Luka 16

Bage koy kaŋ ge ndwara ndaar

1Jeso gwan jan na naa ge ame hateya ma go: «Ndu ge gan a̰me ka ne bage koy kaŋ, na ge a ne e fare na pal go na vḛne na kaŋ ma ne ya go. 2Tol na ya, jan na go: ‹Mbi za̰ ma fare ne mo pal go no ɗaa? Wa̰ mbi kaŋ ge mo ne ke ma pe, ago mo gwan kat bage koy mbi kaŋ ma to.› 3Bage koy kaŋ jan tene go: ‹Mbi ke ma̰ gyana ɗaa? Ne jo̰ mbi bageyal ame na kaŋ ma ya ne mbi tok go. Kaŋ garra ɗe, mbi pool ge gar kaŋ to, kaŋ kaɗeya ɗe, ke mbi saaso. 4Mbi ma̰ kwa kaŋ ge mbi ma̰ ke. Swaga ge a ma̰ ndage mbi ya ne mbi temel zi, naa ma̰ ame mbi bama diŋ.› 5Tol naa ge a ne na bageyal wul bama pal ma ya ɗu ne ɗu, ele ge zḛ ge go: Mo pot mbi bageyal gyana ga ɗaa? 6Na sḛ jan go: Num il kis. Bage koy kaŋ jan na go: Ame mo maktub no, ka se avun cap, njaŋge: wara anuwa̰y. 7Gwan jan bage may go: Mo ɗe, mo pot gyana ga ɗaa? Na sḛ Jan na go: Gḛme suwàl kis. Bage koy kaŋ jan na go: Ame mo maktub no, njaŋge: wara tiimal. 8Bageyal dore bage koy kaŋ ge hale mbe no, ne na ne ka ɗalla pe. Ago naa ge ne dunya mbe no zi ma ɗalla gḛ waɗe naa ge kwaya̰l ne ma.»

9Gwan jan go: «Mbi jan aŋ, ɓo me kondore ma ne bware ge ne na viya̰ go to ma, ne da pe, swaga ge ne kadɗa to, aŋ kondore mbe ma mbo ame aŋ swaga katɗa ge ɗiŋnedin zi. 10Ndu ge ne kat ɗeŋger kaŋ ge jyale cecḛ ma zi, kat ɗeŋger kaŋ ge ga̰l ma zi me. Ndu ge ne kat ɗeŋger to kaŋ ge jyale cecḛ ma zi, kat ɗeŋger to kaŋ ge ga̰l ma zi me. 11Kadɗa aŋ day kat ɗeŋger bware ge ne na viya̰ go to ma zi to, a wuɗi mbo hon aŋ kaŋ kwaɗa ge fareba ma ne ɗaa? 12Kadɗa aŋ day kat ɗeŋger ge kaŋ ge naa ne ma zi to, a wuɗi mbo hon aŋ ge aŋ ne ne ɗaa? 13Dore a̰me ne pool ke temel mo̰r hon bageyal ma azi to. Ago na kwane ɗu, na laar wa̰ ɗu, ko na mbarge ne ge ɗu, na sen ge ɗu me. Aŋ ne pool ke temel mo̰r hon Dok, aŋ ka ke hon dok ge bware ma ne to.»

14Farisi ma, ne jo̰ nama laar wa̰ bware, swaga ge a ne za̰ fare mbe ma pet, a ka man na. 15Jeso jan nama go: «Aŋ ɗe, aŋ ŋgay naa go aŋ dosol, amma Dok kwa aŋ dulwak ma kwa. Ago kaŋ ge naa dasana ma ne ndil na ɓaŋlaŋ, ne Dok ta, a kaŋ senna ne.

16Zaman ge Eya ge Musa ne ma ne maktub ge anabi ma ne ma mbo ya diŋ zaman ge Yohanna ne go. Ne swaga mbe go day, fare ge kwaɗa ge muluk ge Dok ne ne waage ya go, ndu ge daage, á tene wat zi da ne pool. 17Amma a fogor ge pḭr ma ne suwar kale uzi, ge fare a̰me cecḛ ge eya ne wak det se baŋ.

18Ndu ge daage pet ge ne yan na gwale, gwan mbo san ge ɗogle, ke zina. ndu ge ne kat yàl ne gwale ge na obe ne ya̰ na, ke zina me.»

Fare sḭ ge ndu ge gan ma ne Lyazaru ne

19«Ndu ge gan njwanjway a̰me ka kan ba̰r ge siŋli ge káál citat na ta, ka ke vḛso dam ne dam. 20Ndu ge a̰se a̰me na dḭl Lyazaru ka fiya na zok wak pala zum, na duur ka jwaŋ ko̰o̰k, 21ka ɓyare go na zam kaŋ ge ne det ne ndu ge gan mbe tabul pala digi se ma. Amma gu ma ka mbo ya ɗar na jwaŋ wak ma. 22Ndu ge a̰se su, maleka ma mbo hé na, a mbo e na Abraham ko̰l zi ya. Ndu ge gan mbe su me, a mbul na. 23Siya ma táál zi ya, ne jo̰ ka za̰ yál ge be to, he na pala digi, kwa Abraham ne kaal ya, Lyazaru ne na ko̰l zi. 24Ndage na ka̰l digi oyya go: ‹Báá Abraham, kwa mbi a̰se, teme Lyazaru ya, na tá na tok vya mam pal, na mbo ya iyal mbi ɗel, ago mbi njot ne go yál ne ol mbe zi ge be to.› 25Amma Abraham jan na go: ‹Mbi vya, kwa go mo ɓo mo kaŋ kwaɗa ma swaga ge mo ne ka ne ndwara, Lyazaru ɓo kaŋ ge sone ma me. Se no, na sḛ ɓo laar iyalla, amma mo ɗe, mo ɓo yál njotɗa. 26Ta uwale, nee ne aŋ buwal zi, tuul ga̰l ya go, ndu ne pool ge mbo aŋ ta ya to, ko ne aŋ ta ya mbo ya i ta to me.› 27Ndu ge gan mbe jan na go: ‹Báá, mbi kaɗe mo, teme Lyazaru mbo mbi bá yadiŋ ya. 28Ago mbi ná vya ma ya ya anuwa̰y, na mbo zwal nama togor na kaage nama gwan mbo ya swaga njot yál mbe no zi to.› 29Abraham jan na go: ‹A da ne Musa ma ne anabi ma ne ya, ya̰ nama za̰ nama.› 30Ndu mbe gwan ne na janna go: ‹To, báá Abraham, kadɗa ndu a̰me ne naa ge siya ma buwal zi ma̰ mbo ya ɓol nama, a ma̰ hase.› 31Abraham jan na go: ‹Kadɗa a zá̰ Musa ma ne anabi ma to, ko ndu a̰me ta̰ ne siya ma buwal zi puy, a ne pool ge za̰ na to›.»

Currently Selected:

Luka 16: FGN2013

Highlight

Copy