Ibriniya ma 3

Jeso waɗe Musa waɗe

(Mat 21:33-38)

1Ne pe no ɗe, ná vya ge mbegeya ma, aŋ ge ɓanna dagre ge tolla ge Dok ne zi ma, ndi me Jeso, na ge nee ne oy na dimma ne bage temeya, ne kep tuwaleya go. 2Na sḛ koy na wak tuli ge bage ne e na ta dimma ne Musa ne ke go, ge zok ge Dok ne zi pet#Isi 12:7.. 3Ago, a hon ndu ge ne sin zok hormo gḛ waɗe zok mbe sḛ. Go no Jeso ɓo hormo gḛ waɗe hormo ge Musa ne. 4Ago, zok ge daage pet a ndu a̰me sḭ na ne, amma Bage ne sin kaŋ ma pet, a Dok. 5Musa koy wak tuli ge na ne zok ge Dok ne zi pet, ka ndu ge temel ndwara waage fare ge Dok ne mbo janna. 6Amma Kris, dimma ne vya go, ya zok ge Dok ne pal. Nee sḛ ma na zok ma ne, kadɗa nee wan ta ya ne dulwak ɗu Dok zi, ne jobreya ge nee ne uware ta ne na zi.

Ɗigliya ne naa ge hon fareba ma pe

7Ne da pe no ɗe, dimma ne O̰yom ge mbegeya ne jya̰ go:

«Ma̰ no, kadɗa aŋ za̰ na ka̰l ya#Kmb 95:7-11.,

8togre me aŋ dulwak ma

dimma ne swaga ge aŋ ne kuri na wak,

dam ge kugiya ma zi, ge babur pul go go to,

9swaga ge aŋ bá ma ne he mbi pe, a ne kugi mbi go,

a kwa kaŋ kerra ge mbi ne ma del wara anda.

10Da ne pe no, mbi laar vḛne doŋ pe mbe ta no,

mbi jya̰ no go: ‹Ɗaɗak nama dulwak waal gwaŋgwaraŋ,

a be wan koo-pul ge mbi ne pe to.›

11Mbi guni tene laar ol ge mbi ne zi go:

‹A mbo wat suwal ɗigliya ge mbi ne zi to bat›.»

12Ná vya ma, ke me haŋgal, ndu a̰me ne aŋ buwal zi na ka ne dulwak sone to, ko dulwak ge be hon fareba to ge kuri Dok ge ndwara to bat. 13Amma moɗege me ta dam ne dam, tek ge «ma̰ no» gale ya go, ne da pe ndu a̰me ɗu ne aŋ buwal zi na togre na dulwak ge ya̰meya ge sone ne pe go to. 14Ago nee saŋge ya kaam ge Kris ne ma, kadɗa nee wan ta ya ndiŋ ɗiŋ mbo pe aya ge pe dolla ge nee ne zi.

15Da ne pe no a jya̰ no go:

«Ma̰ no, kadɗa aŋ za̰ na ka̰l ya,

togre me aŋ dulwak

dimma ne swaga ge aŋ ne kuri na wak go go to#Kmb 95:7-8..»

16A wuɗi ma za̰ na ka̰l ne ɗo, a kuri na wak no ɗaa? Te be nama ge ne wá ne suwal Masar diŋ ya zum ma ge Musa pe go ma pet to’a#Isi 14:1-35.? 17Dok vḛne na laar wuɗi ma pal ɗiŋ del wara anda ɗaa? Te be nama ge ne ke sone ma, ge nama siya ma ne ga kanna babur pul go ma pal to’a? 18Guni tene wuɗi ma ta go nama mbo wat na suwal ɗigliya zi to ɗaa? Te be da ne nama ge ne kuri na wak ma to’a#Kmb 95:11.? 19Nee kwa go, a be wat na zi to ne hon fareba to ge nama ne pe.

Currently Selected:

Ibriniya ma 3: FGN2013

Highlight

Copy