be hon fareba ma pe, a̰me ge yaɗat ne nama pe to. Ago nama dwatɗa ma ne nama kwarra ma a seŋgre. 16A jan go bama kwa Dok kwa, amma nama kaŋ kerra ma ŋgay go nama kwa Dok to. A naa ge seŋgre ma ne, naa ge za̰ wak to ma, a ke fare a̰me ge kwaɗa to.

Currently Selected:

Titus 1: FGN2013

Highlight

Copy