Galatiya ma Fare pala hageya
Fare pala hageya
Bulus njaŋge maktub hon Galatiya ma ge del wara anda para tiimal (48) go. Naa a̰me ma dwat go na njaŋge na ge del wara anuwa̰y para myanaŋgal (56) ko wara anuwa̰y para ɓyalar (57) go. Amma swaga hale maktub ma pe go, njaŋge na ge suwal Antiyokus ge Siriya ne go (Tkm 14:27-28). Maktub mbe da ne Galatiya ge le kuu ge ma pe, ndwara suwal ma ge ne suwal Turkiya le ge kuu ge go.
Bulus njaŋge nama maktub mbe no ndwara go, naa a̰me ma ge ne ho̰ fareba ne Yahud ma buwal zi, a mbo suwal Galatiya ya, a ka hate nama no go nama ke mborra Eya ma pal, go no nama ba ɗage ɓol máya (Tkm 11:17, 15:7-11). Uwale, swaga ge Yahud ma ge ne ho̰ fareba ma ne kwa bama kaam ma a kuri be ge zam kaŋzam ne naa ge pehir ge ɗogle ge a ne ho̰ fareba ma (Gal 2:11-16). A go no, swaga gace nama go, ne moɗege Galatiya ma go, Bulus njaŋge nama maktub mbe no.
Nee da ne pool varse Maktub ge Bulus ne njaŋge hon Galatiya ma se pe ataa:
Ne Gal 1—2, Bulus wan maana ge na ne pe, na ge Yahud, Jeso wa̰ na, na saŋge na bage waage fare ge kwaɗa pehir ge ɗogle ma ta no. Ago mborra ge na ne, naa ga̰l ge ne swaga koteya ge ɓase ge Dok ne ma ge ne Ursalima go ma vḭ ta vin na ɗage mborra no. Pehir ge ɗogle ge a ne ho̰ fareba Jeso ta ma be mbyat ge gwan ne bama pala eya ge Musa ne ma pe se to, ndwara go ba̰y vyanna ma ne kaŋzam zamma ne naa ge dunya ma. Bulus mḛre Bitrus ne fare mbe no pe (2:11-21).
Ne Gal 3—4, Bulus hé fare ge ne wak tuli ge zaŋgal zi, ke nama kwarra no go, máya da ne pala gwanna Eya ge Musa ne pe se ta to, amma ne hon fareba Jeso Kris ta. Ago Dok vare naa dasana ma to, Yahud ko Yahud to, ndu son ko ndu gwale, mo̰r ko vya twala, naa pet ɗu Dok ndwara se.
Ne Gal 5—6, ke nama kwarra go, naa ge ne ho̰ fareba ma suli Dok ndwara se, a O̰yom ge Dok ne ɗame nama ne, é nama ke kaŋ ge daage pet ge kwaɗa Dok ndwara se ne, ge ne waɗe a laar wanna. Suli ge nama ne da ne Jeso Kris ta, a be ne kwaɗa kerra ge nama ne ta to.
Maktub ge Bulus ne njaŋge hon Galatiya ma da ne hamba ne ndu ge daage pe, ago vareya a̰me ne naa dasana ma buwal zi to, nee pet nee ɗu Dok ndwara se. Suli ge nee ne é nee gwan kat mo̰r ne eya a̰me pe to, amma é nee gwan ne nee pala O̰yom ge Dok ne pe se.
Currently Selected:
Galatiya ma Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.