Ibriniya ma 9

Tuwaleya ma ge wak tuli ge zaŋgal zi

(Wat 25, 26, 40:17-33)

1Wak tuli ge zḛ ge ka da ne na eya ma ne na temel kerra pe ne zok ge mbegeya suwar se me. 2Ago, a ɗū gur a̰me, na pul ge zum ge a ka tol na swaga ge mbegeya, a ɓol ɗuli kal ma ne tabul, ma ne katugum ge a ne kan syareya Dok ndwara se ma na go. 3Ge ba̰r zok pul le ge zi ge go, a ka tol na swaga ge mbegeya uzi hini cat. 4Ge na pul zi, a ɓol twal ɗusi dukan ge dinar, ne sandu wak tuli ge ne so̰me ne dinar, na ge fal ge dinar ge Maan ne na pul go, ne calaŋ ge Aaron ne ge na wak ne ɓoy, ne gwal wak tuli ma, a ne na pul zi. 5Kavaar ge ne digi zi ya ge Dok ne ma ka sandu wak tuli pala digi#9:5 Ŋgay swaga katɗa ge Dok ne, Dok ka dyan tene Musa ta swaga mbe go: Lev 16:2, 1Sam 4:4., a ka kulbi swaga ge kep tuwaleya ne mbo ya cigi swama ge poreya ne na pal go se ne bama kḭḭm#Wat 25:17-22.. A be swaga ge wan na pe se gagaraw ne to.

6A ɗū na digi go mbe no, bage tuwaleya wat na pul ge zum ge go ɗaɗak ke na temel ma#Isi 18:2-6, Lev 16:2-34.. 7Amma kep tuwaleya wat na pul ge azi zi ya ne ɗeŋgo ndwara ɗu del zi. Wat zi ya da ne swama ge tuwaleya ge na sone ne pe, ne ge ɓase ma ne pe me. 8O̰yom ge mbegeya ŋgay go viya̰ ge swaga ge mbegeya uzi hini cat ne be hage to, tek ge gur le ge zum ge gale ne go. 9No a kḭḭm ge zaman ge ma̰ ge ne ne. Ŋgay go bobo ma ne tuwaleya ma ge naa ne tyare nama hon Dok nama ne pool ge hat bage ne tyare bama dulwak harcal Dok ndwara se to. 10A eya ma ge duur pal ne baŋ, ne kaŋzam ma pe, ne kaŋ njotɗa ma pe, ne usi ta ge ndwara hat ta harcal ma pe ne baŋ. A e nama go nama ka ɗiŋ dam ma ge kaŋ ma erra go.

Jeso tyare tene sḛ dimma ne tuwaleya go

11Amma Kris mbo ya dimma ne kep tuwaleya ge kaŋ kwaɗa ma ne ge ne mbo ya ne go. Na sḛ kale da ne gur ge ɓaŋlaŋ ge siŋli waɗeya ya, na ge ndu dasana ne ke na ne to, ndwara go, ge dolla ge dunya mbe no ne to. 12Na sḛ wá ge swaga ge mbegeya uzi hini cat zi ndwara ɗu gijim, be ne swama ge bemjere ma ne, ko ge nday dalu ma ne to, amma ne na swama sḛ. A go no nee ɓo zurra ge ɗiŋnedin no. 13Ago, kadɗa swama ge bemjere ma ne, ne ge nday dalu ma ne, ne sḭḭm ge nday kale ne ge a ne bugi na naa ge a ne há ta seŋgre ma pal, hat nama duur yaɗat ɗe#Lev 16:14-16, Isi 19:9,17-19., 14swama ge Kris ne, na ge ne tyare tene be sáso hon Dok ne O̰yom ge ɗiŋnedin ta, hat nee haŋgal ge ne gene nee mbo siya zi ma yaɗat ma̰ ndwara gyana ga ge ndwara e nee ke temel hon Dok ge ndwara ɗaa?

Kris wi wak tuli ge giya̰l wak da ne na swama

15Da ne pe no, na sḛ saŋge Bage ne naa buwal zi ge wak tuli ge giya̰l ne no, ne da pe su da ne zur ya̰l ge ne ke wak tuli ge zaŋgal zi ma pe. Nama ge Dok ne tó nama a da ne pool zam joo ge ɗiŋnedin ge a ne ke nama na wak tuli. 16Ago, swaga ge ndu ne ya̰ na wak siya, a kwaɗa go ndu mbe su su ɓya ba kat ne pool. 17Ago, wak siya kat ne pool go̰r siya ge ndu mbe ne go, tek ge ndu mbe gale da ne ndwara, wak siya mbe pool to. 18Da ne pe no, ko wak tuli ge zaŋgal puy, na wak hage go̰r swaga ge swama ne ka̰ se go. 19Swaga ge Musa ne ka waage ɓase ma pet wak honna ge Eya ne ma, he swama ge nday dalu ma ne, ne ge bemjere ma ne, ne mam, ne ba̰r tame susu ge káál citat, ne hisop, cigi swama ge maktub ta, ge ɓase ma ta pet me#Wat 24:3-8., 20jan go: «No a swama ge wak tuli ne, na ge Dok ne ho̰ aŋ wak go aŋ koy na ne#Wat 24:8..» 21Uwale, cigi swama mbe gur ta no, ne kaŋ temel ge tuwaleya ne ma ta no pet me#Lev 8:15.. 22Eya pal, a hat kaŋ ma harcal da ne swama ta. Be ge swama kan se to, poreya to bat#Lev 17:11..

Siya ge Kris ne pore sone ma go

23Ago, kadɗa kḭḭm ge kaŋ ma ge ne ke ne digi zi ya ma hat harcal go mbe no ɗe, a kwaɗa go, kaŋ ma ge ne digi zi ma ɓo tuwaleya ge ne waɗe ne siŋli. 24Ago, Kris be wat zok ge mbegeya ge ne ke ne tok ge ndu dasana ne zi to, na ge ne ke ne dir ge na ge fareba ne, amma na sḛ wá digi zi ya, se no, mḛ ya Dok ndwara se ne nee pe. 25Be mbo tyare tene ndwara wowol dimma ne kep tuwaleya ne wat zok ge mbegeya zi del ne del ne swama ge kavaar ma ne go to. 26Te go ɗe, te ya ka za̰ yál ndwara wowol ne pe dolla ge dunya ne ya day. Amma a ndwara ɗu gijim, ge dam ge hṵsi ma no go, dya̰ tene ya no ndwara burmi sone ma uzi ne tyareya ge na ne tyare tene tuwaleya. 27Ne jo̰ naa dasana ma su ndwara ɗu kikit, ne go̰r go Dok ba kun nama sarya. 28Go no me, Kris tyare tene ndwara ɗu kikit ndwara gul sone ge naa ɓase ne uzi#Isa 53:12.. Mbo gwan gwan’a ndwara ɗu, a be ne gul sone ma uzi pe to, amma ne má naa ge ne da̰re gwanna ge na ne ya ma pe.

Currently Selected:

Ibriniya ma 9: FGN2013

Highlight

Copy