Markus 13
13
Jeso waage burmiya ge zok ge mbegeya ne
(Mat 24:1-3, Luk 21:5-7)
1Swaga wat ne zok ge mbegeya zi ya zum go, na ndu ge ame hateya a̰me jan na go: «Bage hateya, ndi a ma njal ge siŋli ma ne go, a ma zok sinna siŋli ne go!» 2Jeso jan na go: «Ndi zok ná ge germem mbe no! Njal a̰me mbo gá na kon pala digi to, mbo burmi uzi.»
Kaŋ ma ge ne ŋgay gwanna ge Jeso ne ya
(Mat 10:17-22, 24:3-14, Luk 21:8-17)
3Jeso mbo kat na pe njal olive pal ne zok ge mbegeya ndwara ŋga. Bitrus, ne Yakub, ne Yohanna, ne Andrawus, a ele na fare hini jyan go: 4«Jya̰ i gale, kaŋ mbe ma ke dḛ ma swaga go ɗaa? A ma kaŋ ma mbo ŋgay pe aya ge kaŋ ma ne pet ne ɗaa?» 5Jeso é pe jan nama go: «Ke me haŋgal, na kaage ndu a̰me ya̰me aŋ to! 6Naa gḛ a mbo mbo ya ne dḭl ge mbi ne a mbo jan go: ‹mbi Kris ne!› A mbo ya̰me naa gḛ. 7Amma swaga ge aŋ ne mbo za̰ fare ge pore mballa ne ya, ne ko̰r ge pore mballa ne ma, iigi me ta to. A ŋgat kaŋ mbe ma mbo mbo ya, amma a be pe aya ne to gale. 8Pehir ma mbo ɗage ne ho̰l digi ta buwal zi, suwal ma mbo ɗage ne pore ta ta. Suwar ndatɗa ma ne baktar mbo ka kerra swaga ma go cucub. Kaŋ mbe ma no pet a mbo kat dimma ne yál tolla pe eya go.
9Ke me haŋgal, a mbo ɓyan aŋ swaga sarya ma go, a mbo fol aŋ Sinagog ma zi, a mbo gene aŋ naa ge ne dó bama ndwara ne suwal pal ma ndwara se, ne gan ma ndwara se ne mbi pe, ne da pe aŋ ke sayda ge mbi ne nama ta. 10Ago fare ge kwaɗa na oy pehir ma ta mwaɗak gale mbya. 11Swaga ge a ne mbo ne aŋ mbo ɓyanna nama tok go, iigi me ta ne fare ge aŋ ba mbo janna pe to, ago fare ge aŋ ba mbo janna a mbo hon aŋ na swaga mbe go juju. A be aŋ sḛ ma jan fare ne to, amma a O̰yom ge mbegeya. 12Ná vya mbo ɓyan na ná vya siya zi, bá mbo ɓyan na vya go no me, vya ma mbo ɗage ho̰l bama bá ma pal, a mbo hun nama uzi#Mik 7:6, Mat 10:21.. 13Naa pet a mbo kwane aŋ ne mbi dḭl pe. Amma ndu ge ne mbo wan tene ya ɗiŋ pe aya dab, na sḛ mbo má.»
Iigiya ge ɓaŋlaŋ
(Mat 24:15-22, Luk 21:20-24)
14Swaga ge aŋ ne mbo kwa na ge seŋgre ge ne burmi naa pe ya katɗa swaga ge na sḛ ne mbya kat go to go#Dan 9:27, 11:31, 12:11., ndu ge ne isi maktub na wa̰ fare mbe pe kwaɗa! Naa ge ne suwal Yahudiya go ma, nama sya mbo njal ma zi ya, 15bage ne zok jwaklak pala digi, na ka̰ na koo ya se wat na zok zi ndwara her kaŋ a̰me to#Mat 24:17., 16bage ne gaaso zi na gwa̰ ya ne go̰r na yadiŋ ndwara abe na ba̰r ga̰l to. 17Woo naa zaab ge ne mbo katɗa ne emel ma, ko ne nama ge ne mbo katɗa hon vya pam dam mbe ma pul zi ma! 18Kaɗe me, na kaage fare mbe na ɓo aŋ iyalam zi to. 19Ago dam mbe mbo kat dam iigiya ge ɓaŋlaŋ, na ge ne ke ɗu to ne dunya pe dolla ya day ɗiŋ ma̰ no, mbo gwan ke to bat#Dan 12:1, Mat 24:21.. 20Te da ne Bageyal ne tigri dam mbe ma ya zi pe to, ndu ge máya kat te to bat. Amma tigri dam mbe ma ya zi da ne na naa ge talla ma pe. 21Kadɗa ndu a̰me jan aŋ ya go: «Ndi, Kris ya go go!» Ko «Ya ya go» ho̰ me fareba na fare janna ma pal to. 22Ago Kris ge hale ma ne anabi ge hale ma mbo ɗage ne aŋ buwal zi digi, a mbo ke kaŋ ŋgayya ma ne kaŋ ge ajab ma ne ya̰me naa pe, ko mbyat a ya̰me naa ge talla ma. 23Ke me haŋgal! Mbi waage aŋ fare ma ya zḛ tek.
Gwan na ge vya ge ndu ne ya
(Mat 24:29-31, Luk 21:25-28)
24Amma dam mbe ma go, go̰r iigiya mbe go, gyala mbo saŋge tṵ, saba mbo ɗele to#Isa 13:10, 34:4, Eze 32:7, Juw 2:10, 3:4., 25guwa̰r ma fage ne digi ya se, pool ge ne digi zi ya ma mbo ndat. 26Go no, aŋ mbo kwa vya ge ndu ne mborra ya pḭr pal, ne pool gḛ, ne hormo gḛ me#Dan 7:13.. 27Mbo teme na maleka ma ya, a mbo kote na naa ge talla ma ne dunya keŋ ge anda ma ya digi#Dwa 30:4, Zak 2:10, Neh 1:9..
Fare sḭ ge fere ne
(Mat 24:32-36, Luk 21:29-33)
28Ame me hateya ne fare sḭ ge fere ne ta. Swaga ge na tok ma ne ɗage erra, na gaar ma ne ɗage ɗufiya, aŋ kwa kwa go gyala pul gá gwa. 29Go no me, swaga ge aŋ ne mbo ɗage ya kwa kaŋ mbe ma no, kwa me go mborra ge Vya ge ndu ne ya gá gwa, ya zok wak go. 30Fareba mbi jan aŋ, kaŋ mbe ma no pet a mbo mbo ya be ge doŋ pe mbe no kale to gale. 31Digi ma ne suwar mbo kale uzi, amma fare ge mbi ne ma mbo kale uzi to bat. 32Ndu a̰me ge kwa dam mbe, ko ler mbe to bat, ko maleka ge ne digi zi ya ma, ko Vya, a Báá ɗu kikit kwa na ne.
Ka me yaŋyaŋ
(Mat 24:42, 25:13-15, Luk 12:36-38, 19:12-13)
33Ke me haŋgal, ka me yaŋyaŋ, ne jo̰ aŋ kwa dam ge fare mbe ma mborra ya go to. 34A dimma ne ndu ne mbo gwasal, ya̰ na yàl go, hon na mo̰r ma na wak, ya̰ nama temel ge kerra ma, hon bage koy zok wak na wak go, na ka yaŋyaŋ. 35Ka me yaŋyaŋ, ne jo̰ aŋ kwa gwanna ge bageyal ne ya to. Ko gwan’a gasamal, ko ɗaal ga̰l, ko baare tol fyaso, ko cya̰wak vḛ. 36Na kaage na gwa̰ ya tukcuk ɗo, na ɓó aŋ dam se to. 37Fare ge mbi ne jan aŋ mbe no, mbi jan naa pet. Ka me yaŋyaŋ!
Currently Selected:
Markus 13: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.