Ibriniya ma 6

1Ne no pe ɗe, ya̰ me nee hateya ge pe eya ge Kris ne ma uzi, za me nee zḛ det ya mbyatɗa tap, be ge gwan dol pe ge giya̰l to: abe me ta ne kaŋ kerra ge ne gene naa siya zi ma ta, ne hon fareba Dok ta, 2ne hateya ge baptisma ma pal, ne tok eya pal ma, ne tanna ge naa ge siya ma ne ma, ne sarya kunna ge ɗiŋnedin. 3Zá me nee zḛ! No a kaŋ ge ne ba mbo kerra ne, kadɗa Dok vinna.

4Ago, ne nama ge a ne ɓo kwaya̰l ndwara ɗu ma, ge a ne tyare bobo ge Dok ne ma, ge a ne ame O̰yom ge mbegeya ma#10:26., 5ge a ne tyare fare ge siŋli ge Dok ne ma, ge a ne kwa pool ge dunya ge ne mbo mbo ya ne ma, 6ge a ne dé ma, ndu ne pool ge gwan gwan ne nama ya haseya go to bat. Ago nama sḛ ma gwan ne Dok Vya pella uwara kaŋgre pala digi, a saŋge na kaŋ senna naa ta pet.

7Swaga ge suwar ne njot mam ge ne swar ɗaɗak e kaŋ ma donna ya digi kwaɗa ne naa ge gar na ma pe, go no ɓo wak busu ne Dok ta. 8Amma kadɗa na do̰ kore ma ne kabubu ma, gwan mbar a̰me to, ne ga ne zḛ no a gá vḛne wak na pal, a til na uzi#Pe 3:17-18..

9Kadɗa ne aŋ ɗe, naa ge laar wanna ma, ko i jya̰ go puy ɗe, i da ne kwarra tyatyat go aŋ ya viya̰ ge kwaɗa go, viya̰ ge máya go. 10Ago, Dok a be dosol to ɗo, ba vyale aŋ kaŋ kerra ma to, ko laar wanna ge aŋ ne ŋgay na ne na dḭl pe swaga ker temel hon naa ge mbegeya zaŋgal, ko ma̰ no iya uwale to. 11Amma i da ne ene go ndu ge daage ne aŋ buwal zi na ka da ne har ta ge ɗu mbe ɗiŋ mbo pe aya, ne da pe jobreya ge aŋ ne wak dé ya wiya tap. 12Ka̰ me ta se to, amma bole me nama ge, hon fareba ma ne wan ta zi, a ne ame joo ge Dok ne ke na wak tuli ma.

13Swaga ge Dok ne ke Abraham wak tuli, ne jo̰ ndu a̰me ge gwan waɗe na ne ga̰l to ɗe, guni tene ne na sḛ no. 14jya̰ go: «Fareba, mbi mbo e mo wak busu gḛ, mbi mbo zuli mo hir ma se gḛ ceɗed#Pe 22:16-17..» 15Ne jo̰ Abraham wa̰ tene, ɓo wak tuli ge Dok ne ke ne na no.

16Ago, naa dasana ma guni ta da ne ndu ge ne waɗe bama ne ga̰l. Swaga ge naa ne ɗaŋgre ta fare, guniya e nama gaage mbe aya. 17A go no, Dok, swaga ge ne ɓyare ŋgay na naa ge ame na wak tuli joo ma go na fare mbe mbo det uzi to, guni tene. 18Ne da pe no ɗe, kaŋ ma ya go azi ge a ne er to, ne nama ta Dok ne pool ge kun hale to bat. Ne pe no ɗe, nee ge nee ne deŋge ta na zi ma, nee da ne moɗegeya gḛ ge ne hon nee pool go nee wa̰ ta ndiŋ ge jobreya ge a ne ho̰ nee na zi. 19Jobreya wan nee sḛ ma se dimma ne walam ge wan fak ga̰l se ne wan na go, e nee mḛya ndaar ndiŋ, kale ɗiŋ mbo ba̰r ge ne varse zok ge mbegeya pul se le zi ya#6:19 Kep tuwaleya wat ba̰r ge ne varse zok mbegeya pul se le ge zi ya ge go ndwara ɗu del zi ne tyare tuwaleya pe (Lev 16:2). Jeso wá be zok ge mbegeya mbe no zi to, amma fare mbe jan da ne watɗa ge ne wá digi zi ya ne nee pe. , 20swaga ge Jeso ne e pe wat na zi ya ne nee pe go, ne saŋge kep tuwaleya ge ɗiŋnedin ge eya ge Melkisedek ne pal.

Currently Selected:

Ibriniya ma 6: FGN2013

Highlight

Copy