Galatiya ma 4

Aŋ be gwan gá mo̰r ma to, aŋ Dok vya ma ne

1Mbi jan go: Tek ge vya ge zam joo gale ne jyale, a hini ne mo̰r to, ko ne jo̰ kaŋ ma pet a ge na ne ma ne. 2Amma na sḛ ya ndu ge hateya ma ne ndu ge koyya tok go, ɗiŋ dam ge na bá ne é na mbyat. 3Nee me, swaga ge nee ne ka jyale gale, nee ka mo̰r ge pool ge dunya ne ma ne. 4Amma swaga ge dam ma wak ne wi, Dok teme na vya ya, na ge ne tó ne ndu gwale zi, ge ne tó Eya zi, 5ndwara zur naa ge ne Eya zi ma, ne da pe nee saŋge Dok vya ma.

6Ne jo̰ aŋ na vya ma ne ɗe, Dok teme O̰yom ge na Vya ne ya aŋ dulwak ma zi, na ge ne oy go: «Abba! Báá#Mar 14:36, Rom 8:15.!» 7Ne da pe no ɗe, mo be gwan gá mo̰r to, amma vya twala. Kadɗa mo vya twala ne ɗe, mo vya ge zam joo ne, ne Dok ta.

Iigiya ge Bulus ne ne gitɗa ge Galatiya ma ne pe

8Zaŋgal, aŋ be kwa Dok to, aŋ ka ke dok ge be dok to ma temel mo̰r. 9Amma ne se no, ne jo̰ aŋ kwa Dok ya go, ko Na sḛ kwa aŋ ya go, aŋ te ke gyana aŋ ba gwan mbo ke kaŋ ge taŋgay ma, ge be hamba to ma, nama ge aŋ ne ka ke nama temel mo̰r zaŋgal ma temel mo̰r iya ɗaa? 10Aŋ te hon dam a̰me ma, ne saba a̰me ma, ne swaga a̰me ma, ne del a̰me ma ga̰l gyana ɗaa? 11Mbi da ne vo go mbi á tene temel zi ne aŋ pe baŋ yak.

12Ná vya ma, mbi kaɗe aŋ, saŋge me ta dimma ne mbi go, ne jo̰ mbi saŋge tene dimma ne aŋ go me. Aŋ be ke mbi ya̰l a̰me to. 13Aŋ da ne na kwarra, a duur moy ge mbi ne e mbi waage aŋ fare ge kwaɗa zḛ zaŋgal ne. 14Ne kugiya ge aŋ ne ɓo na ne duur ge mbi ne ta no puy ɗe, aŋ be ndil mbi kaŋ senna, ko kuri mbi to, amma aŋ ame mbi dimma ne maleka ge Dok ne go, dimma ne Kris Jeso go. 15Aŋ laar saal mbe ya da ɗaa? Mbi da ne pool ke aŋ sayda mbe no: Te go na mbya kerra, aŋ te ya zwagle aŋ ndwara fa̰ ma hon mbi. 16Swaga jan aŋ fare ge fareba go, mbi saŋge ya aŋ ndu ge ho̰l ɗaa?

17Nama honna ge a ne ho̰ ta ne aŋ pe mbe no, a be hon ta ge kwaɗa ne to. A ɓyare varse aŋ ne mbi ta, ne da pe aŋ ba ga hon ta ne nama pe. 18A kwaɗa go, hon ta ne kwaɗa kerra pe na ka ɗaɗak, a be ɗeŋgo go, na ka swaga ge mbi ne kat aŋ buwal zi to. 19Mbi vya ma, mbi gale za̰ yál ya go ne aŋ pe dimma ne gwale ne ke twala go, ɗiŋ Kris furmi aŋ zi. 20Mbi ɓyare go, mbi ka aŋ buwal zi, mbi ba ɓol fare ge jan aŋ, ne se no mbi kwa fare ge jan aŋ to.

Fare sḭ ge Agar ma ne Sara ne

21Jya̰ me mbi gale, aŋ ge aŋ ne ɓyare gwan ne aŋ pala eya pe se ma. Aŋ be za̰ fare ge eya ne to’a? 22A njaŋge go, Abraham tó vya ma azi, ɗu ne na kale, ge may ne na gwale ge sanna me. 23Amma na vya ge ne tó na ne na kale tó na sḛ duur go, na ge ne tó na ne na gwale ge sanna tó na wak tuli pal me. 24No a fare sḭ ne: Gwale mbe ma jwak a ŋgay wak tuli ma azi. Ge ɗu, a wak tuli ge njal Sinay pal, na ge ne tó mo̰r, a Agar. 25Ago Agar a njal Sinay na ge ne suwal Arab go. A Ursalima ge ma̰ ne, ago nama sḛ ne na vya ma ya mo̰r zi. 26Amma Ursalima ge digi a suli, a na ge nee ná. 27Ago a njaŋge go:

«Mo ge ne ba̰ gisil, oy digi ne laar saal, mo ge ne tó vya to.

E suŋgri digi, ke laar saal, mo ge ne ke twala to.

Gwale ge baŋneya vya ma zuli ya se ceɗed,

waɗe gwale ge ne obe pe zi#Isa 54:1..»

28Ná vya ma, aŋ ɗe, dimma ne Isaku go, aŋ vya ge wak tuli ne ma ne. 29Amma dimma ne vya ge ne tó sḛ duur go ne ka ke vya ge ne tó O̰yom zi yál go, ne se no puy, a go no me. 30Maktub njaŋge gyana ɗaa: «Yá̰ kale mbe ma ne na vya, ago kale mbe vya ne pool ge zam joo dagre ne gwale ge sanna vya to bat#Pe 2:9-10..» 31Ná vya ma, nee be kale vya ma ne to, nee gwale ge sanna vya ma ne.

Currently Selected:

Galatiya ma 4: FGN2013

Highlight

Copy