Luka 5

Tolla ge naa ge ame hateya ge zḛ ge ma ne

(Mat 4:18-22, Mar 1:16-20, Yoh 21:1-11)

1Dam a̰me ɗu, ɓase ma terse ta ya na ta zi ndwara za̰ fare ge Dok ne. Na sḛ mḛ maŋgaɗam Genezaret wak go. 2Kwa fak ma azi ne yabeya ne mam wak go, naa ge swat soso ma kan bama koo ya se ndwara usi bama kool ma. 3Ndé fak a̰me go, fak mbe ka ge Siman ne, jan na go na nda na mam pul zum ya nde. Kat fak go, ka hate ɓase ma. 4Swaga ge ne á fare janna, jan Siman go: «Nda tene ɗugul zum ya, dó me aŋ kool swat soso.» 5Siman gwan ne na janna go: «Bage hateya, i swa soso da ne ɗaal zi ya no day, i be wan a̰me to, fare janna ge mo ne pal, mbi ma̰ dol kool.» 6Swaga ge a ne do kool, a wan sii gḛ ge be to, nama kool ka ɓyare taabeya. 7a kar bama kaam ge ne fak ge may ya ma tok, nama mbo ya mbar bama. A mbo ya, a wi fak mbe ma jwak, a ka ɓyare ɗimiya. 8Swaga ge Siman Bitrus ne kwa kaŋ mbe no, gur na koo Jeso ndwara se, jan na go: «Bageyal, abe tene uzi ya ne mbi ta nde, ago mbi ndu ge sone ne.» 9Ago vo wan na ma ne na kaam pet, ne sii ge bama ne wa̰ gḛ pe, 10Yakub ma ne Yohanna ge Zebede vya ma, Siman kaam ma vo wa̰ nama go no ca me. Jeso jan Siman go: «Sya vo to! Ne gá ne zḛ no, mo mbo gá wan naa dasana ma.» 11A gwan ne fak ya wakal zi, a ya̰ kaŋ ma pet, a kare na pe.

Jeso zon ndu ge kun swama

(Mat 8:1-4, Mar 1:40-45)

12Ne jo̰ Jeso ne suwal a̰me go, ndu a̰me ge kun swama ne go me. Swaga ge ne kwa Jeso, gur se, kaɗe na go: «Bageyal, kadɗa mo vinna, mo da ne pool hat mbi harcal.» 13Tyare na tok, tat na, jan na go: «Mbi vin go, há harcal.» Swaga mbe go juju, na swama kunna usi uzi. 14Wan na togor na kaage jan ndu a̰me to, jan na go: «Mbo ŋgay tene naa ge ke tuwaleya ma ta, mo tyare tuwaleya eya ge Musa ne pal, ne da pe na ka kaŋ sayda nama ta pet#Lev 14:2-32..» 15Naa gá far ne na dḭl swaga ma go pet gḛ ge be to, ɓase ma ka kote ya gḛ ndwara za̰ na, ne set zonna ne moy ge bama ne ma go me. 16Amma abe tene mbo babur pul uzi ya ke kaɗeya.

Jeso zon ndu ge looɗol

(Mat 9:1-8, Mar 2:1-12)

17Dam a̰me ɗu, Jeso ne hateya, Farisi ma ne naa ge hate naa eya ma, ge ne mbo ne suwal ge Galile ne ma, ne ge Yahudiya ne ma, ne Ursalima ya ma, a ka naa buwal zi. Pool ge Bageyal ne kat ne na, ka e na zon moy ma. 18Ndi, naa a̰me ma ne in ndu ge looɗol fiya saŋgal go, a ka ɓyare go bama wat ne na ya zi, bama ba e na na ndwara se. 19Ne jo̰ a be ɓol swaga ge wat ne na ya zi to ne ɓase pe ɗe, a nde zok pala digi, a surbi na ne na saŋgal ya se zok dwalla go, naa tuŋsi zi, Jeso ndwara se. 20Swaga ge ne kwa hon fareba ge nama ne, jan ndu ge moy go: «A pore mo sone ma ya go.» 21Naa ge njaŋgeya ma ne Farisi ma a ɗage janna go: «A wuɗi te sal Dok ne go ɗaa? A wuɗi mbya pore sone ma, a be Dok ɗu kikit to’a?» 22Ne jo̰ Jeso kwa nama dwatɗa ma, gwan ne nama janna go: «Aŋ te dwat ne aŋ dulwak zi go gyana ɗaa? 23A fogor ge ndu jan go: a pore mo sone ma ya go, ko ge a jan go: ɗage digi mo mbo mo mborra ne ɗaa? 24Ge aŋ kwa go vya ge ndu ne da ne pool suwar pal ge pore sone ma ɗe, jan ndu ge looɗeya go: Mbi jan mo, ɗage digi he mo saŋgal, mbo mo yadiŋ.» 25Swaga mbe go juju, ɗage digi nama ndwara go, hé na kaŋ fiya, mbo na ya, ka uware Dok na ndwara zḛ ya. 26Pet, a ke ajab, a ka uware Dok. Vo wan nama, a ka jan go: «I kwa kaŋ ajab ma̰ ya go!»

Tolla ge Levi ne

(Mat 9:9-13, Mar 2:13-17)

27Go̰r kaŋ mbe ma no go, wat zum, kwa ndu ge tyare kaŋ a̰me, na dḭl Levi, ne katɗa naa ge tyare kaŋ ma swaga temel zi jan na go: «Kare mbi pe ya!» 28Ya̰ kaŋ ma pet, ɗage digi, mbo na pe ya. 29Levi ke kaŋzam gḛ na yadiŋ ne Jeso pe. Naa ge tyare kaŋ ma gḛ ne naa ge ɗogle ma kat kaŋzam wak go poseya ne na. 30Farisi ma ne nama naa ge njaŋgeya ma ka or bama wak na naa ge ame hateya ma ta go: «Aŋ te zam kaŋ ne njot kaŋ dagre ne naa ge tyare kaŋ ma ne naa ge sone ma kyaɗa ɗaa?» 31Jeso gwan ne nama janna go: «A be naa ge moy to ma ɓyare bage zon naa pe ne to, amma, a naa ge moy ma. 32Mbi be mbo ya tol naa ge dosol ma to, amma naa ge sone ma ndwara go nama saŋge ta se.»

Fare janna ge Jeso ne asiyam pal

(Mat 9:14-17, Mar 2:18-22)

33A jan na go: «Yohanna naa ge ame hateya ma, ko ge Farisi ma ne ma a ke asiyam, ne ke kaɗeya ɗaɗak, amma ge mo ne ma, a ka zam kaŋ ne njotɗa.» 34Jeso jan nama go: «Aŋ da ne pool e naa ge a ne tó nama ya vḛso sanna go ma ke asiyam tek ge gwale giya̰l obe gale ne go dagre ne nama ɗaa? 35Dam ma mbo ya go ge a mbo hé gwale giya̰l obe, go no a mbo gá ke asiyam.»

36Gwan jan nama fare sḭ go: «Ndu ne pool taabe ba̰r wak ge giya̰l ndwara dyan ba̰r ge kamal to. Go no ba̰r ge giya̰l taabe uzi. Ba̰r ge giya̰l ma ne ba̰r kamal ɓan dagre to. 37uwale, ndu ne pool kan oyo̰r jiya̰l ge giya̰l ge ɗutulu ge kamal zi to. Ago oyo̰r jiya̰l ge giya̰l ryan ɗutulu mbe ma ryan, jiya̰l kan uzi, ɗutulu ma vḛne me. 38A kan oyo̰r jiya̰l ge giya̰l ge ɗutulu ge giya̰l zi. 39Ndu ge ne njot jiya̰l ge zonna gwan njot jiya̰l ge giya̰l to, ago jan go: ‹Ge zonna kwaɗa gḛ!›»

Currently Selected:

Luka 5: FGN2013

Highlight

Copy