Matta 28

Tanna ge Jeso ne

(Mar 16:1-10, Luk 24:1-12, Yoh 20:1-10)

1Dam ɗigliya go̰r go, dam dumas ne syal na pala, Maryam ge suwal Magdala ne ma ne Maryam ge may, a mbo ndil táál wak. 2Ndi, suwar ndat ndatɗa ge ɓaŋlaŋ, maleka ge Bageyal ne kan na koo ne digi ya se, viŋgri njal uzi, kat na pal. 3Na ndwara ka serra, na ba̰r ma kat saal taɗak me. 4Naa ge koy táál wak ma vo wan nama, a abe ndatɗa rarag, a gá dimma ne bama su su go. 5Maleka jan naa zaab ma go: «Sya me vo to, ago mbi kwa go aŋ ɓyare Jeso, na ge a ne pé na kaŋgre pal. 6Ne go go to, tanna ya, dimma ne na sḛ ne jya̰ go. Mbo me ya, ndi me swaga ge a ne dó na no. 7Mbo me avun cap mbo jan na naa ge ame hateya ma go: ‹Tan’a digi ne naa ge siya ma buwal zi, ndi, mbo ya Galile, aŋ ndwara zḛ ya. Aŋ mbo kwa na yago.› No a fare ge mbi ne jan aŋ ne.» 8A mbo ne táál wak go avun cap, ne vo ɓanna ne laar saal ge ɓaŋlaŋ, a sya ndwara mbo waage naa ge ame hateya ma fare mbe. 9Ndi, Jeso mbo ya nama ndwara zi, jan nama go: «Mbi sa̰ aŋ wak!» A mbo ya, a tage na koo ma, a gur bama koo ma na ndwara se uware na. 10Jeso jan nama go: «Sya me vo to! Mbo me jan mbi ná vya ma go, nama mbo Galile ya, A mbo kwa mbi yago.»

Fare janna ge naa ge koy táál wak ma ne

11Naa zaab mbe ma ne mborra gale, ne naa ge ne ka koy táál wak ma buwal zi, a̰me ma wat suwal diŋ, a mbo wan naa ge ke tuwaleya ma ga̰l ma kaŋ ge ne ke ma pe pet. 12Swaga ge a ne kote poseya ne ga̰l ge ɓase ma ne ma, a hon asagar ma bware mbyatɗa, 13a jan nama go: «Jya̰ me go: ‹Na naa ge ame hateya ma mbo ya ɗaal, a sé na ne i pal no, i gale ne dam se.› 14Kadɗa fare mbe detɗa bage ne dó na ndwara ne suwal pal togor zi, i sḛ ma ma̰ dol ta fare mbe wak go nṵsiya, na kaage na ke aŋ a̰me to.» 15A ame bware mbe, a ke dimma ne a ne yuwale bama go. Fare mbe dasare Yuda ma buwal zi pet go no ɗiŋ ma̰ no.

Jeso dyan tene na naa ge ame hateya ma ta

16Naa ge ame hateya ge wol para ɗu ma mbo Galile ya. A mbo ge njal ge Jeso ne ŋgay bama na pala digi ya. 17Swaga ge a ne kwa na, a gur bama koo ma na ndwara se uware na, a̰me ma ka tumriya. 18Jeso mbo ya nama ta, jan nama go: «Pool ge ne digi zi ya ma ne ge ne suwar se ma pet a hon mbi nama go. 19Mbo me, ke me pehir ge ne dunya zi ma pet naa ge ame hateya ma, ke me nama baptisma dḭl ge Bá, ne ge Vya, ne ge O̰yom ge mbegeya ne zi, 20hate me nama koy wak honna ge mbi ne ho̰ aŋ ma pet. Ndi, mbi ya go poseya ne aŋ, dam ma mwaɗak ɗiŋ mbo dam pe aya.»

Currently Selected:

Matta 28: FGN2013

Highlight

Copy